Aggia man balu cu, e cu metung uatas At lacuas cung balu, e cu naman pantas Dapot king diua cu, lulub lang maralas Deng amanu tamu, milalu king timyas Cuculyo lang mismu, king utac cacablas Managcat la cacu, king pamangalatas
Sasageseng daya, careng cacung uyat Ya ing manimuna, tutulac sumulat Aggiang nanung pacsa, ala ya sa’ng dinat Ing aske ning cudta, e ya sa’ marucat At careng mamasa, lunto yang masampat Ing maging laman na, apasyag cung tapat
Pusung Capampangan, cacu ing mitatac At king caisipan, mitanam king utac Ing Amanung Sisuan, luguran keng palac At e cu pabustan, mangasna yang burac Agyu cung paglaban, ing cayang busilac Dalise nang leguan, yang cacung gulisac
(luid kareng anggang ibpa ning pamilia a mibabata keng marayung labuad ban biyayan keng malinis a paralan deng karelang kaluguran a pamilia. luid.)
“nung para kekayu”
nu la ring gamat ku neng kailangan mu la? atiu la marayu…malaut la keka. nu ya ing salu ku ban sukuban sana? ala yu siping mu ban maging kasangga.
nu anti ing sakit a kekang delanan? keni king salu ku e mu atumbasan. ing sainsing mu at kiak, nu anti kasikan? mengaklak kung ustu, lakuas neng kaniglan.
balu ku e naku mibawi man baggia king pamagkulang ku king dalas kung ala, e ku na abalik ing tinulu mung lua a ginagan ku rin king e simpling gaga.
alang meging bengi keni king marayu a e kiak at siguk ing petudtud kaku, karas ganingaldo pilmi ing siklod ku king kalbit ning lumbe mangising kanaku.
dapot bakit kaya pilit pibabatan ining libung lumbe a kakung tatakman? ala pin aliwa, nune ikong sangkan… ikong pamilia kung king bale melakuan.
ing atiu marayo, kasakit na rugo, ing pamangulila e mu biru-biro, nung manamdaman ya ing sinta mung bunso, e ya’ libung sakit bibekut ing salo.
sige suatan mu ku nung king salu mayan, ing pamagkulang ku, kaku ngan aminan; ing pamangulila, pilit pibabatan ing kakaluluan ku e yu mu sa takman.
panupaya anak, ing karayu keka, ding kaul kung ala istung marimla ka, ampo ring uma kung king angin parala, ampo ing pusu kung keka mangulila.
pasensia naka sa’ nung pane yang ala i tata mung ipus king aliwang bansa, pablasang ala yang aliwa man nasa nung e ing iyapag, king malinis mekua.
dispensa anak ku, iko ning inang mu, titipun ku’ng ditak pagkabiayan tamu, keni marayu man nung ipusan ra ku, pibatan ku iti para ngan kekayu.
(meulip) sabandal 06/29/19 /01:55 am milingat ganingaldo
ing pamanlakad ta bilang metung tau a tàli king tipan king arap ning Guinu; ing lugud ku keka at lugud mu kaku, tarang pagmasusian, mekeni irug ku. nung balikan ku la reng aldo milabas, dakal lang masanting retang akit bakas, at sana dakal pang alakuan king bukas, at angga king angga, at mangga king wakas; karing aldo napun a kakung belikan, dakal mu rin aldo mitmung kasakitan, ing masanting niti, kabang babaltangan, matalik ka talan at e mu ku likuan, inia pin mekeni, at pagmasusian ta ing tipanan lugud anggang alan’angga.
* Aliwa na yaku ing kanitang aku bina nang maragul ing pamagbayu ku. Aliwa na yaku itang alipan mu, a kekang ginamit ampong inabusu.
** Itang pandurut mu karing kekang palad, at pamakarine mung e mu malagad, malambat neng ala, ikua nang misagad, e na ya makagyu king e ya bubulad.
*** Ing pemialungan mung mengaring dikuerdas uli ning balu mung lulugud yang wagas, metapang ne ngeni at megi nang masias, arapan na naka miras na ing miras.
**** Ining sasabian ku king arap salamin, potang atyu ka sa asabi ku mu rin.
Para king aldo kemataya’nang Gat. Jose Rizal..Ing poesia nang “Sa aking mga kabata” linicas ke king amanu tamu,..
