Irvin Harvey Rivera
Siuala Ning Maliwalu/Anac Ning Baculud
March 31, 2015

Papunta ko pa mu, pauli na ku, ‘Tung!
Lagwa yung dalakit, danunan yung dulung
Ing lakad ning oras piragling sumulung
E ko terkuterku’t mamuling minaktung.

Ala nang oras pa ing painapainawa
Ngara ring kalulu’t bayung talasawa
Malagad na la mu ring gagalang matwa
‘Nya ditak na la ring miukyat king banwa.

Ninu mo pin Ikong dinan da pang oras
Agyang kapatak mu king daya ra’t pawas?
Ikong mibansagang asyas na ning bukas
Kapilan ko mipuk at mike king matas?

Iko pin likluk da at dineng upaya
King metung a Balen bang apusan da sa’
Magsilbi ko sanang metung alimbawa
Karing kayanakang misimpan king sala.

Menasa, minuling metung a paninap
Ding ‘gang pengaku rang ala king pigagap
Nanu pang paintungul ing kekong akapkap
Nune metung namung bigu at mangarap.

Ikong Kayanakang dimut pa pamisip
Asyas na ning Bukas, sala sa’ sumilip
Nanung kapanayan king bie, keti sulip
Ninu kekayu ing datang at manyagip?

SiualaNingMaliwalu #AnacNingBaculud