nung sabian ku kayang mibalik ka kaku, magparalumpu ku keng kabitisan mu, mulingid ka kaya king maging aklis ku? mibalik ka kaya kakung pasibayu? nung sabian ku kekang ibat king meko ka, ing uran ali na pepatugut digpa, mibalik ka kaya ban e ne sumala a saslag ing aldo kening kakung lupa? o pota ing dalung kaniang kabitisan e me man sikasuan o pakirandaman, nune malaus pang kekang panyikaran ban e ra nakamu bitasang lapitan? –kalulu kung ustu nung ita maliari, –malasi yang lakuas ing pusu kung ini.
Mamayutput la sa pamamunga Ding dayang kukuri king Amanu Ban panyatang ning gatpanapun da ‘Ting libe kang Indu mieng sakoru. Dapot ika’ng libang king sarili Minggastarul at migpakasaklo Ing pamagsupil king Manang Sabi Peimburisan mung manibabo. Ika ngening asbuk na ning yatu Kabud mung simpara ning tagsibul Nanung panguntarian nang Indu mu? Nung ika’t-ika’ng bukud mung tungkul? –Tingiran me’t pibule-bulayan, –Tagulele ing Amanung Tibuan.
o ba’t mo reng tau pilit lang guguniat? o’t papagalan do reng karelang gamat? ing mumunang sangkan e neman mabayat, ita ing ban la mung makasalud kaibat; ing bulsa ing sangkan nitang pamanguniat.
dapot ing guniat da reng kadduang pengari (a kareng guyabnan karin pakiyanti), rening kayanakan napun man o ngeni, itang ban keng ustung daklat e malili ban magin lang mayap a memalen deti.
deni, aggiang ngeni tituladu no ngan, bala-balaus lang mantun pang kabiasnan, uling king panaun (at keng salukuyan), ining teknoloya dapat dang sabayan ban e la malakuan dening tuturuanan.
mebayat la pusan iniang keng obra ra, itang pamamarug iyang mibawal na, pablasang ing anak a tuturuanan da e re man abarug o arin parusa magtas ya man bosis o suala karela.
osimap namu pin aggiang makananu dininan nong metung aldo ning gubyernu a pamagmasusi ban din dong kasuelu at kilalanan da ing pagal ding tau a mapibabata kaniting opisyu.
wa man, e ku yapse mitmu lang sipagan ban ku la mung itas bangku at kabilyan, nune iting sipag tutu dang kailangan, at iti ministil keng liban larangan a abak ing bengi, iti, e mu misan.
nung e namu uli ning lubas a bulsa mekad metung ku ring kuyug ning pisara, uling ini metung matas klasing obra inia pin ing puge babie ku karela, duruku ku kanuan king pamibata ra.
at ngening aldo ra rening talaturu, ngaku pin sasabi, ati ku duruku, at pasalamat ya ining kakung pusu a e ra gilutan iyang pamanuru sumangid ning bulsang marayung kumatmu.
pablasa, ngaku pen, nung guguniat la man e uli ning bulsang layun da mung lamnan, nune king ukul da, rening kayanakan ampo reng pusu ra reng layun tamnanan mayap panugali ampo pang kabiasnan.
inia ulitan ku a sasaludu ku, keng layun dang mayap kareng anak tamu, inia pin salamat keng pamagdebotu at pamiraun bie kaniting opisyu, bindisiunan Na lang pane sa’ ning Guinu.
Karin barrio ning Malonzo, malaut king balen Bamban, Lalawigang Tarlac, atin anam o pitung kilometro itang sukad, nung ini iyang sukdan. Dening anak a magaral, kareng kamag-anak makituknang. O kaya naman, sisiro ya pa ing aldo, lumakad ne at baltangan, deng pilapil ning taldawa, ilog Parua dalakitan, potang miras ya king escuela, angus-angus ya pangisnawa, o mabasa ya keng pawas, o mebasa keng ilog nang delanan.
