“i ‘ma”

neng makisulu ku king kakung pamisip
at makirungut ku king pamaginakit
king dimla ning bie ku’t lubas pangabayit
at danun pamamun nang tatang keng sulip;
ining kakung pusu mitmu ya king lungkut
a istung maglapo, angga mata lalbug…
dapot anting bisiu iting sukal ning lub
pane kung usignan ban kung akarungut…
dapot misan aldo king biling anti ’ta,
king e ku siserian, apansinan ku ya
ing e apapansin atin ku kan’ta pa
–ila retang gamat kukusut labada….
ngaku, “Dios, sori pu, isipan ke’yng ala
kabang ining atiu, daraptan na’yng sabla….”