E ku mipaindatun king balang penandit🌷
Ika’yng keng isip ku, pantunan dusuldit💐
Buri kung damdaman kaul mung matalik🌹
At pagtumaila king malambis a tapik.🌼
E ku apaglibe ing lingap mung bibie 💛
Anti ya mong guintu, lugud mung darake💚
Pusu ku matula, ika’yng kayantabe💙
Dacal a salamat, Indu, kakung gabe.❤️
~ Tulang ning Magalang ~
🍃 melanienaguit 9mayo2020 🍃
Irvin Harvey Rivera
Siuala Ning Maliwalu/Anac Ning Baculud
July 1, 2017
Ya kanung maglasak matibeng pamilya
Karing bisang muma king pisngi nang Celia
Ya kanung sisira king asyas nang Eva
Pikakasaman de ing Mutyang Dalaga.
Agyang nukarin mang labwad ya midane
Matsura la lawe ring kayang kayabe
Ya kanung sangkan da karing pamipate,
Da ring miyasawang miyayabe lande.
King karelang baryu tutu yang kasebyan
Ing Mutyang Malagu’t masanting katawan
Inya pin maralas de iting pagnasan
Ding sablang lalaking palipi nang Adan.
Uling balu ra ing meguing dating obra
Karin king Angeles king awsan dang “Area”
Metung yang Babaying awsan da ngang “puta”,
Mababa sulapo’t masasaling pera.
‘Nyang misalunan ya ing Mal a Indu na
At manggang bumbunan na itang utang da
Kanyan na isipang manintun yang obra,
Tuknang n’yang magaral bang e la sumala.
Ing mandulap pera uling kayang imbut
Inya makanyang yang miparas malaut
King bista ma’t tutu king belwan man dimut
Sinumpa nang maun la king pangakutkut.
Kng Ciudad Angeles karin ya kinuldas
Karin ne penintun ing masalang bukas
Ala yang sinayang ‘gyang dit’ man a oras
Mangga na king Area karin ya miparas.
Makanyan neng ikit matwang mika-idad
Tiki ne king obrang kasawi nang palad
Ala yang kebalwan nu’ ne delang labwad
Kng burak na pala karin ne keladkad.
King e na pigagap—Ning Mutyang Dalaga
Pisali ne pala ning abe nang matwa
Ban pagkaluba’nong piragling ligaya
Ding Matwang mabandi a suki ra AREA.
sinulat ne pu ning kakaluguran i Ka Joong Salamin, metung yang talaturu at poeta.
Anti mung curap ning mata ing cayang tindag at leguan,
Calabas na ning cabucas ala ne king panimanman,
Caya waring paganaca keng taung mapangalinguan:
Anti mung bulaclac ing bie, magbalic ketang ibatan.
“Ing Pluma ng Bajoong”
© A.. C. Sibug, Jr.
nang: PL Sergio Gramonte Calayag
Kabang iyang alben, ining video-canta
Tinulu kaku’ng lua, e ku ayaguanta
Linub keng isipan, ing bie kung minuna
Kaklase’t kakialung aganaka ku la
Kakung kayanakan decada saisenta
Ikaming mamialung libutad sabana
Kakawe keng ilog, manasan king sapa
Magpastul damulag, Karin king taldawa
Ikeng mamialungan, mandilu keng uran
Manugak, manasan, mumukyat tanaman
Mamanyutung kami babo kabundukan
Saka magburarul, patio ning pisamban
Itang simpli mung bie, parating gagawan
Ing maglutu-lutuan, keng kurang-kurangan
Dening bulung dutung, magtinda-tindaan
Perang kalapanti, makadapuk bikan
Keng lalam tanaman, magbale-balayan
At mipag-istoria keting palpabewan
Ing ayalbeng sine, iyang pisasabian
Kabang makalupung, keng tukuran eran
Ila reng pialungan, ing laban babagua
Aro, salikutan, teksing, tabak taya
Deng Olen ampon teks, ayo, siotong, goma
Maki-albe tv, abe deng barkada
Liksi ning katawan, iniang kayanakan
Malawut keng sakit, tutu keng masikan
Parating kakanan bunga ring tanaman
Tinaklub at sagin, tutu lang maniaman
Potang magaral na karin king escuela
Singku ya ing bakal, tutung mayulaga
Kaku yang gagawan baldug keng alkansiya
Nung ating bayaran, keti gamitan ya
Malawut escuela iyang lalakaran
Agyang alang sapin, iya ing puntalan
Kabang atsu dalan, kuentung alang tuknang
Ikami ing miras e mi amalitan
Masaya ing napun, ing bie yang masimpli
Maligaya ing bie, keta nang miliari
E mu na abalik, panaun ta ngeni
Salamat king Guinu, delanan ku ini.