I Corazon G. De Leon (ing tutu nang lagyu) masipag yang magaral, atsu ne keng intermediate kanita, aldo aldo yang lalabas karin barrio, ban kanita iyang makapagaral, e ne man bisang manatindi kareng kamag-anak na inia e ya bisang makituknang at metung pa ing buri na asosopan no reng pengari na keng pibale-bale ra.
Atin escuela king malukang barrio dapot ini, metung yang primarya, at multi grade ya pa. Nung dadagul ya o maglapo ing ilog Parua pauli ning uran ampon ing albug, e la makadalakit deng talaturu, inia dening anak a magaral mipapabustan la, o nung ing talaturu ya ing makulung keng albug, karin ne mu matudtud king escuela at didinan da ne mung pamangan deng tau.
Megaral ya l karin Banaba Elementary School, iniang 1967, l Corazon, kaluguran de reng maestra na. Maranun pa lalabas ya ban iya ing makapagaral, at pangaras ning gatpanapun, agyang mirarasnan yang sisilim, mumuli ya king barrio Malonzo.
Atin yang maganakang maestra l Corazon, iya l Madam Flora Manuel Castro, 97 ne idad ngeni, malagu ya at malam, banayad yang magsalita, maganaka ya at malugud, agkatan ne pa l Corazon na iyang tuknang karela ban asaupan ne keng pamagaral at ban kanita e mapagal keng lakaran at makapagaral ya pang ustu, dapot e ya mu mebisa l Corazon keng panagkat ning maestra na.
I Mam Flora neng tuturu ya gagamitan ne ing pusu na, iyang kipmuan king lugud at pakamal kareng a disipulo na. Inia tutu reng kaluguran. E ya biasang managkas, e ya biasang magbuwisit, parati yang makatiman, at ing lupa na malualas ya.
Misan a aldo, iniang mamaus yang lagyu ing talaturu kareng anak a magaral, inaus ne l Corazon De Leon, “absent ya pu” ngara ding anak. At kaibat ning “roll call”, sinundu da ing pamagaral da. Tutuking aldo, ala ne naman l Corazon, at kilub na ning parumingo,, e ya lulub l Corazon keng klase na, at migaganaka ya ining maestra na kaya. Ngana ning maestra na, “ninanu ya kaya l Corazon? ” “e ya kaya mesakit?” Bakit e ya lulub kening klasi na?
Pangaras ning Sabadung abak a maranun,Ginayak ya l Mam Flora at linabas ya king Barrio Malonzo, agyang iyang dili, telasan ne ing malualas a ilog Parua, pibata na ing pali ning aldo, biltangan no reng pilapil king asikan, lekaran ne ing masukal a lugal at penalumduman ne king barrio ing kaluguran nang anak a magaral, l Corazon,
Sabian mu pa keng barrio, mikila-kilala la reng tau at memaryu, Mengabigla la reng memaryu kabud ikit de ing maganakang talaturu, uling kilala de reng memaryu at binie ra kaya ing kagalangan at saka re kukutnan de reng memaryu, “nukarin kayu pu menibat? Bakit kaburak yo? Mekibat ya karela ing panintunan ne bale l Corazon de Leon, “nukarin ya bale? ” ngana at tiru de bale l Corazon.. Inantabayanan de rening akutnan at pintalan ne king karela.
Kayakit na kang Corazon ning maganakang maestra, kinaul at inuma, kaibat, pekisabian no reng pengari na at saka ne pekisabian. “Ninanu ka ‘nang? bakit e ka lulub, ninanu ka?”
Ing manene nang kukutang.
Mekibat ya l Corazon, “bisa na ku pung tuknang magaral uling malaut ing lugal mi at mapagal naku”, “karas ku keni dadalumdum na at maranun ku pang mamako kening barrio ban mitagal ku keng “flag ceremony ” pekibat na kaya.
