Ustung susulat tamu pung kawatasan, pangilagan tamu ing pisisiping tala ring estropang pareu sunis. Ing metung a estropa a makapalub king metung a kawatasan malyari tayang isulat anggang labing aduang telatag. Bakit labi mung adua? Uling ustung labi yang atlu, medyu e ya balansi uling lunis ya bilang. Awa atin mu ring susulat a lunis la bilang ding estropa dapot kerakalan, ustung lunis ya bilang ing metung a estropa, angga ya mung limang telatag. Maski manialikisik tamu karing obra da ring bantug a matenakan, ke kadaya tala o banyaga la man, ala tamung akit estopang lunis a bilang a labis king limang telatag at lalung alang tsa- labing atlung telatag a estropa. Ngeni, ustung labi neng apat a telatag ing metung a estropa, metung neng sonetu nung tsa-pulu la bilang ding silaba na ning metung a telatag at metung yang mala-sonetu nung ali la tsa-pulu bilang ding silaba a mangabaldugan, angga yamu dapat labing apat a telatag ing kawatasan. Ustung lagpas ne king labing apat a telatag, e ne sonetu anya dapat ding estropa e la tsa-labing apat a telatag ban makatuki ya king “international standard.” Tandanan tamu pu, ring sonetu at mala-sonetu mu ring malyaring isulat king metung a estropa. Ngeni, nung ing kawatasan e ya metung a sonetu o mala-sonetu, bakit e tala sukat pisisiping ding pareu sunis a estropa? Uling maglupa la mung metung a estropang pipitana-pitna ding estropang para-pareu sunis.
Alimbawa: Ing atyu king lalam iya pin ing mumuna nang estropa ning kawatasan kung mipamansagan “Metung Kang Malagu At Matsurang Paninap.”
1
Neng bakasyun na ing klasi at panaun da ring piesta,
magbalik la king diwa ku detang aldong milabas na.
Balamu kapilan pamu king isip ku sagiwa pa,
anting napun pa milyari ing makule tang istoria.
Malino pa ngan kanaku anyang munang mikit kata,
alben to ring magdarameng king dalan magpinitensiya.
Anyang kabud e sasarian king daya mipisikan ka,
kingwa ke ing kakung paniu’t kiskusan ke’ing kekang lupa.
Nung atin mu sang manalbe king malilyaring eksena,
mekad itang isipan da maluat tanang mikilala.
Alang ninu mang sumabing ngeni kata pa mitupa,
lalu nung aintindian dala ring misasabi tang mata.
Ing estropang aini akakit tamu pu, labi yang adua telatag. Ngeni, nung ding estropang para-pareu sunis pisiping-siping tala, mengari lamu king estropang aini a pipitna-pitna uling makanini lang lunto.
1
Neng bakasyun na ing klasi at panaun da ring piesta,
magbalik la king diwa ku detang aldong milabas na.
Balamu kapilan pamu king isip ku sagiwa pa,
anting napun pa milyari ing makule tang istoria.
2
Malino pa ngan kanaku anyang munang mikit kata,
alben to ring magdarameng king dalan magpinitensiya.
Anyang kabud e sasarian king daya mipisikan ka,
kingwa ke ing kakung paniu’t kiskusan ke’ing kekang lupa.
3
Nung atin mu sang manalbe king malilyaring eksena,
mekad itang isipan da maluat tanang mikilala.
Alang ninu mang sumabing ngeni kata pa mitupa,
lalu nung aintindian dala ring misasabi tang mata.
Pasibayuan ku, ding sonetu at mala-sonetu mu ring malyaring isulat king metung a estropa. Ustung ing metung a estropa maigit ne king labing apat a telatag, ala ne king patulu at ding lunis a bilang estropa, e la sukat lalabis king tsa-limang telatag,