nang: PL Sergio Gramonte Calayag
Katapatan ning lalaki ketang kaya nang asawa
Ini iyang mayayakit, nung ing sakit dinatang ya
Akakit me itang tiyaga, keng lugud a yayampang na
Sikasuan ne’ng pakamalan, iya ing kabangal bie na
Ing pakamal ning babai, ketang kaya nang pamilya
Ini mayayakit naman ketang pinansiyal nang problema
Ketang ditak ampon dakal, inabut no retang pera
Ipagkasya nitang lndu, ‘ting metung ekonomista
Mayayakit yumung lugud, dening pakamalang anak
Potang pengari yang tumua, papakit da itang lingap
Alang akit kapabustan, tune ini yang pigagap
Yumung lugud a mitanam, tinubu yang misnang sampat
Mayakit ing katapatan kareni nang kaluguran
Karas nitang kasakitan, ika ining abayanan
Iyabut ne ing kasaupan, alang bayad a panayan
Lamasan ka’t e pabustan, ‘ting kapatad ing turingan
Makilalang kamag-anak, atsu la man ‘liwang bangsa
O nung ilang makalawut, yumung lugud a masapsa
Potang ila rening akit, kakapmu ka ketang saya
Maging mayan ing panandam, iyang tutung abitasa
Ing mayumu naman lugud, alang sukli a panayan
Katapatan iyang akit, ampon ining kagalangan
Kalupa ning Guinung Jesus, keyang lugud king ketawan
Dinaun ne ing sarili, kaligtasan iyang kimtan
Ing tutung sasalpantaya, king lbpa tamung miglalang
Mayayakit ketang gewa, keti babo ning sikluban
Pagsubuk man iyang datang, e ne bili, e ne lakuan
Bagkus talan na matigik, ipakit na ing tetagan
(dakal a salamat kang Miss Violaine Capitulo Sauro)
February 13, 2022
ccto: