nang: PL Sergio Gramonte Calayag
Manalakaran ku ngeni, kening kakung kapanwalan
Bilang tune Catolico, kapanwalan king Miglalang
Metung ya mu ing Guinung Dios, lbpang alang kapintasan
‘yang atin atlung persona kakung sasalpantayanan
Nung tunggen me ing lagyu na, alang kuwentang pisasabian
Tutung ini kasalanan, agpang ketang Kasulatan
Ing Dios nang Abraham, lsaac at Jacob, keng minunang tipan
Ya mu rin ing kanakung Dios at kanakung paniwalan
E migbayu, ya pa mu rin, tutung mabie kapilan man
Kanita pa angga ngeni, panwalan ke at tutukian
Eya mete o migulut, deng apostol yang pengaral
Angga ngening salukuyan, matatag yang tatangalan
Ketang libro ning Genesis, iniang yatu yang melalang
Bie mineral yang minuna, kakadua la reng tanaman
Tinuki la reng animal, ban ing tau ‘tin gamitan
Kanita la pa melalang deng pengaring Eva’t Adan
Dinatang ya ing manukso, penikuanan itang kainan
Mesira ing pami-ugne, pauli ning kasalanan
Dapot, ing Guinu tamung Dios, iyang tutu king kalugud
Karela na yang pengako, ini nang Talapangabus
Panganak ne ning babae, daya’t laman na metakmus
Karin lugal ning Judea, ing Betlehem a meyawus
Meragul ya king Nazareth, Nazarenong mayayawus
Mengaral ya at pinaku, ‘yang mete babo ning krus
Libo-libo nang panaun, panenayan itang Mesias
Ing pengaku na ning Guinu, ing tune Talapagligtas
Mibait ya king Betlehem at penintun de reng pantas
Dinuku la at sinamba, ing katasan iyang likas
Ari la mang matutungge, kababan da yang pepalkas
Kalako da keting lugal kipmuang tula ing abakas
Ing sinubling mebie Kristo, telakad ne ing lglesia
Penimunan deng Apostol, iyang tutung sinesen da
Ginambul de’t peragulan, lipat dagat ligpusan pa
Pengaral de keting yatu, linaganap kareng bansa,
Catolicong mayayawus, deng kristianong mekilala
Matatag ya’t e maugun, pekasentro ya ing Roma
Catolicong matutungge, panimunan de reng pari
Itang turu na ning Guinu, yang tutukian dang parati
Deng tradisyon ampon aral (dogma) ilang tutung matutuki
Aduang libong banua ngeni iyang tutung menatili
Babasibasan, pamugan, kasalang na reng pangadi
E miragsa, e manabu, e mabaldug ketang api
Keng panaun tamu ngeni, lulto ing pamisagsagan
Pauli ding manimuna, ila reni reng manlinlang
Perpekto ya ing Guinung Dios, tutung alang kapintasan
Metung ya mu ‘lang aliwa, nanu ya man ing kayausan
Ing Dios lbpa, a malugud, yang linalang keng sikluban
Ya ing Dios ning kakung bie, meko keni iyang samban
July 1, 2018