(Meulip a bersu at amanu)
(Pamilaguma qng paniulung ning Amanung Sisuan)
Irvin Harvey Rivera
Siuala Ning Maliwalu/Anac Ning Baculud
August 18, 2018
E ku anting tanak o metung a byasa
Manundungang libru, pantas a Poeta
Bista man pin rugu at kakapkap ku pa
Anting bayubayung susulat Poesya.
Ditak kung kagiwan buri ku sa’ng dake
Karing Kayanakan magsilbi sa’ng gabe
Dapot nung ing nasa tibubus yang tune
Magsilbi na iting maragul a bage.
Nung atalus da sa king dimut dang isip
Ninu king Amanu kaya ing manyagip?
King pangalalumpawi na keti king sulip
Ninung mikasala, ninu la reng lasip?
Inya Kayanakan maguing matalustus
Sopan yu ke sanang mibwat kening kurus
King mayap a gampa at pusung tibubus
Karin ya mayakwa ing nasa ta’ng lubus.
Baltangan ta ya ing matulid a dalan
Pagluwalu ta ya ing Amanung Sisuan
Misaupsaup ta’ng ipuk ya kabilyan
Amanung malapit da nang buring patdan.
Kanita mayakit wagas ta’ng pigampa
Ing maguing bunga na ning pamilaguma
Ngara ping sasabi, ngarang magsalita
King pamisanmetung mamunga yang tula.
King malugud a kapanyausan nang koyang Bien a panimunan ke ing pamamye sampul keng pamanggale makabidyo , ngeni pu iyampang ke kekayu ing simpling pakibat ku ketang milabas a “Bulaklakan ” ning amanung sisuan , panupaya yupu nung ing ginamit ku “Sampagang Talayib” o kasi pu iyang binye ra kakung katulduan.
Bulaklakan king Amanung Sisuan
Neng : Patria Bondoc David
Talipampan : (Sampagang Talayib)
Balen ning Tarlac
“ Ing Sampagang Talayib “Sampaga kung alang lasa , é midugpan mariposa,
king kaluat kung manenaya , paninasan iyapa ra,
dapot pili lamu pala , retang nektar simsiman da,
inya ining kakung asta , é na meka-pibata pa.
É naku pâ mekibadbad , nuné meko na’ng linimpad,
ketang angin ku migsapad , nung nu naku angga sidsad,
anti ku mo’ng ayup sibad , linipo na kareng labuad,
inya suerti kupa mekad , é pa binang “sawing palad “.
Inyang misan mepagal ku , peynawa ku lual parnasu,
atin bibyung a dindam ku , ala kung male nung ninu,
biglang menabu la kaku , adwang pakpak a mapinu,
inyang umeng malikid ku … ini pala’ng Tulang Dapu.
“Pssst …pssst … kaluguran “! ngana , “saupan mukung munta keta “,
“O’bat “ ngaku naman kaya , “ ing palasyu ayan taya?”,
“wa magpaldas la “ ngana , “lagwa ,tara munta kata “,
para sabyan ku karela , ing amanu mabye yapa !
Ikeng adwang Tulang Dapu , luban mine sâ’ing emperyu,
O’neng ing bante soldadu , paluban man … ali naku !
kase … kada datang naku , magmausang yang e mu nanu,
inya kapilanman ngaku , é ya misut ing nasa ku.
Sampaga ku pin Talayib , alang banglu a kakatig,
metung ku pung kapanalig , é ko dapat payligalig,
Kapampangan a kayanib , keni’t keta magumasid,
mika atin man balakid , mangga mate é paylupig.