Caring cacung kesing anac
Ustung ing balayan, malsinta yang tune king cayang amanung, ing banua yang minie sanlang catimauan, imbut a dasa’ne cayanti ning ayup, alapap maglacbe
Uling ing amanu, ya ing cayatulan king balen, king baryu at caring cajarian cayanti’t cabage, ning metu catawan ing sa’nu mang lalang, na nitang calayan
ing e mamacamal, king cayang amanu king asang malanam, migit ya pa bau inia matampa mung, liingapan yang ustu a cabas ning indung, mapamacalulu
Cayarle ning Latin, ing manang salitâ amanu ring angel, inglis at castilâ pablasang ing Guinung, mabelwan king sablâ ing caniti minie, pigcalam neng cusâ
Anti ring aliwa, ining sabing mana miki sarili yang alpabetu’t letra mebating ya iniang mirasan yang sigwa ing bangca king laug, canitang minuna
Sa aking mga kabata (Gat Jose P. Rizal)
Kapagka ang baya’y, sadyang umiibig Sa kanyang salitang, kaloob ng langit, Sanglang kalayaan, nasa ring masapit Katulad ng ibong, nasa himpapawid. Pagka’t ang salita’y, isang kahatulan Sa bayan, sa nayo’t mga kaharian, At ang isang tao’y katulad, kabagay Ng alin mang likha, noong kalayaan. Ang hindi magmahal, sa kanyang salita Mahigit sa hayop, at malansang isda, Kaya ang marapat pagyamaning kusa Na tulad sa inang tunay na nagpala. Ang wikang Tagalog tulad din sa Latin Sa Ingles, Kastila at salitang anghel, Sapagka’t ang Poong maalam tumingin Ang siyang naggawad, nagbigay sa atin. Ang salita nati’y tulad din sa iba Na may alfabeto at sariling letra, Na kaya nawala’y dinatnan ng sigwa Ang lunday sa lawa noong dakong una.
Karin Calamba, Laguna, ining lugal nang beitan Mika-isip ya’t medagul keng malukang pagkarinan Di Teodora at Francisco, pengari nang kaluguran Simple la mu pamibie-bie, bibitbitan ing kababan
Iniang malati ya’y Pepe ketang kayang kamusmusan Keyakitan neng talento, ing kabiasnan yang dadalan Ining lndung kaluguran, ginabe ya’t tuturwanan Balang turu titingiran, keng sarili sisikapan
Kabang iya ing magaral, iyang tune memagsikap Memagdulap yang kabiasnan kening bie na yang pigagap Nu man lugal ya mipadpad keng kabiasnan ya magdulap Pilming mumunang dangalan, parati nang atatanggap
Dening dayuan a Kastila ilang rening menabusu Sisikilan de’ng matulid, keni baleng sinta tamu Kapanandaman metagkil, sinulat yang aduang libro Ining “Noli Me Tangere” at “El Filibusterismo”
La Liga Filipina, ‘yang telakad nang aguman Ipaglualo ing justicia, para kening bangsang tibuan E aburi dening dayuan, megdusa ya king kulungan Saka iyang pepa-ugse, karin lugal ning Dapitan
Keni naman Fort Santiago, meparusa ya’t mekulong Saka iya ing linitis , keng kasalanan a “treason” Kamatayan meging atul, iyang binie rang desisyun Lugal na ning Bagumbayan, makamal bie, ‘yang dinaun
Iniang Deciembre a treinta, ing petsa ning kamatayan Ing megi tamung bayani, iya ngening darakilan Kabud bie na yang mesintang, king lugal ning Bagumbayan At king Paco, Plaza Dilaw, inugse re king kutkutan
Dening dayuhang Kastila, atin nasa yang supilan Uling kayang pakilaban, itang tune katuliran Pinukul ing maling bintang, puru la ngan kalaraman Iyang dekap at kinulung karin kilub ning sukulan
Deni nang Katipuneros kanita naman mig-aklas Tinalakad at linaban, gagamitan la reng tabak Dening karelang cedula, ketang mua ra yang pinirat Ilang agnan ginulisak king lugal ning Balintawak
Ing buri na sanang Rizal, itang laban alang dahas Gawan ya sang mapayapa, nung ini ya sang marapat Anya dening aduang libru, ila reni reng sinulat, Ketang e ustung palakad, kabalen deng mimulat
Y Dr. Jose P. Rizal, iyang tune tang bayani Inampang ne ing kayang bie, para karening kalahi Keng sarili e tinanam kareni nang menaglahi Mitimawa ya ing balen, ining bal’yan kayang kasi.
pilit kung pamilit sasaksak king ukul ing milabas naka kasara ning pasbul; at ing lugud keka pupus na at pasdul kaibat ning lugud mung timbunan king kulkul. dapot sasalangi at magdatun pane itang milabas tang pane rakang abe, at detang uma mung kaku pane binie, babalik dang pane ing tulang dalise. nanu pamo kaya nung ita tutu ngan at e mu king ukul kabud mamialungan? mekad king pusu ku lakuas makalinguan a tubas na pala ing sintang gilutan. keng ukul e mu na panuman pa sana ban nakung mitakas keng milabasan ta.
Atin kupung singsing , metung yang timpukan, a binye na kaku , ning mal kung pilsintan, kabang susulud ke , lungkut ing kakamtan, inya sa’t gewa ku , salikut ke bangan.
Wa , selikut ku ne , king kaban ning lugmâ , atsaka ke kunan , panga mika kalmâ , kasi ining salû , manangis yang dayâ , nung anggang kapilan , é ku balu yatâ.
King kabâ ning napun , migdusa ku’t kikiak , dening kakung mata , mistula nong pisak , ala nala yatang , akit anggiang ditak , ditak muman salâ , karas naning abak.
