Kapampangan Library

Deng apulung paganaka, ban ing bie yang positibu
Ila reni deng isipan, at itanam kening pusu
Balang aldo ilang gawan, ban sumaya ining bie mu
Ila rening makatuki, pagaralan nung ‘lang ustu

1. Misip ka pa bayu ka magsalita
   Keng amanung sasambitlan isipan la maka-adua
   Ban kanita e mitakid kening taung kasalita
   Makapulut ketang mayap, keng amanu a pawaga
   Aliwa itang kasiran at kening bie makasira
2. Panatilian malualas ing kaisipan
   Nanu ya man ing pisasabian ilualas me’ng kaisipan
   Ipabal ya itang ustu, deng aliwa pagaralan
   E sasara ing isipan, deng suhesyon ‘lang tanggapan
   Pigunaman at aralan at saka mo titimbangan
3. Pisabian la reng bage kesa maki-argu
   Dakal paksang pisasabian daratang keng piyamanuan
   E ka dapat maki-argu, ilapag me ing katutuan
   Gawan yang pipagaralan ban kasabi makinabang
   Mikawaning mikasundu, ketang mayap a parasan
4. Kaisipan a positibu
   Positibung kaisipan kening bie ta yang kailangan
   Makalawe king aslagan kipmuan ta king kapanayan
   Tune babie yang pagasa, at makabie yang sikanan
   Keng makanian a paralan, pamibiebie maging mayan
5. Magalang at mapinung mangamanu
   Kareng kasabi mung tau, bie karela’ng kagalangan
   Maka-anak o makatua, parati ya ining gawan
   Kasebian yang kapampangan kening isip yang itanam
   Alang taung malalaus, potang babie’ng kagalangan
6. Tuntun mayap kesa kritisismu
   E alako’ng kritisismo, kening bie tang pakamalan
   Arapan lang kipmuan tapang at ing mayap yang ipabal
   Itang ustu yang tuntunan, e malili ketang dalan
   Maging metung alimbawa, ika’ng dapat pamarisan
7. Igalang ing kapanandaman deng kaparang tau
   Dening taung akayarap ila reni deng igalang
   E sana panasakitan, lalu na’ng kapanandaman,
   Panikuanan me’ng intindian, nanu ya man ing kabilian
   Ban ing lugud manatili kareng pusu ning ninuman
8. E ka pakunsumi keng kapabayan deng aliwang tau
   Dakal tau reng pabaya, at problema ing daratang
   Potang ilang akayarap, ing kunsuminyang daratang
   Panikuanan yang labanan, saka iya ing turuanan
   Kabud iya ing asaupan, produktibu yang lalawan
9. Maging abala balang aldo ning bie mu
   Ing taung alang gagawan, iyang buri na ning diablu
   Kasebian yang ababakas a papabal kareng tau
   E pabustan alang gawan, milabas ya itang aldo
   Tutung ala kang apala, e ka maging produktibu
10. E mamasa o manalbeng negatibung balita
    Nung manalbe kang balita, at mamasang negatibu
    Kening kekang kaisipan, ilang atin nang epektu
    Ketang e mu kamalayan, mimina ka pangatau
    Ing sikanan mababating malili ka kening bie mu

Inia deni paganaka, ilang dapat tang isipan
Makabie lang sikanan lub kening bie tamung dadalan
Gabe la mung tutuntunan, ban ing bie mu e masayang
Potang deni deng gagawan ayabut ing kaligayan

nang:. PL Sergio Gramonte Calayag

Isipan ku deng manakit, keng sarili yang kukutang
Ba’t atin kung laurel buntuk, nanu kayang buring sabian
Anti ku mo kang Balagtas ing ari ning Balagtasan
Atin laurel keng buntuk na, poeta yang tatangalan

Deng poeta laureado, mekilala keng Parnasu
Keti babo ning sikluban, talagale lang akit mu
Ila mu ring talasulat, gagambulan ing amanu
Ban kanita e ya mate, keti labuad sinta tamu

Ing isip na ning poeta, iyang tutu ing maglapo
Kayang diwa a matalas, anting aping maglipato
Karin banuang misnang katas, ‘yang akit mung magpatilo
Anting ayup a agila, maglakbe ya’t susulapo

Dakal bage deng akakit, ilang adidinan nang bie
Keng panimanman ding al’wa, panakit da yang metamle
Agyang bulung a mebalag, milako ne ketang tangke
Adinan neng kabaldugan, bakit ini yang miliari

Balang akit ning poeta, deng mata nang mapanuri
Kasangkanan iyang sabian, bakit ilang atsu keni
Kabaldugan ipalino, alang laram ketang labi
Ing katutuan patutuanan, potang iya ing maniabi

Nung ing laurel kening buntuk, iyang akit makaputung,
Ing susulud poeta ya, laureado ya ning panaun
Basalios ne ning kultura keng amanu yang gagambul
Katapatan akit kaya, nilukarin man ya lumuyun.