♦ Íng kapibábatan, ampó pa íng sípag, Kalidad lang taglé, ring tátang gúgunyat; É la sásaingsing, king sakit ning kalbag, ding takdeng púpúsan, king misna kabáyat.
♦♦ Kareng kapísí ra, ári la ring táta, Prinsipí la kareng, ának dang bábáyi; “Batman” at “Superman”, ilang kayantí ra, A pagdiuátan ding, ának dang láláki.
♦♦♦ Ding táta asyas lang, anting batung mabié, Síbul lang pikuánan, lugúd at tétágan; Dalig lang sanggalang, kambil lang matíbé, Giya lang antábe, anting paralúman.
♦♦♦♦ Ding táta bantug la, king pánga-tibúbus, At simbul ning lugúd, a é mapupúpus.
makaragul palang buntuk kaniang metung a lalaki ing dakal mamamanako pasimpling lawe kaniti; itang keng keyang sintingan tutung dakal lang babai reng mababaldug a pusu at maging ipus na niti. iyan ing panamdaman ku ampong kakung apansinan, inia pin ing sarili ku pilit kung pakiaguantan; pota dagul ya ing buntuk, kayi ing kamarinayan, pota iyang abating ku ampong pota akalinguan. keng pasimpling pamanako a daraptan da kanaku, ing pagtakan ku karening mamanako lawe kaku, ot bala mu e ra balu? bala mu kabud mung aku ing bukud a makibalu a panakawanan da ku.
05/11/23 //04:57 kabang panayan yang sikan matak danum ing giripu
Kanitang minuna, ing aldo ning layâ neng pagmasusian de, king kekatang bangsâ ing pamanalala, king tune nang diwâ king pusu ring masa, mapali pang binâ
Para karela ing, aldo ning kalayan pamangilala ya, ketang kadakilan ding bayani tamung, mekisalpitikan karetang kastila, a mapanalipan
Kanita ing petsang, a dosi ning Hunyu neng pagmasusian de, keti kekatamu ing lalto mensahi, king pusu ring tau pamisasanmetung, da ring pilipinu
Dapot ngeni kening, kanakung pamalak ing aldo ning laya, metung yang palabas ban ipakit tamu, mabilug a labuad a timawa ne ing, bangsang Pilipinas
sayang ing paninap, a meyalang kalmâ ding bayani tamu, a mibubung dayâ uling angga ngeni, e ta pa timauâ ketang alino ning, pagbitkil at lugmâ
ita’ng tanikalang, king balen migapus a kelikat da ring, kekata sinakup king angga man ngeni, e ya pa mepatlud o melubak mu man, king pangakulaput
Makasaklit ya pa, karing bitis tamu at karing batal da, ring pakakalulu imbis makalag ya tigik de pang ustu Ding aliwang sukib, a taung gubyernu
Uling ding mapilan, karing manungkulan pemulian da wari, itang kasangilan, kasakiman ampon ugaling lamiran da retang sinakup, kaniting balayan
Asabi ta kaya, ing timawa ta na’? nung e pa mimiral ing tune hustisya nung king kakaluluan, makagapus ta pa at e ya pa ganap, ining demokrasya
Kabang ing gubyernu, mistula reng pugad a daratunan da, ring mapanarampas Tune katimawang, pagnasan ta mekad angga nia rugu king, kekatang paninap
Iwagwag de kanian, ing bandera tamu king petsa a dosi, a bulan ning Hunyu keraklan ding akit, ta’ng mamanyaludu ILA pin ding “DAPUNG”, mikatawan tau…
Vhelle V. Garcia June 6, 2015 United Arab Emirates
Ing pamaki-ugne king Dios, iyang tutu nang mesira Pauli ning kasalanan karin Eden ya megawa Ining Eva at I Adan, e memintu king Dios lbpa Lebagan da itang utus, ing utus ning Mayupaya Ila reni deng mitabi, ketang lugal a payapa At kanita la mibagsak keti kakarinan ning lua
Bista man mikasala la, mayumung lugud e leko Ning Mayupaya tamung Dios, iya pa ining mengako Ing metung talapagligtas, ipadala kareng tao Kanita reng kaluguran ing misut lang pasibayu Ing relasyun a mesira, makumpuni ya’t mabuu O iya ing malarin at magbalik la king Guinu
Lalabas ya ing panaun, ing pangaku yang dadala Ini nang Talapagligtas, tutung iyang panayan da Iya na ngening inula deng propetang mangabiasa, Iya ini ing mibait, karin labuad ning Judea Bait ning metung a birhen, tune iyang sasabian da Ibat king lipi nang David, sasabian da ring propeta
