Kapampangan Library

nang: PL Sergio Gramonte Calayag

Kilala ya ining ari, at bantug ya king Europa
Masikanan ya’t mabandi, balang buntuk duku kaya
Iyang ating aduang anak, metung ya mu ing magmana
Anya ilang pepayaus, ing pagsubuk yang gawan da.

Corona ning Guinung Jesus, ‘yang karelang pagdulapan
Nung ninu man ing manakit, idala ne king kayarian
Iyang maging kayalili, ibili ne keng tungkulan
Uling iya ing mesubuk, atin tapang at tetagan.

Ginayak la dening adua, miglakbe la ‘liwang lugal
Ining koya iyang miras, America at Portugal
Iyang miras karin Asya, migbabayi at susugal
At ing bunso king Autralia, at ketang banal a lugal.

Ining koya a manintun, ketang luhu migpasasa
Winaldas no retang pera, keng alang katorya-torya
Memasyal ya Wuhan, China, America at ltalia
Kareng bangsang mangakualta, karin mu rin king Espanya.

Ining bunsu nang kapatad, panintunan ing corona
Iyang miras king Golgotha, bakas suksuk ing disan na
Dening bakas ilang kinua, ketang suksuk a corona
Ilang inuli king kayarian, at pepakit kang lbpa na.

Mibalik ya king kayarian, ining bunsu ‘yang pibekut
Inampang ne itang bakas, corona ning Guinung Jesus
Keng keluatan ning panaun, ketang kayang pangakutkut
Alus maybug nang mabura, dapot ini yang inabut

Linaganap ining sakit, menibatan Wuhan China
Nung nukarin ya memasyal, ing panganeng kapatad na
Kareng lugal a pintalan, iya pala ing magdala
Keng virus a makamate, ini iya ing corona.

At kanita ya sisisi, ing pangane keng atupan
Ing corona nang penintun, magadala yang kamatayan
Uling e ne penintunan, ing coronang pakamalan
Migpasasa keng dewakan, pati ing bieng kalayawan.

Ining bunsu nang kapatad, memintu ya king ibpa na
Tinuki ya king kaburian, ban e sakit itang lub na
Uling iyang kaluguran, pakamalan a tata na
Gewa na itang kaburian, menusig ya king buri na.

Dapot ini nang pangane, kalayawan iyang buri
E manusig ketang ibpa, gagawan na nanung buri
Anya iyang miparoro, matsura nang panugali
Milako ya itang mana, uling ‘yang makasarili

Metung ya mung bungang isip, ining kanakung akuwento
Patungkul kening maliliari, keni babo niting yatu
Kaburian ning Guinu tang Dios, karin tamu sa mamintu
Aliwa ing pansarili, makasira kening yatu.

nang: PL Sergio Gramonte Calayag

Ing alalan pangbarangay, iya ngeni ing paratang
Dakal kareng bisang tagal, ila rening magparandam
Potang ila rening kutnang, keng platapormang dadalan
E ra balu ing pakibat, o nung nanu’ng dapat gawan.

Dakal kareng atin nasa, ing luluban e aintindian
Basta namu mayayawus, ila rening manungkulan
Kasalesayan ning baryo, pati kayang paglugalan
Tutung ala lang kabaluan, nukarin ya ing angganan

Nung alang pamamatiawan, keng malukang pagkarinan
Ing asensu e ya datang nanu ya man itang gawan
Munang dili pakibaluan, itang sukad at angganan
Ninu rening sasakupan, ban kasaupan iyang iduang

Nung keng sarili’ng pigagap, pansariling kapagnasan
Ing magsilbi ala naman, at ing sweldo’ng panenayan
Makalunus la reng tau, ing barangay malalakuan
Malaut ya keng panyulung, pauli ning kapabustan

Inia karening botante, metung ya mung paganaka
Pilinan lang manungkulan, detang atin mayap nasa
Ing balu de itang obra, a miyatang keng pago ra
Aliwa retang matamad, sweldo mu ing panayan da

Deni naman atin nasa at bisa lang manungkulan
Ilualas ing panimanman keng lugal a sasakupan
Pakibaluan ing kailangan iyang mumuna mung gawan
Ipalkas mu ing kagiwan, at ing obra iyang gawan.

nang: PL Sergio Gramonte Calayag

Paninapan ning pengari makapayari yang anak
Pamagaral keng escuela ketang kurso a masampat
Yang parati nang sasabian, karening taung kayarap
Maliari nang apamana keng daratang nang bukas

Inia kabud mayari ne ketang kayang pamagaral
Ing pakamalan nang anak, metupad ne’ng paninapan
Midinan yang pamibiebie, pamibiebie a marangal
Itang tula maglipato anting api king katasan

Kabang anak yang magaral, alang patna keang usuk
Kausukan nang papabal, tutung iyang e patugut
Paganaka nang parati, ‘gyang dumalan ya keng busbus
Iya mu sana’ng mayari, kasakitan ne dagisut

Pablasang dening pengari, iniang ilang magpamilya
Pakibatan king Dios lbpa, dening anak lingapan la
E mu ketang paimalanan, papagaral king escuela
Paragulan ketang mayap iya ini ing mumuna

Inia ngeni pagmasusian ining aldo mayari na
Lulundag la ketang tula, pipagalan mikabunga
Itang tiaga ampon sipag, at keng pawas medilig ya
Tutung misna king kayumu, ining bungang pupulan da