Happy birthday o bandi ku

Posted on July 12, 2023 by inglibrarian

Masaya lang kanta kanta / detang angel karin banua
Matula dang pagselebran / aldo ning kakung asawa
Julio sais ketang beit / ne nitang mal a indu na
Rodolfo Valentino ya / ing binye dang lagyu kaya

2.
Anti ku ne mong akakit / makalukluk ketang eran
Masaya ya’ing kayang lupa / manyaman ing kayang timan
Ala na ing dialysis / at sakit a panandaman
Mewala na’ing pamanyuka / at ing gatal na katawan

3.
Bista man tutung masakit / ing miwale ya kanaku
Pilit ku ngang akmulan ‘ta / uling tutung lulugud ku
Mas masakit pin siguru / nung atyu ya pin siping ku
Sobrang sakit panandaman / gugulisak, e na agyu

4.
Agwantan ke ing sarili / pota kumiak naku naman
Pipilitan kung ganakan / masaya tang milabasan
Kakabit ku king isip kung / ‘tyu ka king mayap kabilyan
Kayabe da ding angeles / at ning Guinu tang Miglalang

5.
Isipan kung atyu ka ken / pane mu kaming lalawen
Uling tutung malugud ka / pane mu kaming babanten
Ibat pa kasi king ibat / e mu nake pepaburen
Ikami ing prayoridad / maski kaninung memalen

6.
Uwa, tutu magmalun ku / ikami dening anak mu
E mi pin agyung tanggapan / ing mewala na kang tutu
King sakit ning panandaman / mangaspak na ke pin pusu
E mi la agyung agwantan / e mi la balung ituru

  1. Ngening atyu naka banua / buri kung agaganaka
    Itang saya king lupa mu / kontentu ka at masigla
    Binye na ning Guinu keka / sakit ala nang bitasa
    E wari yan ing nawad mu / bayu ka mewalan kalma?
  2. Nung nukarin ka man ngeni / o dearest kung kaluguran
    Happy birthday o bandi ku / maski ditak magparamdam
    Nung e malyaring akit ka / bustan mu sang paninapan
    Anggiang karin mu man rugu / auma daka at kaulan

Posted in Parikil, Poesia, Poetisa Winnie Beltran Silvestre | Leave a comment

ATIN SINE KARIN PATIO

Posted on July 12, 2023 by inglibrarian

nang: PL Sergio Gramonte Calayag

Atin sine ketang patio, gulisak ning mamalita
Balang kantu yang tutuknang,, at sabian ne itang nasa
“the voice of love” ya ing kanta, yang pangising kareng malda
Maranun pa mapun na la, agyang tutu pang masala

Pangabukas yang pisabian, ing inalbeng penikula
Agyang pareju deng elben, iya ini ing istoria
Nung Fernando ya ing bida, neng kukuwento atin mostra
Nung nanu mo itang gewa iya ining apusan da.

Tune keni me damdaman, ing kuwento ning metung aeta
Iya kanu ing menalbe, tutung mainge at neng sigla
Babarilan de’i Fernando, keng gulisak mengabigla
“kuya Fernando, keng gulut” mengilag ya’t e miragsa

At kanita na sinabi, “mituran ka sana, kuya”
“Nung e ku mu ginulisak, ika sana ing mete na”
‘nia pasalamat ka kuya, ika ining mekalisya”
Dening tau a manalbe, sinagakgak la keng tula

Ing panaung alabasan, iyang tutung misnang simpli
Uling keng mengapauna, ing ala pang colored tv
Deng black and white television, ditak la mung mikibandi
Deng taung makipanalbe, ila rening makisabi

Inia sine karin patio, pigumguman de reng tau
Ini tutu king kalagad, neng pakilala’ng produkto
Metung simpling kapabaluan, palaganap de mung ustu
At metung ya mung paralan, ban abalu deng memaryo.

September 11, 2021

Posted in PL Sergio Gramonte Calayag, Poesia, Poeta Laureado | Leave a comment

ING BIE NING TAU ANTI YA KENG LIBRU

Posted on July 12, 2023 by inglibrarian

nang: PL Sergio Gramonte Calayag

Ing bie na ning balang tau, pakiyarle kareng libro
Iyang dakal kabanata, mababasang akakit mu
Detang kaya nang bilungan, makasulat, abasa mu
Atin tula, atin ring lua kareng mata yang tumulu

Itang lua na ning tagumpe, kening pusu panandaman
Itang lua na nitang lungkut, ing pusu mu yang bengalan
Nanu ya man itang dasan, isundu me ing babasan
Pablasang tutung e me balu, itang bukas a paratang

Ing titulu niting libru, iya ini ing pamilya
Kabuklat mu ilang akit, detang laman a mitala
Kabang ila reng bubuklat dening kaya nang pahina
Ila reng bieng adalanan, balang aldo magagawa

Kabang iya ing babasan sasanting ya ing istoria
Iyang miras king sukdulan, katuki na panayan ya
Tutung ini e mayari anggang tau mabie ya pa
Kabud mepatad inawa, kapupusan dinatang na.

