Neng Al Pedroche
Alas tres medya ning abac
Yng bie na ning tau
E mu atatasa,
Masican ca ngeni
Pota maina na ka.
Ngeni macualta ka
Bucas calulu ca,
Sinulapo no ngan
Reng atipung pera.
Pati caluguran,
Mengabating la ngan
Aniang maguisan yng
Quecang cayamanan.
Atin metung tau
a pacacalulu,
Ala yang cabiaian,
Canan mang asubu
Nune mu yng tagan
Quilcal qng basura,
Mate ya qng danup,
O macalunus ya!
Niang metung a’yaldo
Atin yang atupan
Queta qng basurang
Queyang cacalcalan.
Bag yang alang laman
Nune ticket Lotto,
Agad na neng quinua
“Baca maniambut cu”.
O yng Dios, o yng Dios
Tutu yang malugud,
Yng ticket nang Lotto
Cabud niya mu tinud!
Dinalan a milyun
Yng mibulus queya,
Yng sadyang pulubi
Migbayu yng bie na!