nang: PL Sergio Gramonte Calayag
‘Niang libo siam a dalan at labing adua ya ing banua
‘yang bulan na ning Enero mumunang aldo ya’ng petsa
At kanita ya mibuklat ing Gabaldon tang escuela
Ban agamit deng magaral, ing kabiasnan ipabal ya
Bakit awsan deng Gabaldon? deng magaral yang kukutang
Atin Gabaldon king Capas at aliwa pang balayan
Inia iya ing pagtakan, ing lagyu ning escuelaan
Nukarin ya menibatan ing lagyu nang pakamalan?
Ing lagyu na menibat ya kang Don lsauro Gabaldon
Metung yang assemblyman ketang minunang panaun
Metung batas penimunan iya ini ing sinulung
Balang escuelang telakad, ating pondung tunggal milyun ( Gabaldon Act 1801)
Bruno Sibal, Lacanlale, ilang memie kening lugal
Ban talakad ing escuela, babo ning bunduk-bundukan
Dening tau a lalabas, iyang tutung tatangalan
Dakal anak a megaral mikabie lang kipmuan dangal
Dinatang ing gerra mundial, ginamit de rening sakang
Iya ining gewang kampo, opisina at santungan
Inia iyang mengabomba, at maragul ing kasiran
Kayari na niting gerra reparasyon ing kailangan
Melarin ya ing escuela, meging pugad ning kabiasnan
Dening anak memagaral, bibitbitan itang beluan
Dinalan ya ing panaun megipu ya ing bubungan
Tutu e ne magagamit, at mangailangan yang kasaupan
Senador Antonio Trillanes ‘yang kekaming lepitan
Ban magamit pasibayu ing escuelang pakamalan
Tune e ke man mebigu inabut ne ing kasaupan
Mibayu ya ing bubungan mibalik ing sadiang leguan
Inia iyang pakamalan ining matuang institusyon
Meging dalan ning kabiasnan. at sulut ning edukasyon
Balikdan ya ing milabas, metung karening pundasyon
Pundasyun na ning kabiasnan ban mikabie tang manayun
