Ing Amanu tamu

Posted on June 15, 2023 by inglibrarian

E ta’ na panayan datang ing panaun,
ing amanu tamu miras ya qñg aun,
at carin qñg aun, carin ya mandatun,
anggang malaus neng mitambunan gabun.

Inya naman sana sucat ta’ng mibule,
qñg cabilian na ning amanung mabule,
a mangaina ngeni a uaring mepile,
uling dacal suli, pilit deng lelele.

E tamu alingad iting malilyari,
ing amanu tamu magbaba ya uri,
uling dacal nala naman ding pengari,
ing amanung sisuan sisiran de puri.

Ing amanu tamu, amanu yang sacdal,
lingapan ta’ ya ngan, at dinan masabal.

E. P. D.
June 13, 2023

Posted in Amanung Sisuan, Mala-Sonetu, PL Eric Dizon, Poesia | Leave a comment

“peburen ku la mo galang”

Posted on June 15, 2023 by inglibrarian

deng aluang babai atin lang ugaling buri ra susuyuan,
o sabian ta na pin, atin lang senayan a maki kalokuan;
susuyuan mu nala, at ing sabla sabla, keka nang gagawan,
ot ing kekang tiaga sukdan da pa iti ampo pang subuknan?

tutu la salita reng matua kekami a ngara kanita,
istung linawe me ing metung babai kayi dinuku ya,
o kaya e naka aggiung agnananan o saganan mata,
siguradung iti, king lub na atin yang kimkim sinta keka.

apatunayan ku king dakal a besis, e mu misan kabud
king dakal besis kung tinalas king bage a ausan dang lugud;
potang lawen ku la, at deng kekeng mata akua ra nang mitud,
mangilag la lawe, reng karelang mata ana lang pangatbud;

ulatang e aggiu ing makibat lawe kareng kakung mata,
inia ring mata ra ‘yugse ro marayu, o kaya duku la
ban dong apangilag deng mata ra kaku uling isipan da
aulata ku la keng sasalikut dang kaku pamalsinta.

at uling balu ku keng pilubluban kung ing sintang mepuput,
iti mantun dalan, at iti, king lupa siguradung lumput;
ban kong apangilag mangasira kutis, aku nang minabut,
pero makanian man, susopan ku no pin, ila pang pakiput.

sinuyuan ku nala inia e ra naku mekad aggiung sisian;
peburen ku no mung mekasopas kaniang karelang kalokuan;
pemanuknangan kong pemaniuyuan kaibat pitu o siam bulan;
ngeni ing sinta ra a pemamuput ra memanalsut na ngan.

06/13/23 //10:01
kaibat mengan pepalto
***sukad: 18 silaba
***sesura 6/6/6
***apansinan ke pu ining poesia atin yang adduang istropang mitutuki a misusunis rima (ud ampong ut) inia linarin keng baggia; misingit kung metung istropa ban lang mikawani pamituki rening misusunis rimang istropa. iniang bayu bayu kung manigaral susulat, e ku sikasu ita pero kaluatan pengilagan ku na pu.

Posted in Babai, Bie, Capampangan Shakespeare, PL Tuazon Sabandal, Poesia | Leave a comment

Pamanigaral pamisukung sukung amanu o “Malikwatas “

Posted on June 15, 2023 by inglibrarian

Ing problema misan kanu / ume ya pin é mu nanu,
Miparikil ya man ke’nu / keka ya man o kanaku ,
nung kasing-sikan yang bagyu / é alisyan king prumeru,
king tutuking pasibayu / piyadian yang siguradu !

Ibaligtad ke pu pangasulat magumpisa ku lalam papunta babo.

King tutuking pasibayu / piyadyan yang siguradu,
nung kasing-sikan yang bagyu / e alisyan king prumeru,
miparikil yaman ke’nu / keka ya man o kanaku,
ing problema misan kanu / ume ya pin e mu nanu.

Pagumpisan ke pu bandang kapitnang wanan a 8 silaba papunta kayli a walu munaman silaba .

Ume yapin e mu nanu / ing problema misan kanu,
keka ya man o kanaku / miparikil ya man kenu,
E alisyan king prumeru / nung kasing- sikan yang bagyu,
piyadyan yang siguradu / king tutuking pasibayu.

Pibabaligtad ko pu reng 8 silabang mumunang kapitna .( half left side).. papunta lalam.

