King malugud a kapanyausan nang koyang Bien a panimunan ke ing pamamye sampul keng pamanggale makabidyo , ngeni pu iyampang ke kekayu ing simpling pakibat ku ketang milabas a “Bulaklakan ” ning amanung sisuan , panupaya yupu nung ing ginamit ku “Sampagang Talayib” o kasi pu iyang binye ra kakung katulduan.
Bulaklakan king Amanung Sisuan
Neng : Patria Bondoc David
Talipampan : (Sampagang Talayib)
Balen ning Tarlac
“ Ing Sampagang Talayib “Sampaga kung alang lasa , é midugpan mariposa,
king kaluat kung manenaya , paninasan iyapa ra,
dapot pili lamu pala , retang nektar simsiman da,
inya ining kakung asta , é na meka-pibata pa.
É naku pâ mekibadbad , nuné meko na’ng linimpad,
ketang angin ku migsapad , nung nu naku angga sidsad,
anti ku mo’ng ayup sibad , linipo na kareng labuad,
inya suerti kupa mekad , é pa binang “sawing palad “.
Inyang misan mepagal ku , peynawa ku lual parnasu,
atin bibyung a dindam ku , ala kung male nung ninu,
biglang menabu la kaku , adwang pakpak a mapinu,
inyang umeng malikid ku … ini pala’ng Tulang Dapu.
“Pssst …pssst … kaluguran “! ngana , “saupan mukung munta keta “,
“O’bat “ ngaku naman kaya , “ ing palasyu ayan taya?”,
“wa magpaldas la “ ngana , “lagwa ,tara munta kata “,
para sabyan ku karela , ing amanu mabye yapa !
Ikeng adwang Tulang Dapu , luban mine sâ’ing emperyu,
O’neng ing bante soldadu , paluban man … ali naku !
kase … kada datang naku , magmausang yang e mu nanu,
inya kapilanman ngaku , é ya misut ing nasa ku.
Sampaga ku pin Talayib , alang banglu a kakatig,
metung ku pung kapanalig , é ko dapat payligalig,
Kapampangan a kayanib , keni’t keta magumasid,
mika atin man balakid , mangga mate é paylupig.
Metung pa pung abatyawan , pauli nang paraluman,
king banda naning amianan , maging dane ning aslagan,
pati ketang abagatan , angga na ketang albugan,
karin kula amatyagan , ding manyabing Kapampangan.
Daka’la pa’ng mangamanu , dapot dit man é yu tantu,
‘yang mariposang tubud yu , pili lamu reng sinuyu,
kabalik na keng palasyu , meniwala na kong tutu,
é pu mete ing amanu … yaku mismung magpatutu !
Pakisabi ku pu sana , Mal Ari ning Akademya ,
búlus mune’ing mariposa , ban manakit pang sampaga,
daka’la reng aliwa pa , é lamu reng keng maseta,
king sabana magbanda ya , atin karin manenaya.
Dapot nung é kayu bisâ , kanaku pu maniwalâ,
ala ku man pung agawâ , sayang namu’ing kakung wawâ,
inya’y Bombuan datang ya sâ , ‘ya napa ing manyalitâ,
kabang yaku mámún ku pâ … Mayap oras keko’ng sablâ !
Tsokolating Lagu-lagu
27 Eneru 2020
https://www.facebook.com/100004815136040/videos/1372737893521233?idorvanity=1973564689509992