Linabas ya ing panaun, ing panayan ‘yang dinatang Lilibangan ding animal ing maluka nang beitan Itang tala babo banua, iyang sinlag king katasan At ding pastul karin parang, migising la saka simban Dening taung mangabiasa iya namang pegdulapan Midaun lang mira’t ginto, at insensung misnang kamal
Sinese de reng pengari, meragul king kabanalan, Karin balen ning Nazareth, Nazareno ing kayausan Keng kabiasnan ampon beluan iyang tutung pagmulalan Anggang iya ing mengaral, sinagoga o keng dalan Tuturu na ing matulid at ini nang kaligtasan Escriba at Pariseo, e matula keng gagawan
Mimulat la kaisipan, dening taung makirandam Deni nang miki-upaya, iya ngeni ing kakamuan Inia iyang pegkanulu kareng bintang kalaraman Saka iyang peparakap, at dela re piyukuman Linitis de at perusa, keng e gewang kasalanan Mabayat krus pepapusan, anggang lugal pipatayan
Pauli king kamatayan, miliari’ng kapaglarinan Kamatayan na ning Guinu, pemayad keng kasalanan Ing mesira yang me-ulip at mibalik ing ugnayan Ugnayan na niting tau, king Dios lbpa tang miglalang Yumung lugud yang pepabal keti babo ning sikluban ‘nia luguran ya ing Guinu, pasalamat kaya yampang.
Nung sakali datang, ing aldo ala na ing lugud mu kaku E mu sasalikut, e ka mikakunu sabian mu kanaku Magtapat ka sana, bista’t man masakit iti tanggapan ku Kesa manalig kung, aku pa mu rin ing sinta ning pusu mu
Nung sakali, e mu, agyung sabian kakung ati’nang aliwa Lawan mu ku mata, kalupa ning sadiang miabe katang adwa Ding panimanman mu, ustung e da naku alawe maratna Apin ing tanda ning, kekang kayaduanan ban kang mitimawa
Nung saka-sakali, lakua’na naka ning bayu mung palsintan At ing kekang pusu, mantun yang karame ketang kalungkutan Atyu ku mu keni, ban mantabe keka king kalma mung disan Pablasang ing lugud, a keka binie ku alang kamatayan
Vhelle V. Garcia June 10, 2023 United Arab Emirates
* Anggiang makananu kung balikbalikan, e naya magbalik maski kapilan man, ing mengalabas nang buri ku sang bayuan, ban kanita sinta, magbalik ka naman.
** Paglasakan ku man pelalung ing banua, e na masamasan itang melasak na. Ing salu mung miuman kung ginabak sinta, anggiang samasan ke e ne masamas pa.
*** Ing pamagsisi ku bina nang mitawli, uli ning depat ku aniang pekatawli. Nung ikang inuna ku’t iyang tinawli, ala ku sang sisian ngening bandang tawli.
**** Ngeni, gumaga kung king banua man sukdul, sayang namu ing lua, metambun ne’ing kulkul.
Balen kung sasamban…! Potang mete na ku’t lubus nang payapa, King katahimikan makapaynawa na ing bye kung maluka; Ing kanakung adwan anting panalala king kaladwang mipda Kekayu yang basan ing “Tawli Kung Bilin” arapan ding malda.
Ing Mabatung Bunduk (Rocky Mountains, aka The Rockies), tayid-tayid lang bulubunduk a peka-galudgud ning karagulan a sistemang kabundukan, at maragul nang parti ning kapuluang North America. Karaniwan, ding bulubunducan a makakayabe karing Batuan (Rockies) mamatyat la manibat keng dane norteng Alberta at British Columbia dane-timog papuntang New Mexico, distansyang atlung libung milya (4,800 kilometers). Deng Rockies maka-saluput la kareng Great Plains dane aslagan, at Interior Plateau, Coast Mountains of Canada, Columbia Plateau and Basin and Range Province of the United States, dane albugan.
Ing Mabatung Bunduk atin yang e kumulang dinalan (100) a bulubundukan, makapitna kareng apat a tapuk:
Canadian Rockies and Northern Rockies of Montana and northeastern Idaho;
Middle Rockies of Wyoming, Utah, and southeastern Idaho;
Southern Rockies, mainly in Colorado and New Mexico;
Colorado Plateau in the Four Corners region of Utah, Colorado, New Mexico, and Arizona.
