Kapampangan Library

nang: PL Sergio Gramonte Calayag

Kayaldauan da reng tatang, iyang tutung pagmasusian
Ilang taung kipmuan lugud ,mumuna keng kabanalan
Malingap keng pamibiebie, alang kayang kapabustan
Masabal da’t malasakit, keng pamilya piyakitan

Metung posteng sakdal tibe, e ayugun, e agalo
Ing Pengaring talaanad, iyang metung a maestro
Ketang mayap, ustung dapat tatangalan yang modelo
Malugud ya keng asawa, e ya taksil, e maglilo

Tutung ena pikarine nung sasaupan ing asawa
Ketang pipian misnang dakal, o maglinis keng bale ra
Yang maningat kareng anak, o reng pinggan wasan na la
Yayabut ne’ng kayang gamat keng malagu nang asawa

Potang iya nang magsuweldo, iduang nala retang pera
Alang bawas, alang kulang ken makamal nang asawa
Kaya nala ring papasyal deng pakamalang pamilya
Tutung e ya magkulangan masikap la kening bie ra

Nung deng pengaring lalake, malugud la keng pamilya
Ining labuad tamung tibuan, alang sangkan mibagua ya
Miki- katimauan keng bie, at keng balen tamung sinta
Pauli da retang usuk, nitang malugud a tata

Keng kekayung kayaldauan, galamanu yang matigik
Pauli na ning lugud yu, lugud yu yang lalagitik
Muna ya’ng Mayupayang Dios keng pamilya mayayakit
Panugali mamalita, ing masabal yu’t malasakit

nang: PL Sergio Gramonte Calayag

Keti balen tamung Bamban, detang gintu panintunan
Dakal kareng kabundukan, ila rening pangulkulan
Kilub central at escuela, pati kilub ning pisamban
Mamagasang manakit la ban masenso ing kabilian

Ing panaun ampon oras, ‘lang patugut gugugulan
Alang akit kapagalan keng pa’ntunang kayamanan
Aldo’t bengi mamirapal , ing mangulukul yang gagawan
Tutung alang lang painawa, ing sumuku ali la man

Nung atin man tutung gintu ila rening panintunan
Angga ngeni ‘lang mamamin, ila reni deng atupan
Dakal taung mengalulu, at mibagsak la kabiayan
Pauli ning pamanintun, kareng gintung ‘tin kamalan

Atin dapat pagdulapan itang tune kayamanan
Iyang tune, ali peke, e kailangang pang kulkulan
Atsu kilub ning pisamban, ika namu ing panayan
Isiklaud la rening bitis, iyang akit king arapan

Ing Guinu tang Jesu-cristo, daig ne pa nitang gintu
Kayamanan ‘ting kamalan, ‘tsu karin tabernakulu
Yukaristiang pagmasusian, potang iyang tanggapan mu
Ketang oras ning komunyon, tanggapan yang buung-buu.

Inia dening mamagdulap, ketang tune kayamanan
Tutung alayu keng bunduk, dening Hapon pegsantungan
Atsu kilub ning pisamban, king komunyon tatanggapan
Akit mu rin keng pamilya, yumung lugud pairalan

nang: PL Sergio Gramonte Calayag

Ing pusu na nitang lma ampon itang kabuktut na
Ita nang karelang pulsu, potang pulsuan miyagnan la
Manibatan ketang atian, siam a bulan keng kilub na
Iyang batis na ning lugud, yumung lugud pupunla ya
Makanian ya’ng lndung Maria, keng pakamalang anak na
Iya ini ing iningat, ining anak kayang sinta

Ngeni naman pakalawan ing pusu nang Birhen Maria
Atin yang coronang suksuk, makatusuk yang espada
Itang kayang kabaldugan, sarili na yang magdusa
Manibat iniang mabuktut, anggang Karin king Golgotha
Pepakit na’ng keang lugud, keng pakamalang anak na
Iyang maibug maspak salu, keng beyatang dadala na

Ing pusu ning Guinung Jesus, atin milalablab api
Pauli ning keang lugud e mamatda at mapali
Yumung lugud alang kupas, iyang tutung manatili
Panayan deng pakamalan, at yayampang ing sarili
Ban misut ta king Dios lbpa, iya ining maging susi
Inatbus ing kasalanan ligaya banua ta muli
Yumung lugud a malablab mikaluku ketang pali

Ining malugud nang pusu nitang lndung Birhen Maria
Itamung pekitanguanan, manibat pa ‘niang minuna
Tune kaya menibatan, ing katawan ning anak na
At ing daya a minagus, keng katalindikingan na
A penatbus kareng tau, karin bunduk ning Golgotha
Lalam na ning krus a dutung, ing keang lua mamagus ya

Kareni nang aduang pusu, yumung lugud da maglapo
Kareng taung manandaman, lumapit ka ban mipasno
Pablasang ing malugud la, ing lugud da kakaluku
Anting api a mapali, iya ining maglipatu
Kasaupan da iyang aduan, at beyatan yang milako
Magtiwala ka karela, pilming Ika e mabigu