- E naku man mabeluan at, lalung e mag-kakabiasa
Karing bage akakit ra, rening pupula kung mata
Patye e bisang payawat, ing manamuyut kung diwâ
Keni’t-keni na payabut, ing masabal ku at nasâ. - Kanita ne makisuyu, karening adwa kung gamat
Ing kuma neng kuadernu na, at keyang plumang panyulat
Uling sula-sulapo la, reng katayang mangasampat
Anya nung e no akalap ala yang paksang abuklat. - Makanyan yang misasala, ing isip ning mamikudta
Antimo ing malalyari, king dalan piragli gawa
Nung e ustu ing sangkap na at ing timpla na malabsa
ala yang keyaliwa keng, bungang kamuting mebasa. - Dapot pagpilitan ku lang, samasan panga-salansan
Ban e la lumagpas bilang, anting balitang ning eran
Uling reng matua kanita, atin lang padrun tutukian
Alang sosobra o kulang, potang karas keng sukaran. - Anya potang datang kaku, a bigla nalang salisid.
Reng imbutan kung kataya, itang matda la’t mipayid .
Nanan ko man pangulapan reng masigi nang katulid
Nung e mo balung takikian, malili ka’t mangatakid. . - Lumawut na ka pa diwa at mantun kang e katelu
Lakwan mu ing sukal a lub at lumwal king kekang kubu
Nung sakali man datang ya at mibalik pasibayu
Tayiran me’t e paburen, ban king kulkul e manabu. - Anya ing suyu ku keka kaluguran king panyulat
Turu mo sana kanaku retang dapat a taladtad
E mo sana’ usignan at, magtas tindaragul gamat
Uling nasa ku’t purian mo, retang mali kung misalat. - Mayap la pa para kaku, retang mapiang mapanatu
Itang tune malasakit, turu daka ketang ustu
E anti retang aliwa, uling abe mo keng grupu
Karela ‘na kang kabanglu, angyang e ka pa mendilu.
(neng WakaOjie Mangalindan Pena)
* 19 Setiembre 2022 *