(neng tita bern)
dakal mitas kile kanaku kanita,
angga kaluguran memamanatu la
dikil kanyang bage a para karela
ala yang bitasa karing patulu ra.
inya nung sakali a kekang apansin
a keng lalabasnan atin manatu pin,
o mangatni sualang pasulapo angin,
e mu la sikasu, patugut la murin.
nanu mong balu ra kanaku at keka?
nanu waring marok, meging anak daka?
atin tamu waring depatan karela
a mekaperwisyu kareng dangalan da?
kanitang i ‘ma mu, bayu ke linakad
king altar pisamban ban ku neng iyatad,
pekasiguru kung ikaming manyadsad
king kuldun ning sintang e buring mapatad.
metung pa i ‘ma mu, bayu ke miyabe
pekasiguru kung dalaga yang tune;
alang managalan, alang makipate,
gawan ke mang sulu keng pibale-bale.
at pekibaluan ke itang kekang tata,
pigsaryan kung memun masalese keya,
e la pala kasal inya naman ngana,
“ing kakung pilidu e ne man darala”.
pekisabi namu, e raka paburyan,
ituring raka sa’ng sarili kung laman;
e na kasi balung tinggap raka naman
inyang paglolon ke i ‘ma mu’t liguran.
bala ku pin sana e mu ku tanggapan
a magin tata mung kekang kilalanan,
dakal a salamat, e mu pigkaymutan
king kakung pangarap ampong kayadwanan.
11/10/23 //14:20
kabang makasake dyip pauli Manibaug
***ka-23 pyesa