Ining malilyari , é ku abitasâ , ba’t ing dating siglâ , kabud na mewalâ , kabang ing lugud ku , pane kung pasualâ , oba’t angga ngeni , ‘me kupang gagagâ ?
Balikan ke saglit , ing singsing kung menan , ba’kuneng isulud , king metung a sangkan , kalinguan kuna pâ , itang milabasan , ing masayang bukas , yang kakung pamitan.
Ing singsing a mana , nung nu kune kenâ , é kune akit pa , kabud nya mewalâ , digdug ke’ing lamesa , sabe tinulu lwâ , susukdul king banua , king sobra ku kamwâ.
Ninu man manakit , king singsing kung menan, sana lingapan ya , anting pakamalan , kalupa ning lugud , a kakung inampang , ning kalulung pusû , pilit manambitan.
Sana maski misan , datang ing panaun , nung no’ya mikanâ , sopan yukung mantun, ‘giaman malalam ya , ketang pangatambun , agnan agnan tamung , kuanan ya king aun.
Misaupan tamu pung gambulan taya ing amanung sisuan , uling nung é tamu gawan ngeni , kapilan pa?..ditak ditak nepung matatda ing sala ning sulu kareng kekatang kayanakan, menasa nung mangapampangan la man maki salat ng tagalug..sopan tala pung é sasalambo , inya nung malyari mu pu pakisabyan ta’no man at uustu , ustung peburen tala pu , mekad datang ing aldo, ala nang Kapampangan.
Sinulat neng ; Patria Bondoc David (Tsokolating Lagu-lagu) 25 ning Mayo 2018
Bigla yang mitda ing sulu, meging pisak ing kabengian Keng dalumdum niting bengi, mesala ku kaisipan Aganaka ke’ng ingkung ku, king Concepcion a balayan Karing barrio ning Castillo ilang karing manuknangan.
Keng maluka dang karinan, keng panaung milabasan Ala pang elektrisidad, madalumdum yang karinan At misan minuli kami karin Magao ke dinalan Keng dalumdum niting baryu, mangatakid ku keng dalan
Pangaras mi kening baryu, makayabang ya’ng paritan Dadala ne ning Apu ku, ikaming sasalubungan Siniklaud ku kang apu ku, at saka naku pangaulan Tinayid naku king bale, at ing dulang yang linantang Inapag na ing apunan, saka mengan agnan-agnan
At kayari mi nang mengan, ing dalumdum yang lalawan Alang akit ketang pisak, at ing lungkut yang daratang Aku’ng maibug nang gumaga, alub namu muli naman Panandaman ku’ng miwale keng pamilyang pakamalan
Lepitan nakung Apung ku, kinawul naku’t apisan Saka aku’ng pakisabian kanita aku’ng malibang Pablasang keng kayanakan buri dakung pakisabian Aku kanu’ng matni buntuk, kareng apung pakamalan
Kabang aku’ng apisan na, mipatudtud keng kandungan Kakaulan nakung Apu ku, saka aku ing panuman Keng makaniang amulatan iyang tutung panandaman Iyang dela kung meragul, kening pusu makalulan
Inia ngening atin Apu, makanian rin ing gagawan Yumung lugud paparandam, potang ilang pakisabian Inia potang kalele la, atin tulang panandaman Gagawan ku’ng agisingan kareng apung kaluguran
EDUARDO POLICARPIO (Ing mayap a tata ning pamilya) nang: PL Sergio Gramonte
Keng danun ning kayabakan akit mu neng mamalebe Bibitbitan ing lumang bag, makasabit ketang takde Magdala yang sirang payung, keng kapalian ya babasle Pudpud la man reng tsinelas, tune e na pikarine
Nung keka yang pakalawan ining maganakang tau Alang luhu keng katawan, ala mu rin ing kapritsu Mamaglarin telebisyon, pamuntalan dening baryu Keng ditak nang panakitan, tanggapan ne ‘gyang magkanu
Makanian man ing kabilian, limang anak pepagaral At saka nala inanad, pamibiebieng kipmuang dangal Dening kayang meging bunga, meyari ngan pamagaral Kasipagan ampon tiaga, at mikabie yang marangal
Nung e me pin kakilala ining maganakang tau Keng piblas na ampon gayak, mababa ya pangatau Sumangid ning itsura na, busilak ing kayang pusu Teguyud no reng anak na, mengayari king kolehiyu
Ing panganeng kayang anak, metung paring akit tamu Adua la reng talaturu, keng escuelang pampubliku Inhinyeru ining katlu at narses ya itang bungsu Tutu ya mung mababa lub, ining matenakang tau
‘yan I Eduardo Policarpio, modelu ya’t alimbawa Lalam na ning kakaluluan, masikap ya at matiaga Pamilya na ‘lang degisut, ketang maskup at manawa Keng malugud nang asawa, kataksilan e na gewa
Sumangid ning kasakitan, dinatang ing kasaplalan Pibata ing kasakitan, pane awus king Miglalang Ketang mayap nang parasan, ayabut ne’ng panikuanan King lugud na ning Dios lbpa, ing tagumpe iyang kimtan.
