“Mayan pa qñg Camelio ing dumalan ya qñg busbus ning carayum, quesa qñg mabandi ing milub ya qñg cayarian banua”
Sasabian nang Jesucristo
Qñg quecatang Evangelio
Ing catutuan a malino,
Mabandi e la mitigco
Milub qñg cayarian babo.
Sucat tamung paquibaluan
Ba’t deti e no tanggapan
Calupa lang bininiagan,
Samasan ta’ng ulingiran
Nung nanu ing casangcanan.
Ing Guinung Dios lelang na ya
Iting yatu quecataya
Para caring lelangan na,
Penabilin nang talaga
Micalugud ta’ ngan sana.
Dapot ing mengapalyari
Saquim carin saquim queni
Ing gulu yang menatili,
Mecabulad bandang tauli
Mengalto la ring mabandi.
Ing cualta geua reng tagnan
Deting taung mayacayan
Ba lang macapanalipan,
Ing gabun secupan da ngan
Panibatan ning cabiayan.
Ustung yang mique carela
Ing gabun caring macualta
Ding calulu linto nala,
Canita na megumpisa
Ing cabiguan ding maquiupa.
Ding calulung anacpauas
Careting papaquisamac
Megumpisa nong memangiac,
Uli ning milalung dapat
Ding masaquim a limatac.
Qñg talindua at pagare
Tacpanan a macajale
Carin do lalung pemate,
Inya deting alang male
Qñg utang la macarate.
Nung capilan la danupan
Carin do lalung igpitan
Ding papalto qñg cabiayan,
E no man macasalangsang
Agad dong pamatacutan.
Ding casamac quetang aldo
Ngeni geua dong inero
Aldauan ding ortelano,
Mamayad lang jaciendero
Atlung salapi ing pico.
Inya ngening salucuyan
Dacal ing lulto caguluan
Uli na ning calipitan,
Gabun cualta at pibandian
Metipun caring mayaman.
Inya nganang Jesucristu
Qñg quecatang Evangeliu
Macualta calulu cayu,
Aquit yu ngan bandang sepu
Tangisan yu ing bandi yu.
Nung macananung ing cualta
E ya lulub qñg ligaya
Ning Guinung Dios a maula,
Macanian la ring macualta
E milub qñg pasbul banua.
Nung ding cualta at pibandian
Deti ilang meging sangcan
Misip na cayu mayaman,
Balicdan yo reng danupan
Ba cong e matampalasan.
Menibat ya pu qñg librung Pasyun ding Talapagobra a misulat anyang banuang 1930
Neng: Lino G. Dizon