Deng aguman capampangan king fb a memagalsut,
atin mapilan careti mangasampat la payabut,
careng sablang capampangan anti la mong manamuyut,
nucarin la man carinan, malapit man o malaut,
deng caparang capampangan acacua rang mirurungut,
pitatalamitam da la reng amanung misalicut,
at pilit dong gagambulan deng amanu at papalput,
mecad deng talapamasa, atin la mu sa’ng apulut.
Maragul lang saup deti, reting mesabing aguman,
dacal careng makiagum, cambe ra reng mamuntucan,
papakit da ing masabal king amanu tamung sisuan,
paramdam da ing lugud da king Indu tamung ibatan,
papasiag da at pauaga ing carelang paninasan,
e la sasaua’t papagal ketang buri rang parasan,
bang ing amanu tamung mal mandatila ya sicluban,
lacuas na king mismu tamung labuad na ning capampangan.
Inya ita’ng capampangan ganacan tamu sa’ng pane,
pacamalan ta’ ya sana ing amanu tamung mabie,
gamitan ta ya’t gingcasan king aldoldo pamibiebie,
iti ing magpakilala king kecatamung mismung bie,
uling careng uyat tamu, ing daya ta’ng sasagese,
manibat king kebaitan iti na ing manalete,
inya ing amanu tamu sesen ta’ yang masalese,
sucat ta’ yang pagmaragul, at luguran ta’ yang tune.
E. P. D.
Sep. 2, 2020