nang: PL Sergio Gramonte Calayag
Mas manyaman ing lulugud, kesa ketang sapak kang mua
Pablasang ikang lulugud dakal tau reng matula
Mayayakit keng kekang bie, metung taung maganaka
Tutung mayan ing kekang bie, miyayawa la reng sabla
Nung ining mua manatili, kening pusu ning ninuman
Ing lawe na keng paligid anting banua a malulam
Bitbit na ing kabusitan, atin duda kenu pa man
Mebating na ing tiwala kening kayang pilubluban
Masanting ing mamagasa, kesa keta nang kabiguan
Makalawe king alaya iyang kipmuan kapanayan
Kabuklat ning kayabakan, itang grasya yang abangan
Ing asensu na niting bie, iyang tutung pakalawan
Keng kabiguang atatanggap, lulungkut ya ini nang bie
Kaligayan mababating miyalilan ya keng lumbe
Mangaina ya ing katawan, pati na ing pamibiebie
Madalumdum ing paligid, anting abu ya ing kule
Inia lugud ing pairalan, kening bie tang pakamalan
Ing pagasa e lalako, lalu na ing kapanayan
Lalawe ta king masala, anting aldo king aslagan
Keng makanian panlalawe, ayabut ta ing kanawan
Keng makanian a paralan abayu ya ining yatu
E pa’intulut ing malinlang, karening maling anunsyu
Pakasurian, manimbangan iyang parating gawan mu
Aliwa keng kalaraman, a tatanam kareng tau.
(Salamat keng The Silent Dragon of Philippines )
September 19, 2022