Diklut a mialiwang alimbawang estropa

Posted on November 1, 2021 by inglibrarian

~Nung buri meng keka mostra
Ing pamanggogo aleya
Banten mo retang mitata
Patamban me ketang kawa.

~Panakit na keng milaing pusâ
Agad neng tegal palung batutâ
Oneng pangaras da ketang sapâ
Kabud na la biglang mikalilwâ.

~Istung ing masakit ya ing kekang batal
Agyang maranup ka e ka makapangan
Dimalas na ka mu nung tiempu ing ulam
Sigang sanang bangus ampong paro ulang
Lalu kang dumanup dumok pakiramdam.

~Nung ing dangwe mung paglatang ken meng alkohol binabad
Potang sindian meng pospuru pihu yang biglang kalabkab
E mu rugu pakalapit at pota deng mal mung irap
Bigla na lang mikaluku maging sangkan pang kabulag.

~Karetang maglolo, ala yang apili, kabiran o tulak
Nung i Totoy Batu, i Dorung Kuwad kaya, o’i Asyung Patupat
Ot misan a aldo, memanikan la ngan, karin mekitulsak
Pangaras ning abak, ing keyang prublema, mirinan pakibat.

~Bigla lang mikaras
Midaling pandalas
Kiluban dang sular
Ning pagloloang Pilar.

Posted in Poetisa Maria Sinucuan | Leave a comment

Panigapu

Posted on November 1, 2021 by inglibrarian



Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureado | Leave a comment

AKU IKA

Posted on November 1, 2021 by inglibrarian

Ika

wa ika

Ika
ing sabla
king bie ku

ika
ing tula
aldo, bulan, batuin
babie pagasa neng malugma

ika
ing lugud
at pastul ku
manayid, tatalan karing gamat
at magsantung king bunduk Alaya

Ika
ing pantas
at watas Capampangan
a alang sawang gagambul
king sabing menan mung keragulan
a malulumpawi na uli ring kayanakan

ika
wa ika
ing sabla, tula
sinta at pastul ku
manayis king pluma’t kukudtang makabersu
Wa aku Ika talakad me’ng bandera
Ding kababainan a magdilidiling lilingap king pamilya

Ing Babaing Matun
Nov. 1, 2021

Posted in PL Kate Lapuz, Poeta Laureado | Leave a comment

“DETA NANG KALADUA”

Posted on November 1, 2021 by inglibrarian

“DETA NANG KALADUA”

  1. Dapat lang pangadi, deng quecatang mete
    King balang primero, bulan ning Nobiembre
    Bilang pagmasusi, ca-aldon ding mete
    Itang ipangadi, ing carela ibie
    Pagsadian ta la sa, nung nula miamle
    At iparamdam tamu, pacamal ta’ puge.
  2. Ing pamicalugud, queng metung pamilya
    Diden dang meoras, lugud padama da
    Caring meangu bie, iniang mabie la pa
    Ila ding santungan, nung atin problema
    Inia marapat mu, denan lang ulaga
    Mangading taimtim, ing ibie carela.
  3. Dacal quecatamu, muntang camposantu
    Maniric candila, pangadi lang ustu
    At tsaca ibulung, anting mayap tau
    Itang pacalulu, ning Dios Ibpa tamu
    DETA SANG KALADUA, quetang purgatoryu
    Munta at miras la, Caiarian ning GINU.
  4. Itamung mabie pa, macanian mu naman
    Queca tang pagsadian bucas pang daratang
    Nung datang man itang, bie miangganan
    Ita nang DIOS IBPA, queca NANG agcatan
    Y Apung San Pedro, ing sana tanggapan
    Ampo ding’gang Angel, queca sagana ngan.
  5. Cacu yang idagdag, cutang king sarili
    Pansinan ya’ng tau, a cayang ugali
    Nanu man ‘tang bage, caya macauili
    Maqui paglulu ya, at e me atauli
    Puera mu king metung, ing cacung asabi
    Andap na’ng pisabian, king ornu salangi

Belangcas Neng Orly “Orlan” Dizon,
31st October 2013, 16:35 hours,
Manama, Kingdom Of Bahrain.