Metung pa pung abatyawan , pauli nang paraluman,
king banda naning amianan , maging dane ning aslagan,
pati ketang abagatan , angga na ketang albugan,
karin kula amatyagan , ding manyabing Kapampangan.
Daka’la pa’ng mangamanu , dapot dit man é yu tantu,
‘yang mariposang tubud yu , pili lamu reng sinuyu,
kabalik na keng palasyu , meniwala na kong tutu,
é pu mete ing amanu … yaku mismung magpatutu !
Pakisabi ku pu sana , Mal Ari ning Akademya ,
búlus mune’ing mariposa , ban manakit pang sampaga,
daka’la reng aliwa pa , é lamu reng keng maseta,
king sabana magbanda ya , atin karin manenaya.
Dapot nung é kayu bisâ , kanaku pu maniwalâ,
ala ku man pung agawâ , sayang namu’ing kakung wawâ,
inya’y Bombuan datang ya sâ , ‘ya napa ing manyalitâ,
kabang yaku mámún ku pâ … Mayap oras keko’ng sablâ !
Tsokolating Lagu-lagu
27 Eneru 2020
https://www.facebook.com/100004815136040/videos/1372737893521233?idorvanity=1973564689509992
Ing bale nang Donya Takya malapit ya king pisamban
inya balang ating Misa pilming e na sasalanan,
Anti mong metung a Donya, ‘tin yang sariling siklawran
king peka-mumunang diling makalapit ketang altar.
…..
belangcas neng Orly Manalo Dizon
Sucad: 6/6 silaba;
Talatad: 4 linya;
Estropa: 14 (labing apat);
Orthograpiang: C-K (ca, ke, ki, co, cu) ;
Jul 31, 2013; 16:15 hours
1
Kilub ning aldoldo a mangapaliari
King pibale-bale ‘ya ing magmantini,
Manibatan abac angga na’tang bengi
E biasang papagal ketang pamagsilbi.
2
Bayu ya pa sunlag itang aring aldo
Agiang puyat ya pa piragli neng ticdo,
Maglutung amusal, samasan ding plato
Ban ketang dulang la caring salusalo.
3
Istung casinup da detang pipanganan
Pamaglinis bale ya naman umpisan,
Caibat tipunan na marinat dang malan
Sabunan icula bayu ‘ti luglugan.
4
Caibat nang asable itang pinipi na
Tsaca ya mamalis king carelang mula,
Mandicut, manugtug mialiuang tanam da
Ampong sungkitan ding malulut nang bunga.
5
Detang ayagtal na dala no’t pisalî
Ketang lapag-lapag ban maging salapî,
Caibat lauen na la at cuentan piraglî
Ban paltang cailangan yang keang itukî.
6
Caring ayabli na sali yang ayasan
Pilan kilung asan at paltang cailangan,
Ketang salicap na layun nong puntucan
At tsaca ne ume bale nang tucnangan.
7
Ing carelang pagtuan manaya king bale
Ya naman ilutu king timpla iyapse,
Ita nang lugud na, caring catubale
King keang pamilyang pibandian nang tune.
8
Potang datang na la detang cayang anac
Ibat king escuela pauas da papatac,
At ing asaua nang sinarul king dayat
Itang nasi’t asan tana yang iyapag
9
Caibat na ning pagtuan ya na naman dili
Itang cayang gulut iyatyat ne iti,
At pangagising na tane man manulsi
Keta nang malan dang metastas na’t gisi.
10
Itang aring aldo bayu ya mipanpan
Manaliuang aske carin king albugan,
Tutuking lutu na ita nang apunan
Lutung kitmuan lugud macaganang mangan.
11
Bayu la matudtud, mitipun- tipun la
Arap na ning altar pasalamat Caya,
Ketang Ginu tang Dios Ibpa carin banua
Grasya Nang pigcalub at pangacabus da.
12
Cayaring mengadi ya naman arapan
Ing “black & white tv” iya ing pagtiagan,
Detang teleserye a susubaybayan
Caya iti munie ditac capasnauan.
