neng Orly Manalo Dizon;
sucad: 6/6; linya: 4;
estropa: 8;
orthograpiang: ca, ke, ki, co, cu;
Sep 18, 2014; 21:45 hours;
Manama, Kingdom of Bahrain.
1-e
Iniang ala yu pa / kening canacung bie
Capanatagan ‘tang / king isip mamale,
Dapot ‘niang datang ya / mebalisa cu bie
Inia ing cutang cu / nang gayumang tagle?
2-am
E lubus talus ing / canacung panamdam
Ing nanu tagana / king salu mitanam?
Manibat ‘niang anac / cu ngeni pa dimdam
Mapaling lugud a / king pusu micalam.
3-ud
Paslu nang Cupidu / king pusu ya tinud
Cayantabe na’tang / tulang e mapatlud,
Ing pakiuari ning / sarili magpanyud
King agus ning sintang / canacu mitubud.
4-u
Mesigla cung bigla / at mebie animu
Alang ca-anti ing / tulang miras cacu,
Itang akit kia mu / asna cung cusuelu
Lalu na pota pang / titimanan na cu.
5-as
Casampat, caniaman / ing canacu miras
ING MUMUNANG SINTA / ngeni pa amalas,
King pusu mamale / lugud alang cupas
Mamasang masapsap / e sana mag-uacas.
6-e
King egana-gana / migbayu cu laue
Cacu lang betingan / tune cong inugse
Ding’gang magaspang cung / kimut at panaske,
Uli na ning sintang / king bie cu miyugne.
7-î
ING MUMUNANG SINTA / yang cacu mig-ari
A pamanggulut king / bie cu bilang sapni,
Iya mu naman ing / a cacu pesacsi
Carin maualagang / oras misnang uri.
8-ad
E co calinguan ding / cacu na gagauad
Yumu ning uma nang / babie agad-agad,
Damdam ning sarili / igit cung mapalad
Kesa caring Adan / kea libad-libad.
Apr 26, 2023; DIZLAG FARM & RESORT