Irvin Harvey Estanislao Rivera
Siuala Ning Maliwalu/Anac Ning Baculud
March 5, 2020
King bie misan datang ing pamibabata
Ing ‘gang kasakitan, masalpak ing lasa
Dapot nung iti yang tune a tegana
Tanggapan kung mayap anting panalala.
Panalalang ing D’yos king sisintang Anak
E ne paburen king milisya’t misaldak
‘Nya kabang ing sala e pa anting pisak
Belwan tamu sanang mapayit ing Alak.
Alak a misna king paras at katapang,
A ibye na keka’t magui mung kasalang
King pamibiebie at paldas alang tuknang
Yang kalukup mung mye a payit at subyang.
Subyang king daklat ning pamaglakbe king bie
A sumubuk keka a maguing matibe
Ing mayap nang imbut king balang pamakde
Telaga ning Guinu king ba ta’ng tumibe.
Tumibe karing ‘gang daratang pang aldo,
A misan king bie mu mistulang baligo
Nung ing yumu’t payit kekata’ miyayo
Belwan tamu sanang ating D’yos king babo.