nang: PL Sergio Gramonte Calayag
Eku maibug mipatudtud biling-bili keng pagkeran,
Ing makamal kung asawa iyang kakung panintunan
Ing metung kung panugali, ikua king kanakung tatang
Matudtud lang mikakawul, nitang malugud kung inang
Makanian kung biling-biling, panintunan ing kakaulan
Makalawut ku pin kaya, asawa kung kaluguran
Alang labi a manuma kabuklat ning kayabakan
Amanung “l love you, sweetheart” iyang kayang sasambitlan
Malagad mung maliliari, mikawani keng pagkeran
Ining kabangal kung salu, iya ining kakung lakuan
Munta ku man ‘liwang lugal pangabengi babalikan
Anting ayup lilimbato, itang pugad yang balikan
Dening ayup karin parang, ating aral a dadala
Ila rening pagumasdan kabuklat na ning masala
Potang aldo iyang saslag, deng bosis da yang sisigla
Anti lang pupuri banua, pupurian ing Mayupaya
Ketang ditak a pinandit, ilang akit susulapo
Batiawan ing banuang matas, ila rening magpatilo
Keng malualas kaparangan ila ngening lilimbato
At pangaras ning kabengian, ketang pugad ilang atso
Nung deng ayup yang gagawan, babalikan ing pamilya
Katutubung kamalayan, keng sarili yang dadala
Alang isip anting tau, kaluguran deng sibung na
Aku pa kaya’ng e muli, pamilya ku’ng manenaya