É mu sâ pabustán , mawalâ yá keká ,
ing tíman king labi’t , masayâ mung lupá,
at mayayakit pá , karéng kékang matá ,
ing sabláng lawé mu , mabanglúng sampagá .
King luálas mung pusû , agyû mung palub ngán ,
ing bálang problemáng , misán mu kikiákán ,
é na buring sabyán , métung káng talunán ,
úling tutû kapin , ating pakiramdám.
King báyat ning kurus , binwát king kalbáryú ,
é ká pépatinág , karéng mag usyosú ,
pinilit mung tikdó , king pángasakáb mú ,
balamú alá mû …ing tíman atiyú !
Dápot nánu pamán , ing daguk á kamtán,
é ká sâ paysambut , king kasalpántáyán !
Patria Bondoc David,
9 Nov. 2017