Kapampangan Library

Ing lalaking mapanusig, king babaing kecasal na
maganaca ya pin caya, o macasulud yang saya?
para cacu ing cutang a, inapse cung alang sala
dependi ya king sitwasyun, da ring adwang miyasawa

Nung gagawa’ning lalaki, ing aliwang obra bale
e naman mangabaldugang, king iti macasaya ne
pauli na ustung misan, king aldo’ldo pamibiebie
Ing nanu mang malilyari, ating sangcan a matibe

Alimbawa, ing babai, ibat ya pamung menganac
ing lalaki yang mamipi, king mapalid a mitambac
ya ing maglinis king bale, manareglung miyamas-amas
at maglutu antimurin, caras na ning tacdang oras

At metung pang sangcan nung ing, babai yang manintunan
natural mung ing lalaki, obran na ing dapat gawan
ingata’no ring anac da, dilua’na la at piblasan
uling ya ing patingapung, cayabe rang malalacuan

Dapot ustung ing lalaki, mapagal ne ketang obra
at cauli na king bale, ya pang lingun king canan da
adwang bage mu ing sangcan, mapanusig yang tagana
o mapalyari mu namang, metung yang ‘”ander de saya”

Mapanusig a lalaki, nung kecatamu lang surian
aduan de’ing gamat nang caili, idaun na pati wanan
milalu la caganaca, e ra la sana abusuan
uling ustung ilang mimua, daig do pa ring tulisan

Ding lalaking macasaya, malagua lang abitasâ
paswit da pa ning babai, gagalgal nong manimutlâ
gamus-gamus na la buntuc, e la macapagsalitâ
ustung gugulisac na la, ring asawa rang pagagâ

mengulumpis na la balat, a gamat king capipîpi
at menasa pingcuc no ngan, ding apulu rang talirî
deta namang awacan da, memalgang no’t talingkibi
pasari ning kakikilic, king anac dang mangalatî

Ding carela namang mata, malalam la at mangaslac
a menuling na king gilid, pasari ning sobrang puyat
pablasang ila mu naman, rugu ring sasangcap gatas
ban pasusuan itang bingut, king ba ya mung tuknang kikiac

Ding amanuan dang TAKUZA, awsan da la namang andres
o tatacut king asawang, masangil pa cang Herodes
mengari la caring martyr, Burgos, Zamora at Gomez
at paring menga-garoti, carin king trese Martirez

Vhelle V. Garcia
September 16, 2019
Abu Dhabi

(Atlu carangan)

Misan, menapa cu caring cacung pisan
dane macabebe, king baryu tacasan
ating lalaki a, cacung apansinan
dangcaldangcala’ne ing pu’ning tanaman

“Ninu ngacu ita”? a kitang cung tambing
king pisan cung Sanu, a mengapapiling
“i Goryu yan” ngana, “asawa nang Maring,
a anac na namang apung Milyung duling”

Agpang king cuentu na, ning pisan cung Sanû
Ing taung ikit cu, balbal ya malutû
meacsidenti yang, king bangin menabû
inia macanian ya, canung micabantû

Magmotor ya ngana, banda Marivelis
asagana’ne ing, trak ning magpapatis
pengilaga’ne at, king sobra nang bilis
sinadsad ya ketang, gilid ning talabis

King pangabigla na, e na ne a prenu
itang sasake’na, niting motorsiklu
at king talabis a, misna king cabatu
abe neng menacbag, ing honda nang bayu

King panganabu na, misalabac ya yan
caretang disa’nang dacal a tanaman
nung inia king sanga, nang acalawatan
e tinabili king cayang pangatalan

Uling madalumdum, alang ayaninag
nun e mu ring batwin, at tala king munag
at neng ing bulan man, bagya ya macaslag
ding panimanma’na, mistula lang bulag

Subali pa ketang, ala yang acakit
tical ne mu rin king, cayang pangasabit
at ing depata’na, ban e magcasakit
ding bitis na niti, king sanga no siclit

Oneng tiran ne ing, bale ring tagaso
iniang isampa no, ring bitis na babo
manangis ya rugu, iting gugulasyo
iniang panginisan, de batal at pago

Pelalung busbus nang, arung at balugbug
liban ding antic a, cayang abulabug
pati ing singit na, icua nang melintug
at itang lupa na, a mamilugmilug

Ing ket da ring panas, cayang pibabata
agiang makalbag, ne katawan at lupa
tatacut ya magcang, ustung menabu ya
nung e mangapacli, matda ya inawa

King sanga nung nu ya, iti misalabac
cari’na ne disan, ning marimlang abac
uling masala na, gulpi nang ayalac
magsilbi ne pa lang, king gabun midalpac

Uling ing pilatan ning gabun at sanga
sactu yang milabas, ing gaindung baca
inia nung inatyat, na la ring bitis na
atlu na carangan, mituclu ne sana

Macanian ya canu, rugung linto balbal
ing taung ikit cu, a pane darangcal
bata yang sasabing, “magatal, magatal”
ampo ing amanung, “atlu namung dangcal”….

Vhelle V. Garcia
February 7, 2019
United Arab Emirates