Posted in PL Orly M Dizon, Poeta Laureado | Leave a comment

Bunduk Mayon

Posted on October 31, 2021 by inglibrarian



Nung munta ka Sorsogon makasaken manibatan Menila, makapakodak ka keng dalan arapan ning Bunduk Mayon, antimo ing gewa ning makaletratu keng larawan. Alus apulung oras ing biyahe (migit-kumulang 500 kilometru) manibat keng Menila bayu me dasan ing Bunduk Mayon nung magmanehu kang alang tuknang. Neng kaleldo akit meng masala at malino ing alus perpektung konikung ugis ning bunduk subali kareng paritak-ditak a ulap.

Ing Bunduk Mayon aktibu yang bulkan at makatapilan nang memakbung tauli pamu ketang 2018. Atin yang katas a 2,463 metru (8,078 pie). Makatikdo ya malapit keng siyudad ning Legazpi, prubinsiya ning Albay keng parting Kabikulan. Popular yang pasyalan da reng turista pauli ning malagu nang aske at pante konikung ugis kabilugan.

Posted in Kalikasan, Karen A'Richard | Leave a comment

Pamaglualu’t Pacalulu

Posted on October 31, 2021 by inglibrarian



Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureado | Leave a comment

NANU YA ING KALUGURAN

Posted on October 31, 2021 by inglibrarian

Nanu ya ing kaluguran? Ing kaluguran a tune
Katuglung yang pangisnawa, kataid ne ning kekang bie,
King ligaya at pagmalun iti keka yang karame
Agyang datang pa ing bagyu e masira’yng pami-abe,
Sopan naka king kabigwan, kasulu me king tagumpe
Makanyan yang kaluguran nung tapat yang maki-abe.

Nung sakali akit nakang tutuntun king lisyang landas,
Yawat naka at tairan ketang parasan a mayap
Ban kanita emu dasan ing lumbe’t pangapahamak
Pablasang nung tumangis ka, muna yang keka magsalbat,
Makanyan yang kaluguran daig ne pa ing kapatad
Nung atin kang panandaman king sarili na kakablas.

Nanu ya ing kaluguran? Nung tutu ya at malugud
Ketang kekang kagulutan Angel ya waring tatanud
Magbante ya balang oras nanu man ing kekang kimut
King matsura’t maling bisyu kanita e ka mayabluk,
Nung sakali king kaskupan akit nakang makabaldug
Sagipan naka’t isaka ban keta e ka malumud.

Nanu ya ing kaluguran? Iti e ya bante kuran
Agyang kaya migulut ka e ya maging kaligiran,
E anti ing sarul gamat pane nakang kakabiran
Potang ala neng akakwa ngana marok ka gagawan;
Lipit ka man king bili mu e naka rin painggulutan
Makayan yang mayayakit… ing tapat a kaluguran.