Ing problema misan kanu
nung kasing-sikan yang bagyu
king tutuking pasibayu
miparikil ya man ke’nu

Pibabaligtad ko pu reng 8 silabang kadwa kapitna .(half right side)papunta lalam.

Ume ya pin e mu nanu
e alisyan king prumeru
piyadyan yang siguradu
keka ya man o kanaku.

Pagumpisan kune naman pu lalam papunta babo reng kapitnang 8 silaba bandang kayli .

King tutuking pasibayu
nung kasing-sikan yang bagyu
miparikil ya man ke’nu
ing problema misan kanu.

Ing kadwang dake bandang wanan a kapitnang 8 silaba pagumpisan kepu lalam papunta babo.

Piyadyan yang siguradu
e alisyan king prumeru
keka ya man o kanaku
ume ya pin e mu nanu.

Anggiang nanan ko pung pibabaligtad maka gawa kung amanung misukung- sukung ( phrase) maski pemitna kula libutad at pisuglung-suglung pasibayu , ala kung binayu o elilan kareng amanu .

Patria Bondoc David
(Tsokolating lagu-lagu)
11 June 2019

Posted in Malikwatas, Poesia, Poetisa Patria Bondoc David, Uncategorized | Leave a comment

KASALESAYAN YANG BALIKAN

Posted on June 15, 2023 by inglibrarian

nang: PL Sergio Gramonte Calayag

Makalunus, makalunus, iyang tutung maliliari
Pakamalang tamung bangsa iya ini’ng pisawili
Itang diwang makabalen, bakit ngeni melumpawi?
Mababating yumung lugud, pati keti nang sarili.

Keng milabas a panaun, kasalesayan balikan
Dening megi tang bayani, katimauan pakilaban
Laban karetang dayuwan, manalipit, manalipan
Tatalakad keng matulid, iya ining pakilaban

Karin parang ning lamutakan, e ginulut keng labanan
Dadaun de ining bie da, para kening katimauan
E pa’intulut madamusak, ining laya’t karapatan
Uling iya’ng Pilipino, mikilugud king balayan

Bakit ngeni maliliari?, pakamal yang mababating
Alang lugud keng milabas, alang aral mang katiting
Kening bangsang pakamalan, anting duldul a memaksing
E pabustan yang.mawala, at sulapo ketang angin

Keng social media menalig, ala na’ng pamanyaliksik
Katamaran pairalan, e paganan itang isip
Ala na’ng pamanimbangan, kuntentu no keng akakit
Mewala na ing masabal, pati na ing malasakit

Ninu kayang migkulangan, bakit kaya mipakanian?
Talaturu keng escuela o pengaring pakamalan
Manimuna keng gobierno o reni nang mamuntukan
Nacionalismo mebating, O iya namu ing pabustan?. . .

Posted in Para Balen, PL Sergio Gramonte Calayag, Poesia, Poeta Laureado | Leave a comment

Lumual Na Ka 1 & 2

Posted on June 15, 2023 by inglibrarian

Lumual Na Ka 1

Mala-soneto
Lorung Malabit

*
Balu kung balu mu a yaku balu ku,
ania asno kalyap, kaku ring mata mu.
E mu no tutulid karening kanaku,
ustung lawen kula, lilisya mo kaku.

**
Mekad e mu buring kaku yang abasa,
king kapamilatan da, ing laman ning diwa.
Anggiang balu mu nang, balu ku na pin sa,
e mu pa imbut ing, lumual king masala.

***
Dapot o’t kailangan, mung ilingad kaku,
ngening balu ku na, ing sasalikut mu?
Kawlan ku naman ing, kekang pangatau.
Uling ika iyan. ‘yan ing tanggapan ku.

****
Ilukas mu ne ing maung mung pantalun,
ing pamagpalda mu, miras na’ing panaun.

Lumual Na Ka 2

Mala-soneto
Lorung Malabit

*
Balu kung balu mu a yaku balu ku,
ania asno kalyap, kaku ring mata mu.
E mu no tutulid karening kanaku,
ustung lawen kula, lilisya mo kaku.

**
Mekad e mu buring kaku yang abasa,
king kapamilatan da, ing laman ning diwa.
Anggiang balu mu nang, balu ku na pin sa,
e mu pa imbut ing, lumual king masala.

