kilub ning aldo’ldo misasabi tamu,
palalual mu kaku ing sukal ning lub mu,
ing balang yapse mu anting kalabadu
a dagpang kukutkut keni king salu ku.
uling king pusu ku mal ka pin tagana,
pablasang sula ka a kakung amana,
a kakung ingatan at pakamalan ka,
at e ku paburen king angga at angga.
pablasang manibat king saglap lang suala
reng kakung balugbug keti king masala,
ika na ing kakung darandaman kang ‘ma
neng kukuentuan na ku ampong pagtumaila.
pekilala na kang masalese kaku
kilub na ning balang pinandit ning bie ku,
kabuklat ning abak iduang na kang piwu,
aggiang neng atin yang sumpal a sigariu.
balu mu la reta, retang susubu ra,
kayi atiu kilub iyang keyang baya,
e ya makikintal aggiang sasabi ya
ampong malino kang darandaman keya?
pero makalungkut ining maliliari
ot ing kekang lino lalabug na ngeni
kareng dakal tau a istung sasabi,
anting al’wa ikang karelang pengari;
anti la mo waring keti mu mipasial
ibat keng aliwa at marayung lugal,
inia keng asbuk da e ra ka apalual
bilang amanu rang pimamanan a mal.
04/30/23 //13:49
kaibat mengasilias