Kebaitan: Enero 20, 1918
Poeta Laureado: 1950
Ari Ning Crissotan: 1952
Ari Ning Parnaso: 1979
Kematayan: Eneru 08, 1986
King balen na ning Candaba, barrio Gulap, mibait ku. Enero beinti ing petsa, mil nuebe siyentus disyotsu. Mebinyag kung lagyung Jose Mauro Manapul Gallardo. Di Eugenio at Romana ila pin ding pengari ku.
Aku mu ing meging bunga ning karelang pamiasawa. Bista man ing kakung Ima atin neng anak minuna. Apat la ding kapatad ku keng minuna nang asawa, di Laureano, Bonifacio, Saturnino at Marciana.
Ing bale kebaitan ku, metung yang kubung garosa. Inaus deng kubung garosa uling neng panaun’na ning pamananaman pakwan, ing kubung yan pakulyut ya keng damulag ban kanita, ketang pinak idulung da.
Potang yari nong miligpit deting mitanam a pakwan saka re’isaka na naman karin king baryu ituknang. Asali de ring pengari ku at megi dang karinan angga king mibait ku at mig-walung banua keynakan.
Likwan mi ya iting kubung garosang kekaming bale inyang mate ya’ing asawa nang Laureano ming pangane. Linipat ke king bale na ban kanita asopan ne ning pengari kung babai karing anak na manese.
Ing pengari kung lalaki, ing keyang kapanintunan pamangobrang jueting ampon pamanaring sasabungan. Iting kapanintunan na alang tiyak a panakitan. Ing agisngan kung kabyayan, mengatmu king kasakitan.
Seli na kung katun* inyang edad na kung limang banua ning pengari kung lalaki at mamasa tirwanan na. Malagwa kung metalustus keng pamamasa mebiasa, nung inya sa keng edad kung anam pang banwa kanita tiki na nakung magdikta o mamapuntang kumidya, pablasang ing pengari ku ya ing direktor kanita karing sablang kumidyantis ning mabilug a baryu da.
Ing pengari ku metung ya karetang peka-mailig keng pamamasa nung nu ku miawa at mipausig. Inya balang piestang balen asiguru mung manalig nung atin ya mu ring pera, e malyaring e magpilit saling nobela’t kurirung e na pa abasa’t ikit a tinda ring magpiperya, pakalapag o sasabit.
Mumuna kung miputungan anting Laureadong Poeta merapat king barrio na ning Sto. Cristo, balen Guagua. Sinambut ku king ligligan keti probinsiya Pampanga. Inuli ke ing tropeo nang Yuzon, petsang singkuwenta.
Oktubri, 1951, tinanggap kung pa-aniaya menibat king Aguman ding Kapampangan keti bansa, ban lauk ku king ligligan na ning eliminisyun pa. Pamamili keng Ari Ning Crissotan caring makudta. Ing “Amanung Kapampangan” keng ligligan ya ing tema.
King meging eliminasyun dose semi-finalists la. Karing labing-aduang deti ing kanaku ing menimuna. Ike namang labing-adua, pasibayung milaban pa, ban ding finalist a adua keti naman mapili la, at king Manila International Fair mag-Crissotan la. King kaduang eliminasyun aiti dinian da keng tema – ing “Bakit Misalbag la ring Kapampangan” yang binie ra.
King International Fair o Pampango Night king carnabal, ketang Enero 5, 1952 ke milaban. Ding lupun a talayatul, atlu lang abugadu ngan Jose David, Max Llorente at y Silvestre Punsalan. Ing Dr. Amado Yuzon ya ing Lakandiwa naman.
Ding huradu mikakametung la mu king kayatulan, a yaku’y Jose Gallardo ing sinambut king labanan. Dela keng minuli ing taguring Ari Ning Crissotan.
--- ooOoo ---Pikuanan: Makuyad a Kasalesayan King Kanakung Bie, Excerpts from an unpublished autobiograhy
of Jose M. Gallardo (in Kapampangan)
Published by: The Juan D. Nepomuceno Center
For Kapampangan Studies, Holy Angel University