***
Dapot o’t kailangan, mung ilingad kaku,
ngening balu ku na, ing sasalikut mu?
Kawlan ku naman ing, kekang pangatau.
Uling ika iyan. ‘yan ing tanggapan ku.

****
Ilukas mu ne ing palda mung makuyad,
pantalun na ngeni, ing kekang pasukad.

Rodel E. Gozum
12 Junio 2023
San Simon

Posted in Bie, Mala-Sonetu, PL Rodel E. Gozum, Poesia, Poeta Laureado | Leave a comment

NGENING ALDO NING KATIMAUAN

Posted on June 15, 2023 by inglibrarian

nang: PL Sergio Gramonte Calayag

Kaku yang sinabit, tulid nitang eran
Ing bandera tamu, deng tau lalawan
Tutu kung pawaga, aldo Katimauan
Keti Pilipinas, ing bangsa tang tibuan

Mayayakit ngeni, kareng kayanakan
Ala nang pakamal ketang milabasan
Babale- wala ra, ing kasalesayan
Itang ulaga na e da na lalawan,

Nung balikan taya, istoria ning napun
Dakal akuang aral tutu lang manayun
Deta nang bayani, ing bangsa pagtanggul
Makasadiang mate, mipase keng gabun

E bali ing mate, akit sang malaya,
Pauli ning lugud, makamal tang bangsa
Lugud at pakamal, iyang meging nasa
Katimauan keti, king babo masala

Milako ulaga, ining agisingan
Lugud keting bangsa e na gagambulan
Uling iyang leko ing kasalesayan
Ini yang akakit metung kakulangan

Ngana’ng presidenti, bangsang America
Milabas balikan nung nanu’ng istoria
Nung alang kabaluan, alang pamagsadia
Mamarap king bukas, kanawan ing dala

Kaku yang sinabit, ing bandera tamu
Bilang paganaka anting Pilipinu
Ing mayumung lugud palablaban tamu
Bustan mikaluku, manibat king pusu

Kening simpling bage, misan e lalawan
Ita nang milabas, e na pakamalan
Inia gigisingan, ining sintang tibuan
Aldong Katimauan, iyang pagmasusian

Posted in Para Balen, PL Sergio Gramonte Calayag, Poesia, Poeta Laureado | Leave a comment

SIMBUL

Posted on June 15, 2023 by inglibrarian

Makuyad A Poesya
Irvin Harvey Rivera
Siuala Ning Maliwalu/Anac Ning Baculud
January 8, 2018

Luid ka at mipuri oh kakung balayan
Sinlag ne ing aldo king dane aslagan
Dintang ne’ing panawu’t keka mung tangalan
Ing mayumung bunga nitang katimawan.

Libutad na nitang kelan mung pagasa,
Atyu kang manangis, pipyak la ring mata
Busal na ning dulum atyu ka mibata
At pasibayu reng tinas ing Bandera.

Pablasang layun da e bala ing mate
Lunto yang matindag at misna king kule
Yang Banderang simbul pakilibe rang bie
Bang ing katimawan keka sa’ magsale.

King tepangan ampong daya rang pinatak
Binye rang matula at keka penaplak
Bang lubas ing lungkut king tula’t sagaksak
Oh katimawan mu—-‘bie reng anting lamak.

Balen siglawan mu mayap mung paintungul
At ing Katimawan yan ing mekad a simbul
E na ka tumangis a anti mong pungul
Libutad ning Benging mumuran, manuldul.

SiualaNingMaliwalu #AnacNingBaculud

Posted in Para Balen, Poesia, Poeta Irvin Harvey Rivera | Leave a comment

Nung sacali

Posted on June 15, 2023 by inglibrarian

Nung sacaling mabiasa cu, sumulat a cauatasan
Ing nasa ning cacung pusu, at ning cacung pilubluban
Ing kecatamung amanu, ya mu ing cacung pagsilbian
Ini ing cacung pangacu, king amanung capampangan

Ngacu king cacung sarili, ing maging cu sanang tapat
E cu bitasang tabili, king amanu ta’ng masampat
Ngeni mangga man king tauli, king mayan man o mabayat
Ing amanu ta’ng mal dili, yang iyapse cu’t isulat

Nung atin man macayatu, king cacung pamagmasabal
King kecatamung amanu, susubucan cung gugusal
Maging king pamangudta cu, e cu tumanggap a galal
Pablasa ing buri cu mu, ing amanu ta’ng pacamal