At keng libru mung asulat, mayakit ka pamibiebie
Manibat ‘niang ikang anak, misulat anting sanese
Ginamit man keng e ustu o ginamit masalese
Mitala la at misulat megamit ya ini nang bie

At kareni nang mamasa, itang aral ya sang akua
Makule mung pamibiebie iya sana ing abasa
Ika’ng mamie inspirasyun, ban mikabie la reng diwa
Ining bie mung mayulaga, a binie ning Mayupaya

Posted in Bie, PL Sergio Gramonte Calayag, Poesia, Poeta Laureado | Leave a comment

PAMPASANTING KUTIS

Posted on July 12, 2023 by inglibrarian

nang: PL Sergio Gramonte Calayag

Alub namu ing santing ya mika kutis porselana
‘yang gagamit a panulu at pangaskas ketang lupa
Iya ining inatulan iya kanung magpa-derma
Dapot maragul ing gastus, e ne agyu nitang bulsa

Misan abak a maranun kayari nang mengasilya
Apangsingan ing pH care iyang kiskas keang lupa
At neng tula keng ginamit iya kanung misnang dimla
Aburi neng gagamitan, balang abak alang palya

Ing balu na luminis ya at sumanting yang lalaki
Inia e mangutang man keng asawa nang babai
Dapot misan ing asawa, magtaka ya keng sarili
At neng talik magigisan, ini kayang panos p–i

Misan aldo kayabakan ing asawa yang abante
Iya pala ing gagamit, kening gamit pambabai
Menagkas yang alang oras, ining asawang babai
Bakit iyang gagamitan?, gamitan mu ing Myra E

Posted in Komidya, PL Sergio Gramonte Calayag, Poesia, Poeta Laureado | Leave a comment

ING SAPANG LUKLAK KARIN KAMPO O’DONNELL

Posted on July 12, 2023 by inglibrarian

nang: PL Sergio Gramonte Calayag

Ing lugal ning Capas shrine Lalawigan na ning Tarlac
Iya ing Campo O’Donnell, ketang gerra a milabas
Deng magiting a sundalus penandaman itang kaplas
Keng bagsik da rening dayuan iya ini ing amalas

Agpang keng kasalesayan patutuan da reng makatua
Dinuku la kareng dayu, ban mituknang ining gerra
Manibat karin Bataan, ila rening meparusa
Pelakaran ketang dalan, keti Capas mepreso la

Keti kilub ning sukulan kasakitan adalanan
Dakal la reng mamamate, papasejo ketang dalan
Anti la mu keng basura, iyugse da king kulkulan
Kuanan de mu itang dog tag, saka dala tatambunan

Deta naman a misalba, iya ini ing istoria
Agpang kang Rafael Yabut, iyang tutung denasan na
Ating sapa ketang gulut, Sapang Luklak ing awus da
Ilang keni mamandilu, at minimum neng kakawa

Itang aldo milaya la, atsu la rin keting kampo
Misaglulung memaninum, saka ilang memandilu
Atupan do reng butiti, ilang pengan at sinubu
Ketang pait dang alasa, kalibangbang ing panulu

Deng mikibalu keng lugal, ila reni deng tinakas
Milayi la kabundukan keng kakewan a malualas
Dapot itang kabayaran apulung bie ing katumbas
Ketang karelang asaksian tutung ala nang mengangas

Ing makabitin a tete (hanging bridge) iya ini ing telakad
‘yang metung palatandanan keng panaun a milabas
Iyang dakal a istoria deng sundalus yang dinanas
Inia potang munta kayu, iyang lawan ban amalas.

Posted in Kasalesayan, PL Sergio Gramonte Calayag, Poesia, Poeta Laureado | Leave a comment

“kang Mino”

Posted on July 8, 2023 by inglibrarian

(e ya pu siryosu ining poesia; akatulan ke mu)

misan peinawa ku ampong migluklukan,
ban palual sukal lub, mipasno at kayan,
e ku mu mipasno, meyan panamdaman,
nune ing ukul ku melikut ya naman:
makanano kase, itang kasiping ku,
itang magpainawa keng sumangid kuartu,
ing keyang sukal lub mabayat masyadu,
mabayat pin bina kesa keng kanaku,
makikirandam ku, at andat mugnus ya,
iti, o’t bala mu seriang pupukul na;
matni at maragul suala pamanugpa,
inia pin ing maili, e ku ayaguanta.
anti yang mamukul kamansi keng ilug
andat ing dàràyas, kang Doru mabaldug.

