nang: PL Sergio Gramonte Calayag
Mengari yang alun mamagus keng ilug
Iya ing malino o tutung malabug
Ketang parasan na nukarin mabaldug
Alang mikibalu, mawala ya kabud
Makanian miliari minunang poeta
Biasa lang gumale, biasa keng istoria
Ilang kabalitan, keng beluan dang dala
Tutu lang magaling keng berso at rima
Dapot ing miliari ing e ra sinulat
Deng karelang kudta, tutu lang masampat
Kareng bayung sibul ala lang amalas
Ala lang abasa, ala agyang ditak
Dakal la reng biasa, matikding poeta
Potang mangamanu, tutung makarima
Tune makawili, daramdam karela
Tataglus la diwa abut karin banua
Tutung makalunus agyang ilang biasa
Kareng tuki dai ala lang pamana
Ala lang misulat, karening poesia
Ala lang ayambag, megi lang istoria
Nung atin misulat, ketang panaun da
Ilang dalerayan, deni nang makudta
Dening kayanakan ila reng abasa
Nung nanu ing aral, buri dang pawaga
Pilan lang poeta ing atin asulat
Ing karelang beluan tutu yang abakas
Nung mengatua la man, atin lakuan bakas
Kareng bayung sibul, ini yang amalas
Panaung mesayang ining milabasan
Dening kayanakan alang balung basan
Deni nang makudta, ala lang alakuan
Kudta rang sinulat ilang basan-basan