“bakit?”

sinta, sinta, sinta, o kakung palsintan,
bala mu alak kang maniaman aldukan;
iyang kekang lasa, pane panintunan;
kening pangatau midaralang timan.

e mu nanung tula ing babie mu kaku
neng makitupa la kaku reng labi mu;
maglapo ing tula keni king pusu ku
neng ala ing kawang kareng salu tamu.

ing yumu ning pulut e man kalingkingan
king yumu ning sintang kekatang pisuluan;
metung namung kulang, at mabilug na ngan,
ita itang altar a pititipanan.

sinta, ay, kaniaman…. anti ka pin alak,
mayumu king batal ing balang kapatak,
dapot king yumu mu alang tumuas dawak
istung ketubasan at minuling salpak.

ninanu ka sinta, nanu ing gewa mu?
ot ing sablang tula gewa mu ngang abu?
ining kakung pusu gewa meng kalulu,
linubas meng tula, likas mu ngan kaku.

gilutan ing sablang tulang pisulu ta
iniang manakit kang salu a mayalsa,
ampo pang mayalkus itang katawan na,
at labing mas mau a managal keka.

anting alan’angga ing urang papatak
kening kakung salung manisnawang saldak;
ing yumu ning lugud miyalilan salpak
king salung ginauk, at kaibat, ginabak.

dening kakung takde ot gilutan mu la,
ampo ring labi kung minie tula keka,
lakuas ing pusu kung keka peulaga,
obat kelinguan me kayakit mu keya?

uli na mo wari nitang tutu ya ngan,
e anti mo akung lugud mu puunan,
ampong ing pita mu aggiu nang usignan
king kasuelung ‘yampang ning keyang kandungan?

obat likuan mu ku? ninanu ka sinta?
sintang pakamalan, sintang maulaga,
sintang kayamanan, bandi ku’t inawa,
sinta na ning bie ku, sintang alan’angga.

e mu wari aggiung makuntentu kaku
king pibablas kekang mayumung lugud ku?
e mu sa’ kakawang kaku ing lugud mu,
uling ing pusu ku magmalun yang ustu.

pinili me wari uli ning tutu ya?
marayu ku wari lugud keng lugud na?
migkulang ku wari pamaglambis keka
o uling pareung manuk lang kekata?

***e ke pu atandanan petsa pangalala pero dakal a dakal, ketang bayu ing pandemia. mangalkal ku pamu kanining tala, mekad akit ke pa.

This entry was posted in Capampangan Shakespeare, Palsinta, PL Tuazon Sabandal, Poesia. Bookmark the permalink.

Leave a Reply

Your email address will not be published. Required fields are marked *