06/07/23 //09:50
kabang painawa keng obra uling mig 160 ku prisyun

Posted in Capampangan Shakespeare, Komidya, Mala-Sonetu, PL Tuazon Sabandal, Poesia | Leave a comment

KING MT. PINATUBO COMMISSION – CAB

Posted on July 8, 2023 by inglibrarian

nang: PL Sergio Gramonte Calayag

King parade ground ning Clark Air Base, aku ngeni ing memasyal
Kabang dening kaklase ila rening panenayan
Lawen-lawen ing paligid, sasalusub keng isipan
Iniang bale karin Dapdap, ila rening pakilaban

Atsu keti ing MPC, Mt. Pinatubo Commission
Corazon Alma de Leon, iya ini ing chairperson
Iyang taung pakisabian, kening masanting kung layun
Ban deng bale mitalakad, keng karinan a manayun

Anti ku mo ping maninap, kagising ku keng pagkeran
Ating atlung pulung banua, iyang tutung alabasan
Kayakbung ning Pinatubo, delanan ing kasakitan
Tinalakad keti balen, ban kabalen ilang saupan

Inia itang milabasan, iyang metung nang istoria
Ating pusung pamagsilbi, para kening baleng sinta
Erapan ku ing pagsubuk, dening tau erapan la
Angga karin Malacañan, deng bitis ku tinuklu la

Makanian kung menungkulan, keng milabas a panaun
Megobra ku at megsibi ban ing balen yang mibangun
Ketang kayang pangasira, mikutkut ya ketang aun
Inia nung alang sasagip, mibangud ya’t e mi-angun

Madagul ku pasalamat, king Dios lbpang mayupaya
Mekapagsilbi ‘gyang ditak, keti Bamban tamung sinta
Inia kabud atiglapan ing malagung opisina
Aganaka ing milabas, iniang aku’ng consejal pa.

Posted in Karanasan, PL Sergio Gramonte Calayag, Poesia, Poeta Laureado | Leave a comment

nio

Posted on July 8, 2023 by inglibrarian

“nio”
(behold)

nio, kanakung pawas a tinulu katri,
ing binie na kaku, tulang alan’anti
–nung kababo basung danum man kayanti,
malulumud naku king kalalam niti.
nio, sinagese kung pawas king katawan,
pesari ning pali ning sintang pisuluan,
a penusignan tang alang gaganakan
pablasang king Babo maki pamun naman.
nio, king minatak kung pawas king kama ta,
ala kung asabi nung e “aleluya;
salamat maragul king matas a Banua
–tud kung makayaklung, pekibatan Na la”.
nio, kakung kabislak, lumbe ku at tula,
ing kekang daralang pangane tang addua.

(linarin)
05/07/23 //19:44
kaibat meglutung suam mais

Posted in Uncategorized | Leave a comment

“sula ning pusu ku”

Posted on July 8, 2023 by inglibrarian

magkapilit ne sa’ a manaimik na
ing kanakung pusung kibkuban ning dusa
uli ning masiri a pamangulila
keka a angel kung sula ning kaladua.
pero o’t bala mu anti yang mamusit
ing kalmang e bisang maniayang pinandit
inia pelad na la at kaku pepakit
detang kakung keka pane bibie biskuit.
iniang akit ku la lakuas miragdagan
ing pamangulilang kakung panamdaman
kekang kapirasung pusung pakamalan
ning pusu kung maung kaul mu at timan.
sula ning pusu kung pangulilang bina,
uluan mu ku sa’ lub, at mikit ta na sa’.

08/09/22 /15:50
kaibat kong ikit keng internet deng biskuit a “ice gem”

Posted in Capampangan Shakespeare, Mala-Sonetu, PL Tuazon Sabandal, Poesia | Leave a comment

GRADUATION KANITA

Posted on July 8, 2023 by inglibrarian

nang: PL Sergio Gramonte Calayag

Graduation kanita escuelang Banaba
Magdalang tab’reti, saka la ilera
Ila rening bubuat, papuntang escuela
Tutung makagani, pakapiblas ke pa

Mamanulu pawas, keta nang lakaran
Lalam reng pun dutung iya ing pulisan
Kipmuan kaming tula graduation panayan
Mituklu nang high school keta nang arapan

Ngeni panandaman lungkut ampon saya
Uling mayari na keng elementarya
Mikawani kami ning kanakung sinta
Melumbe kung pusu iyang mangulila

Tigtig ning “Aida March” ikaming magmartsa
Babo enteblado karin ke papunta
Lagyu mi mayaus, iduang ing diploma
Karas ketang lalam, ima salubung ya

Kayaring graduation ikaming mikaul
Sintang pakamalan, iyang ngungulangul
Gagang alang tuknang, maibug pang mabungsul
Mikawani kami, pusu ing tututul

Mitanguanan kami, ing alang magbayu
Sabeng migulutan iya nang dinayu
E bitasang mikit, dakal nang mibayu
Dapot panenayan niting bigung pusu

Keng datang panaun aku ing mamasa
Mikit pasibayu ning kanakung sinta
Panaun linabas limang pulung banua
Ketang pamitipun, tune tinagun ya

Kaluat a panaun, kanita pa mikit
Aku’ng tinalakad kaya ku linapit
Migamatan kami misna king katigik
Ing mapali nang lua, pinatak keng gilid

Ala mang amanu, ala ing sumbatan
Mipaglalawe mu, saka ke titiman
Lalawan da kami ketang ka-orasan
Inia mipanagkat mangan ketang dulang

Kabang mamangan na, aku’ng mangomusta
Iya ing makibat meging kabilian na
Iya ing manaya, ketang kayang sinta
Aku ining meili, yari ne’ng istoria

Posted in Bie, Karanasan, PL Sergio Gramonte Calayag, Poesia, Poeta Laureado | Leave a comment