Ding soneto pu tsa-pulu lamu silaba
Soneto 8
Lorung Malabit
Petrarchan Sonnet
Silaba 10
Estropa
Quatrain -2 Tercet- 2
Rima- ABBA ABBA CDE CDE
King lalam na ning impun ning manga,
kambe ning tsup ning angin maleldo,
karing musmus tang pusu siniro,
ing lugud a ginulis ning banua.
Kabang mababalag la ring bunga,
pengangasan kung keka ipalto,
ing lama’na ning salung kukulyo,
a siklian mung tima’ning pagasa.
Ding aldong linabas a marapal,
kitmuan la king matingkad a kule,
pauli ning atiu ka siping ku.
Ngeni king lalam ning manga tang mal,
ding pakyalungan ta at kayabe,
ring suli tang manampang kuswelu.
06 Hulyo 2015
Munoz. Quezon City