Inaru neng Madam Flora l Corazon at inabluk neng magaral pasibayu. Masinsinan ing pamisabi da. Pauli na ning kasaupan ning maestra, mebisa yang magaral pasibayu. Mibalik ya king escuela.
Kauli na king pibale-bale da, kukutnan ne neng asawa na, l Tang Ellen Castro . . “Kaburak mo! Mommy” “Nukarin ka menibat?” Meili ya mu ing maganakang maestra, ngana, “king Malonzo, dinalo ke ing anak kung e lulub king klasi, linawe ke kabilian at nung ninanu ya”
Uling likas ya ring maganakang tau ing asawa, l Tang Ellen at aintindian na ing pakamal ning asawa kareng disipulus na, inagkat neng mengan, at epagan ne babo lamesa “balu ku mepagal ka” “mangan naka at painawa ka” at pegsilbian ne ing asawa.
Ngana, ning pengari nang Corazon, l Modesto de Leon, metung yang matenakang ortelano king barrio, kalako ning maestra, ” kayap na ning talaturung ini.” . . .”pegdulapan ne pa ing anak ku, ban akumbinsi ne pang magaral. Kaganaka na! Iyang asabi na keng sarili na at kareng kabaryu na.
Ating matalinong tau, iyang tutu nang mabeluan Ining metung kayanakan misan iya ing kitnangan Nung anti ya kayulaga, ini nang bieng pakamalan Pekibat na misnang simpli, “alang kuenta ing bie tang mal”
Kening kaya nang pakibat, ini nang bie alang kuenta Pablasang bie niting tau, regalo yang ibat banua Atsu karening gamat mu, makananung gamitan ya Ika mismung mamie kule, ban iyang mika-ulaga
Ing bie na niting tau, keti babo ning sikluban Ing mididinan yang kule, kareng bage nang gagawan Nung gamitan ing regalu, ing talentung mipagkalam Keng mata da rening malda, makule yang pakalawan
Kabait ning metung tau, talentu na bibitbitan Atsu ketang kayang gamat, makananu neng gamitan Nung kabud na manenaya at ala ka mang gagawan Ing lumbug ne itang aldo, ing panayan e ya datang
Mamatiawan king aslagan, at saka ka mamigunam Makisabi king Dios lbpa nung nanu ya ing parasan E pabustan yang masayang ining bie mung pakamalan Tutung dakal ka agawa, lalu na keng kabanalan
Ing bie ning balang tau, iyang tutu nang makule Deng talentung mipagkalam, e pabustan ‘lang milele Tune ya ping mayulaga, pakamalan kaba ning bie E pabustan yang masira pakinabang yang miyugse
Mibait ka king masala, ika’ng tutung pagmulalan Talentu mu at gelingan, keting bie mu yang dadalan Pigkalub ning Mayupaya, manibat king kilub atian Inia iya ing ingatan, saka iyang pakamalan
Bie mu atin yang parasan, e naka kabud mabibie Meging bunga ka ning lugud ‘yumung lugud at dalise E sisiran keng e ustu, king basura karin yugse Iyang dinan mung ulaga, kabanalan ya masese
Ing mabibieng alang kuenta, iyang dinan mung ulaga Nung nanu man deng gawan mu, ilang lakuan mung istoria Keti babo niting yatu ila rening pisabian da Anting metung penikula, atin aral kayari na
Nanu man deng peninapan, kareng tau deng dinake Ilang tutung mayulaga ila rening babie kule Masanting ya at matsura, meyakit ya keni nang bie Kareni nang peninapan, maniaman ya ing tagumpe
Ing bosis mu yang marandam, agyang e ka magsalita Kareng gawa mung papakit ila rening mamalita Deng agawa mung kayapan, tune rening papawaga Kening bie mung adalanan, meyakit la ketang gawa
Metung ya mung paganaka, pakamalan ini nang bie Regalo yang ibat banua, ing Guinung Dios iyang memie Sinupan ya’t pakamalan, kalinisan manatili E pabustan midinatan, e kumupas keang kule