BABAING MATUN/ 12/26/14

Posted in PL Kate Lapuz, Poeta Laureado | Leave a comment

Kagli

Posted on October 31, 2021 by inglibrarian

Kagli
Lorung Malabit
Silaba 12 Sesura 6/6
Taladtad 4 Estropa 10
Adle Kapusungan (satire)
*
Maging tutu wari, ing awsan dang kaglî?
Mekeni kapatad, surian ta sagulî.
Nung atin mituran, iyan e ku burî,
pakalyan ku lamu, ring malungkut bilî.
**
I Sayung pengagli, re king burung mangga.
anggiang pang mayli ne, maslam ya pa lupa.
Lakuas na pa potang, medyu danupan ya,
anti yang mimilup, purung aslam sasa.
***
Ing indu nang Tina, aniang yang kakaglî,
king mapaling tidtad, asne king kaburî.
Aniang mibait ne’t, king bale re yulî,
itang kayang lampin, iya mung maputî.
****
Pengagli ra neman, king burung tilapiâ,
ing siping kung baleng, makilagyung Selâ.
Ania ing asbuk na, ibuklat niang bagyâ,
anti yang mamatut, king buluk na wawâ.
*****
Karing bumberu ne, pengagling inda na
itang kaklasi kung, awsan ta na’ng Maria,
ania ini ngeni, potang manyabi ya,
mandilu kang wawa, anggiang malaut ka.
******
Tutung maburi ya, king kamuting bagin
aniang ing indu na, pangagli ne’y Martin.
Meragul ya pin sang, milalu kasanting,
king buluk na atut, pilmi kang maduling.
*******
Pengagli ra ne man, king barakung bibi,
itang tau Porac, a awsan dang Gani.
Aniang meragul ne’t, migbayintau’y ni,
pangasawan no ring, bibing malilili.
********
Asne king kayamang, makiramdam radyu,
aniang pangagli neng, inda na i Cielu,
ngeni daig no pa, ring tv at diaryu,
balu na ing sablang, indredus king baryu.
*********
Pengagli da ne man, kang Leila De Lima,
Itang tau Lubao, a awsan dang Buda.
Aniang meragul ne, at meging dalaga,
bagya na la kapad, ding sagin a saba.
**********
Pututuan ku ne pa, keni ne mayarî,
ining kapusungan, a pitayitayî.
Pota ikutang yu, itang e ku buri,
uling e ku sabian, nung nu ku pengaglî.

Rodel E. Gozum
05 Septiembre 2019
Munoz, Quezon City

Posted in Komidya, PL Rodel E. Gozum, Poeta Laureado | Leave a comment

Misyung Sukat Gampanan

Posted on October 30, 2021 by inglibrarian




Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureado | Leave a comment

King Aluntiang Marangle

Posted on October 30, 2021 by inglibrarian

Adle: Malikwatas

Marakal naka ayaswe, aku ume pang tumalas
King aluntiang marangle, nung nukarin ka mandaras
Itang dikut pinyabungke, nya memanulu ka pawas
King banda ku mipalawe, kabang maglinis kang lawas.

Likwan mu’ing kekang gagawan, telasan mu itang burak
Inyang kekang abatyawan, king pilapil misalampak
Mebulus la ding dadalan, detang apadwas kung tugak
Miglundag la king dikutan, atin pang mitagan ditak.

Bayung bengi ‘ting kakatuk, ing lagyu ku kukulayit
Makiabe pa mong pasyuk, inya king pasbul linapit
Inandu ke ing pamukpuk, kabuklat ku ikang ikit
Ngaku, lungub naka’t lukluk, at tiniman kung malagkit.

I kasagsag:
Marakal naka ayaswe
King aluntiang marangle
Itang dikut pinyabungke
King banda ku mipalawe

Likwan mu’ing kekang gagawan
Inyang kekang abatyawan
Mebulus la ding dadalan
Miglundag la king dikutan

Bayung bengi ‘ting kakatuk
Makiabe pa mong pasyuk
Inandu ke ing pamukpuk
Ngaku, lungub ka at lukluk

II kasagsag:
Aku, ume pang tumalas
Nung nukarin ka mandaras
Nya memanulu ka pawas
Kabang maglinis kang lawas

Telasan mu itang burak
King pilapil misalampak
Detang apadwas kung tugak
Atin pang mitagan ditak

Ing lagyu ku kukulayit
Inya king pasbul linapit
Kabuklat ku ikang ikit
At tiniman kung malagkit

Pilibe lugal:

Marakal naka ayaswe,  aku, ume pang tumalas
Itang dikut pinyabungke,  nung nukarin ka mandaras
King banda ku mipalawe,  kabang maglinis kang lawas.

Likwan mu’ing kekang gagawan,  telasan mu itang burak
Mebulus la ding dadalan,  detang apadwas kung tugak
Inyang kekang abatyawan,  king pilapil misalampak.

Bayung bengi ‘ting kakatuk,  ing lagyu ku kukulayit
Inandu ke ing pamukpuk,  kabuklat ku ikang ikit
Makiabe pa mong pasyuk,  inya king pasbul linapit
Ngaku, lungub ka at lukluk,  at tiniman kung malagkit.

Sinulat neng Babaing Matun
Balen ning Mexico
1/7/16 12:42 ning kaugtuan

Posted in PL Kate Lapuz, Poeta Laureado | Leave a comment