nang: PL Sergio Gramonte Calayag
Apalabas ke’ng mag-tahu, king danun ning kayabakan
Kabud namu iyang linub, keng isip ku’ng milabasan
Iniang anak pang malati, mamagtinda ing gagawan
Ing ice candy ampon ice drop, maranun pa ilan kuanan
At saka na pamisali, keni labuad na ning Bamban
Tutung kung mangapalaut, mangaparas kabundukan.
Potang kakung aganaka, ining bie kung adalanan
Anting metung penikula, kipmuan kule yang lalawan
Dening dakal kasakitan, ikua ku lang alagpusan
Meging matatag kakung bie, at mamarap keng katutuan
Ketang kakung kapagnasan, ing pamilya yang asaupan
E pabayat keng pamilya, lalung-lalu keng kabiayan
Mulat ya ing kaisipan, keng akakit kung kabilian
Pamilyang kung penibatan, e mabandi’ng penibatan
Inia aku’ng migkapilit, ing kanawan iyang dasan
Paninap ku e tutuknang, kening kakung pakiabutan
Gugunyat ku at magobra, kasipagan ing gagawan
Kabuklat na ning masala, king Guinung Dios pasalamat
Saka naku pin talakad, maranun pa aku’ng gunyat
Misadia nakung almusal, at mamalis ketang kalat
Inia potang migising la, ketang dulang makayapag
At kanita naku mako, manakitan ing pigagap
Kayari ning patingapun, penakitan ilang palad
Dinatang ya ing pagsubuk, pamagaral ku’ng mituknang
Midinan kung kapansanan, at megi ku ring salunan
Limang banuang e magaral, mibagsak lang paninapan
Penandaman ku ing lugma, malungkut ku panandaman
Mimasmas ku kening bili, anggang-angga nang makanian
Alang akit pamagbayu, at panyulung a pa’ntunan
Linapit ku kening madre (Sis. Andrea P. Surop, OP) pengari ku e kabaluan
Megi kung working student, ban isundu’ng pamagaral
Inia kanakung semasan, panikuanan yang abutan
Meyari kung secondaria at kolehiyo iyang disan
Ketang tiyaga ampon sipag, kasakitan pibabatan
Ketang nasang mayari ku at mikabie kung marangal.
Deng tapat kung kaluguran, e sinawang mamalale
Kabang aku ing magaral, ila rening kayantabe
Mamag-deliver keng yelo, ketang dalan basle-basle
O, mamulbul kaming manuk, at lalako la palengke
Keng ditak a panakitan, basta atin pamasahe
Matula keng tatanggapan, inia naman menagumpe.
Kayari ku keng kolehiyo, keng “construction ” ku megobra
Itang pali ampon danup, kanaku mu ring pibata
Mekaturu Sto. Niño, pakamalan kung escuela
Menungkulan keni balen, kagiwan ku pepalkas ya
Tinuru ku Kalangitan, kareng kapatad tang ayta
At ngeni naman king San Roque, atin labing limang banua.
Ngeni retiradu naku bilang metung talaturu
Pamangambul keng kultura anting poetang laureadu
Talasulat, talagale, keng literatura tamu
Tutung metung a basalios, ning kapampangan Parnasu
Malasakit at masabal para keni nang amanu
Ing amanung kapampangan atsu isip at keng pusu
