nang: PL Sergio Gramonte Calayag
Ining malugud kung sweetheart, ketang banuang milabasan
Dela naku SM Tarlac keni kami mindayuan
Uli kanu ing Father’s Day iya ining pagmasusian
Menalbe kami mung sine saka naku pepakanan
Ketang metung a restaurant, iyang atin king kamalan
Order naku kanung order, keng pamangan a maniaman
Ing atian ku yang kinabsi, migbutaktak ketang niaman
Angus-angus pangisnawa, anti ya mong panagalan
Kabang aku ing painawa, maili-maili ketang kabsi
Sinandal ku keng sandalan, kaisipan mamulayi
Keng likut ning kaisipan, kudta lang pitayi-tayi
Ilang reng pidayit-dayit, saka ko pitagpi-tagpi
Manayun lang mibalangkas ilang tutung makawili
Dapot aku ining kilbit, ketang banda na ning tawli
Ining malagu kung sweetheart, resibu yang babie ngeni
Aku pala ing mamayad, menimawas aku’ng dili
Mengamus kung e manggatal, mengarimlang melisangan
Pangara ku ing Father’s Day, ngening aldo pagmasusian
Aku ining kayang libri, kening oras ning pasyalan
Inia aku ing tinuki, ketang kayang kagulutan
Dapot ngeni pamamayad, deng pera ku ‘lang bagutan
Tutung ala kung agawa, inia iya ing bayaran
Dapot ining kakung anak, atsu pala kagulutan
Iya pala ing bibiru, ing pengan mi beyaran ngan.
Salamat ‘delle
The end
