manibat king aldo ing maimpis kung gaga
marandam ya inge keti king masala,
ot e ku atakman ing yumu mu uma,
at ing kaulan mu ku e gewang bitasa?
at angga king aldo minarap ku altar
ban munie kung tangu arap ning Linalang,
ala ka siping ku ban damdam munaman
king dagul ning tulang kakung panamdaman.
ngeni, ing panayan, migit na’ng par’minggu,
ining kekang apu akit na ne’yng yatu,
e ku rin panayan iyang presensia mu
ban munie sikan lub king pamangaina ku.
obat mangaina ku? nu ku wari manglap?
ita ing king laman ning likuan mung sulat;
mekad isipan mu, king pusung magsalbat
‘yang apamanda mu king maplas nang sugat.
dapot ing miliari, ing takut dinatang
king sulat mu kakung binasa nang tatang,
uling atiu karin ing kasasangkanan
obat agawa mung likuan mukung misan.
suatan daka wari king gewa mu kaku
uling ding labi mu e ko tikman yumu,
at ala kang pane ban neng payaru ku
takman ku ing paling babie ning salu mu?
e ku akalinguan, ngamu, “mal kung anak,
e mu sa’ pagkaimut kaku ing patawad
-bayu ka migising, nung meko kung agad,
iti ing patune ning lugud kung wagas.
“ninu waring indu ing malualas salu,
nung e ne ayuma ing sinta nang bunsu,
at e ne akaul aggiang pinandit mû
uling kailangan yang mamun dunut pusu?
“uling ing mako ku, ‘ya kabud paralan
ban ing kakung lugud kakung aparamdam
-i tatang mu anak, ing kakung lalakuan
a matibe saksi king nung na’ng katutuan….
“oini i tatang mo,” ngamu pa kanaku,
“e me papaburian -mangaku ka kaku;
king pamaglako ku ika ing lamak ku
a duruang laus lub king lugud kekayu.
“nung e raka lakuan, ika ing lumaut;
nung e ku mabating, ika ing malaus…
-ika ing pakibat karing gasgas kung tud
karing aldo’t benging maglambis ku king Dios….
“e ku man mu takman ing magin kung indu;
e man mu mapuyat para king bunsu ku;
e ku murin takman sumusu ka kaku;
alus e ku takman angga pamaglual mu….”
babasan nang sulat, tiknangan neng tatang,
e neman inari, lepunggus neng misan
pablasang melabug, keyang panimanman
pelalung suala na minina’t mengalgal.
inia king sulat mu makibat ku sana
ban lambisan daka’t pasalamat keka;
daranum kung mata, sana sapat nala,
-at magluang kandila arap mung lapida.
bista man ing takut, minapun king salu
a pota king lande delanan mu rugu,
ing pamanakbang ku, magkang mitalabu
at king kelan kalma karin ku manabu.
e ka megin maimut kanaku kanita,
nung e pin makanian e ku linto sana,
inia king kaddua nang ukdu ning istoria
-king apu mu e ku maging maimut keya.
angeles/manibaug
kabang mabiaje
