Kapampangan Library

Milabas ing aduang bulan a pamamialung at pamisan-misan tutuking pamandulung king marangle.

Umpisa na naman ning klasi. Bayu ne naman ing mestra, i Mam Salud. Metung kami mung klasi, inya ring kaklasi ku keng mumunang balitang ila mu namang kaklasi ku ngan ngening kaduang balitang.

Keta palang meyari ing klasi, atin e mipasar kareng kaklasi mi keng mumunang balitang. Deta sigurung maina taluki keng lisyun uling e la mapakiramdam neng magsalita ya ing mestra, detang mapag-palya keng klasi, ampo retang maki-kakeynan taluki keng lisyun. Maigit-kumulang keng apulu la ata reng mebalag keng klasi mi at keilanganan mulit keng mumunang balitang.

Ing pagaralan mi ngeni keng kaduang balitang pamamasa munaman ampong pamagkuwenta. Inyang mumunang balitang, Kapampangan ing pamamasa, dapot ngeni kanu Tagalog naman. At nung ing pamanguwenta banuang metung dagdagan mu ampong bawasan, ngeni naman paspasan na ampong dakayan o pitnaan. Siyempre, ikami reng kaklasi kung bayu pamung sinampa keng kaduang balitang, ala kaming kabalu-balu pa kareting Tagalog, paspasan ampong dakayan a bayung lisyun.

Ken namang kaduang balitang ngeni, atin kami munaman palang disan a mumulit manibat keng milabasan a banua. Ing metung, babai ya. Biasa ne man, oneng mesakit ya pala inya keilanganan na pamung tuknang magaral ban magpakayap. Ngeni, kaklasi mi ya, i Glo.

Atin yang paralan ing mestra mi ban abalu mi la at aintindian deng paspasan ampong dakayan. Ginupit yang kartulinang maputi alus apat a dali lapad misusumangid a gilid at sinulat na la reng nomirung pipapaspasan. Keng gulut, snulat na la reng pakibat. Balang abak ampon gatpanapun, kukutang na la kekami reng pakibat kareng papakit nang arap. Babalasan na la ban e mi la pagmemorya mu reng pakibat nune ban mitanam la keng isip mi. Meg-umpisa keng metung paspas manibat metung anggang apulu, kaibat adua, atlu, anggang apulu. Makanyan mu naman ing gewa na keng dakayan.

Ing Tagalog yapin ing salita ra reng e Kapampangan. Ila ring makatuknang a tau king Menila nung nukarin la magaral kolehiyu at ding magobra ampong manintunan a ibat nang megaral at makidad nang tau. I Koya ku karin ya magaral, nung nu ya makituknang keng pisan ming Kong Pinung a talasawa na at karin na manuknangan perminenti.

I Glo biasa ya. Nung e ya mu mesakit, yapin siguru ata ing meging biasang dili keng klasi ra, nung e pangadua.

Mala-marine kami pang mika-klasi kareng babai ampon lalaki. Malagua lang linabas ding aldo. Ing pamamasa ampong pamanguenta antimong natural a kalakaran ning bie kekaming keraklan, bista man antimong masakit a pagsubuk karing mapilan. Kalupa iniang mumunang balitang, ing mestra sasaparadu na lang dane keng kuwartu reng mabilis taluki kareng medyu mabagal a taluki keng lisyun. Deng parting kapitnang kaili ila reng mabilis, at deng parting kapitnang wanan detang medyu mabagal. Dapot para kanaku ketang panaun a ita, metung mu ing yatu at e pansin nune ing makirandam at mamintu keng sasabian nang Madam Salud, ampo ing pamamialung panga-recess.

Ing mestra menutuk ya mu naman maglinis keng kuwartu kaibat ning klasi ampo ing mamalis keng lambale neng abak bayu klasi.

(Nang: Conrado R. Gwekoh)

Ding makatuki mumuna lang apat a estropa kareng labing-adua.

Samantalang tiu pa ing pungul qng atian
malugud nang indu quea nang pagnasan
wari’t ing cambang na
babai yang lual
mie ya sang timawa mipnung capurian
layun lapsu queta, cumit yang dangalan.

Nun ma-dalaga ne sidsad ya sa lagu
macanian mu naman majinjin ya’t mamu
mabiasang mirapat
matulang sumuyu
ampon maganaca, maca-adiang miacu
sequitan ning bie’t alisian nang tagcu.

Piluluguran sa queang panugali
at pitutulan de babai’t lalaqui
nu ya man sa maling
quea e-cawani
ing atu ding sabla, atung macapuri
manga labis queta ala sang masabi

Dit mang caumisan quea macamusing
qng bie nang pijican, bie nang ilalarin
nune bagcus sanang
milisuc a iring
ing queang pangimut, at maguing salamin
panganinawan da ding qng landas mingsil.

Nota: Iting poesia ya ing migcamit MUMUNANG GALAL qng ligligan poesia quetang Abirl 5, 1923

Ketang milabas a pilan panaun, ing kapakumbaban ampon kagalangnan panaral da at tutungguen kapurian ding makatua. Deti naman pamintuan da ampong tatalangan ding kayanakan.

Ing kayabangnan at ka-adalentaduan tatas dang kile ring balana at mataktak papangilag.

Keng "Daclat Cayanacan" nitang Aurelio Tolentino, pakapanabilin na:

Ing pamaquiparang-tau't cagalangan
ya ing saguisag na ning sablang cabiasnan.
Pati't quelinguan na iti ning ninu man,
e ya sucat dungut qng sa mang piarapan.

E sucat ing bandi, e sucat ing santing.
cabiasnan e sucat, dangal anti mu rin.
Bingguit cung saguisag pati't yang mebating,
mabating ing sabla, cusang mangulimlim.

Ing wagas a tunud, anyung matimtiman,
ing pamag-matapat, mahinhin a asal,
iti yang dalan mung panagaula bilang,
ba-cang maguing tampuc ning sablang dangalan.

Dapot ngeni kalabas mu alus ning limampulung banua, ing kapakumbaban at kagalangan tuturing da nang kakeinan at kelan tepangan lub ding kedakalan, matua’t anak.

Ding kapagmaragulan at pamagpasikat a sadia rang pagtas-kile binsaganan da lang bayung sangkan a kabaldugan – kompiansa kanu ampon panga-prangka.

Ibat pa pin quetang anac kang pelangga
ting cong catungculang matalic a bina
anti mo ing e ya dinan dit mang lugma
ing ibpang mulugud, ing calulung inda.

Cabang daragul ca, daragul mu naman
itaning bingguit cung quecang catungculan.
Nung quetang minuna ing Yatu mung nuan
candungan yang inda, ngeni ing Balayan.

Nang Pusung Capampangan
February 14 , 2019

Nung ikayng malutung rosas , yaku sa ing aring aldo
Nung mibulus ining uran
kule keka ku padungo
Yang magbante at kambilan mu pinanaring makapaniglo
Potang datang na ing pisak
Libayan durut ku’t galo
Bang akakit daka pane king panimanman e mako

Makanyan ya ing kilatis king guintung e ya mitalbug
Sinta kung keka matapat kadalisen ya’t tibubus
Datang man wakas ning yatu o kakung palsintan irug
Kadalisen ning lugud keka mangibabo ya’t sisibul
Menabtak na ngan sabla king pusu atin pang mamagus

Makanyan kung buring paramdam keka o amanung sissuan
King aldo ra dening pusu terak katang alang tuknang
Kabang manlidayug ding rima musika ring kawatasan
Pabitasang kakung lugud king salimbe ku paramdam
Memaligwa ku man ngeni lugud keka kabang kabang