13
Potang magkera ne diua na lilibad
Caya nang isipan ing tutuking abac,
Dala nang matudtud abe king paninap
Nung nanung manaya king aldo ning bucas.
14
Macanian dudurut ing patingapun na
Bie nang daralanan SULU NING PAMILYA,
Lugud na at lingap pane nang padama
Pusu nang busilac alang acapara.
May 9, 2023; DIZLAG FARM & RESORT
Neng Al Pedroche
(Alas cuatru ning abac)
Sasalingalngal ya qng banglu yng asali cung canangga
Bauan me at miras na ca qng ardin da reng sampaga.
Bote ya’mung maqui roscas yng ducanang quebilian na,
pablasang guewa niya’mu nitang matua qng Pampanga.
Ytang matuang dacal beluan mengamanu ya canacu, Ngana:
Emu bustan mipaburen yng pabanglung asali mu.
Yng canangga anti ya mong reputastyun na nin tau,
A e dapat mauala yng macayama ng banglu.
O niang misan alacuan queng alang tacap yng canangga,
Digpan de ring dacal lango, at carin mengalumud la.
Paruminggu yng milabas, niang balican que’yng pabanglu,
mesulasuc cu qng buluc da reng mengamate lango.
Yng quecatang pangatau calupa na ning pabanglu,
Queng metung mung lisyang guewa, maraoc na ca careng tau.
Sarya ca mang maganaca at sasaup careng malda,
Tambing na cang micasala uli na ning
Guewang lisya.
(Pons Sibug Mangalindan-Beltran)
Ninung cayabe cu qng pamagcasaquit?
Potang ing pusu cu mitmung paguinaquit?
Potang matula cu, pane sasagicgic
Ica mu Indu cu, cacu magmasaquit
Ica’ing aldo agiu cung talnan,damputan
Agiu cung caulan, e cu mapali man
Indu at matalic cung cacaluguran
Ustung cayabe que, e cu micarugan
Ing lugud cu caya, susucdul qng banua
Liguran na nacu, queta pang atian na
Sinese, dinagul anggang mekiasawa
Mumuna pang quiquiac, nung mica problema
Ustung masaya cu, masaya ya naman
Lugud a binie na, puru ngan catutuan
Sabla sablang bage, sacripisyu na ngan
Importanti caya, salese cabilian
‘Mama’s girl’ cu canu, ing aus da cacu
Mapaliaring tutu, ‘yang caluguran cu
Anac pang malati, importanti cacu
Itang tumula ya, ing canacung indu
Gewa cu ngan sabla ba ya mung tumula
Maski’ing asawa cu, balu na ngan ita
Anya sa’t ustung ating mangutang caia
Ninung maganaca caren ngang anac na
E ya man manisip, agad agad sabian
Ing catlu cung anac, y Edelwina yan
Anggang mangasanting cacu binie na ngan
Masqui mequiasawa, e nacu quelinguan
Nanu mang buri cu, agad na ngang babie
Ing lugud na cacu, lalapo, sasabe
Nanu mang problema, atiu ya qng lele
Ustung cayabe que, mitatabi’ing lumbe
Nanu mang binie na ning indu canacu
Paquicuanan cu ngang sabla ablasan cu
Ing lugud a peparamdam na canacu
Puru at dalise, ibat cayang pusu
Ala ne qng labuad, atiu ne cayarian
Ning malugud tamung Igpa a miglalang
Bista man ala ne, masqui na macanian
Paparamdam na pa, e nacu pabustan
Ngening aldo iti, oh canacung matua
Mabayat ing lub cu, panintunan daca
Happy Mother’s Day pu oh canacung Mama
Caluguran daca, cabang mabie cu pa
Ala cang cayanti, oh canacung Indu
Masqui tambunan da cu pang dacal guintu
Ing anggang pibandian, alang cuenta cacu
Ica mu Indu cu, ing pacamalan cu!
Iampang que pu iting poesiang iti qng pacamalan cung indu, y Mama cu, Ildefonsa Sibug Mangalindan – Beltran. Ma, wherever you are, always bear in mind that I love you soooooooo much! Your memories will remain in our hearts forever! Miss you Ma! Happy Mom’s Day!!!!
edel 5.8.23.ciudadsampernandu