Sulung dinan mu kung busal, isusi mo ring labi ku,
Bulagan mu ing katutuan, ing kalayan igapus mu.
Yarap mu king pibitayan ing marangal a prinsipyu
Ing kikyak a katuliran isila mu king prisidyu.
Panusigan da ka buri… pagkanta ra kang Honsana;
Palakpakan dakang matni salbaganan kang sampaga;
Dukwan da kang anting Ari bista’t ing pusu kikyak ya
King sangil mung ipasari kanwari ra kang pagbiba.
Sabatan mu itang danum, itang ilug tabunan me
Ing agus na magmaratun, mawala ing keyang inge;
Ating datang a panaun potang iti kumasna ne
Lasaka’ne itang tabun …..maglapo ya’t makamate.
MALIKWATAS
Magic Poems
Nang: Jose M. Gallardo
Ing salitang malikwatas ya ing makuyad dang anyu ding salitang “malikmatang kawatasan”. Ing salitang “malikmata” ya ing katulid na king Amanung Kapampangan ning salitang “magic” king Amanung Ingles, at ing “kawatasan” naman ya ing tune nang Kapampangan ning salitang “poem” o poesya. Inya, nung ilikas ya king Amanung Ingles ing salitang malikmatang kawatasan o malikwatas, iti, mangabaldugan yang “magic poem”.
Ing malikwatas, metung yang uring poesya a e ra pa penangasan belangkas king insanu mang Amanu keti king mabilug a yatu. Abibitasa ku ing e ya pa milaganap at e ya maging pibuburian pakyapusan a anti mo ring “ode”, “epic”, “sonnet”, “elegy” at aliwa pang uring poesya. Ing sangkan king e na pangalaganap niti ya ing masakit yang gawan. E ing balang poeta malyari yang makapi-sukung o mibalangkas kareti, uling ing pamanggawa tutung maka-inip at kailangan pa mu ing gumugul kang makabang panaun at dakal a pamanisip. Bayu ka makayaring metung, sumira ka pamung dakal a papil king pamibayu-bayu at pamiyayalili karing salitang sukat magamit ban ayakma me ing kekang poesya ketang talagang kailanga’na ning metung a malikwatas.
Ing malikwatas, metung yang poesya-liriko a bibilugan da ding atlung estropa. Ding adwang mumunang estropa o saknung miyayagpang la king pamilarawan king metung a bage o king metung a sitwasyun, at ing katlu ya naman ing “twist” o kabalabat na ning lalarawan da reta.
Ing “magic” na o malikmata ning malikwatas ya ing iti malyari meng sagsagan, at ing balang kasagsag metung ya namang kumpletung poesiya. Ding mesagsag a ren pilibayan mong lugal at pisaniban pasibayu at maging metung no namang poesyang masalese panga-balangkas at e masisira kalamnan. King hegana-ganang yan, ala kang babayu o alilan agyang metung mang letra at kudlit (o “punctuation mark”).