nang: PL Sergio Gramonte Calayag
Tutung ngeni pa menakit, kareni nang mamuntukan
Deng amanung sasambitlan purus la ngan kalaraman
Balamu mu artista la, pamanarte ing gagawan
Potang ilang magsalita, biru-biru mung sasabian
Tutung alang kagalangan, karening kaparang tau
Akakit yang paimburisan, dening dakal a kristianu
Pansarili itang nasa, ban kanita yang magbabo
Dening kayang kapanalig, ilang keti magtampiso
Keng makanian a paralan, misasagsagan deng tau
Deng matulid yang papabal itang mayap ampon ustu
Detang kayang talatuki, iya naman ing paglualu
Samantalan ing sitwasyon, kabang ilang magugulu
Nukarin kaya papunta ining pakamalang bangsa
Nung dening manungkulan, ila rening magpasasa
Anting gatasan yang baka, sasandalan de pang kusa
Ibuklat la rening mata kening tune magagawa
Nung kabud na e bubulad, kening tutung maliliari
Ining pakamalang bangsa iya ining pisawili
Makapiak kang anting bulag, keng aliwa mu isisi
Deng gagawang e na ustu, ila pa reng pakapuri
Balamu yang mebating na, ausan tang nasyonalismo
Malasakit at masabal, milalako kareng tao
Kanya-kanya’ng maliliari alang lugud a magbabo
Iya sana ing ibalik yumung lugud kareng puso