Nung sacali ing cacung bie, king daratang a panaun
Mangaina ne’t painaua ne, at malaus ne pin mamun
King canacung pamaglacbe, manibat king cacung aun
Maging la sa’ng maralise, rening canacung daraun

E. P. D.

Posted in Amanung Sisuan, PL Eric Dizon, Poesia | Leave a comment

MISAN ALDO KATIMAUAN

Posted on June 15, 2023 by inglibrarian

nang: PL Sergio Gramonte Calayag

Misan aldo katimauan, ing kanakung atandanan
Mayor Pedro L. Mendiola, mamuntukan keti Bamban
Ing mesabing kayaldauan tune iyang pagmasusian,
Ketang oras kayabakan, magawa ya ing tiuntiunan
Itas de itang bandera saka iya ing saluduan
Ating parada king dalan deng magaral yang abayan

‘ting amateur singing contest, pangaras na ning kabengian
Damdaman mu la kanita, dening dakal kayanakan
Ila rening mamakiabe papalista keng tiuntiunan
Mangasanting la reng bosis, iya ining pilabanan
Ikanta me ketang tonu, gitarista iyang tukian
Matenakang gitarista ining Basanio Sangalang

Anam nakung banua idad, tutung ali pa magaral
Ining malugud kung Tatang, ‘abe naku keng tiuntiunan
Kabud aku ing meyawus, ginale kung kawatasan
“Sintang Balen” ining kudta, inagkas ke keng arapan
Arap da reng dakal tau, ing dine ku yang lebanan
Gagaga ku at gagale, dapot e ku man tinuknang

Ing adanasan kang Tatang, tiwala na atsu kaku
Katalakad entebladu maili-maili I Tatang ku
Aku naman ing gagaga, arapan ding dakal tau
Inari ke ing poesia, e tinuknang keng gale ku
Akakit ku kang Tatang ku, tune pagmadagul naku
Mesikan ku pilubluban, kabang lal’uan I Tatang ku

Makanian kung mikadiwa keng kulturang kapampangan
Anak ku pa mung malati, tenam na ning kakung Tatang
Pepakit na at pepabal, ing amanu yang luguran
Manibat iniang anak ku, anting bini a mitanam
Kabud iya ing tinubu, sinesen ke at gimbulan
Alub namu e ya mate, bagkus iyang palabungan

Maragul ku pasalamat, kening megi nang kasaupan
Ning malugud kung pengari ining bini iyang tenam
Ing kulturang kapampangan kanaku yang pakamalan
E pabustan malumpawi, ban e mate keng sikluban
Inia metung talagambul, king amanu tamung menan
Alagad na ning kultura, manigobra yang gagawan.

Posted in Bie, PL Sergio Gramonte Calayag, Poesia, Poeta Laureado | Leave a comment

DENING PIPING SAKSI

Posted on June 15, 2023 by inglibrarian

nang: PL Sergio Gramonte Calayag

Letratu kung sepia tutung alang kule
Dapot keng isipan tutu lang makule
E la man kinupas atsu la king lele
Panaun linabas, ilang magapatune
Ilang piping saksi, nung nanu’ng miliari
Agyang alang asbuk anti lang sasabi

Metung paganaka, ketang milabasan
Deni nang letratu potang pakalawan
Tune yang babalik keni nang isipan
Itang makuleng bie, tutung adalanan
E la man bubulad, ala lang sasabian
Dapot migunam ya ining kaisipan

Agyang keng istoria, panaung lebasan
Ating magpatune, iya ing asaksian
Metung ing letratu ini nang babasian
Iyang magpatutu, palto ing katutuan
Inia mayulaga keng bieng pakamalan
Babie lang ligaya, kening pusung malam

Kabang ilang luluat deni nang letratu
Ita nang ulaga, tutu yang malino
Ing makamal nang lua, iyang mamanulu
Magus kareng mata, keng lupa manabu
Uling aganaka lebasan keng bie mu
Lalu’ng kapalsintan kalugurang tutu

Bakit mo makanian? makamal letratu
E la man sasabi, ing bie yang akit mu
Sulapo ka isip, iyang magpatilo
Karin babo banua, kasabi ing Guinu
Saka pasalamat kening delanan mo
Mebiasang linugud kareng parang tao

Posted in Bie, PL Sergio Gramonte Calayag, Poeta Laureado | Leave a comment