nang: PL Sergio Gramonte Calayag
Nanu ya ining lipatu? Iya ini ing kukutang
Kareng anak a magaral, tune e de pegaralan
Deng meragul ketang baryu, iya ining amulatan
Potang ila reng magdapug, ing lipatu pagumasdan
Potang api yang malablab, saka iyang maglipatu
Itang baya mukyat babo, iyang akit mitatawu
Kabang iyang atsu babo, saka iya ing manabu
Manawa ya ketang dasan, itang disan yang mitawu
Makanian ya ing lipatu, manawa ya ketang dasan
Ketang pali niting api, iya ini ing dadalan
Deng ayawa masisilab mikalabkab yang lalawan
Mikalat yang masalusu daragul ya ing kasiran
Makanian ya l Luis Taruc, Alipato’ng talipanpan
Itang paling panandaman, susulapo king katasan
Itang dasan yang miyawa, keang diwang pakilaban
Makipamuk katuliran ban kamtan ing Katimauan
Balikan ya ing istoria panaun na nitang gerra
Mibagsak ne’ng Corregidor, kareng Japon sinuku la
Sindu’ng laban kareng Sakang, tinalakad deng guerilla
Penimunan neng Luis Taruc, keti lugal ning Pampanga
HUKBALAHAP (Hukbo nang bayan laban sa mga Hapon) yang telakad, guerilla lang makipamuk
Laban kareni nang dayu, ban ing bangsa e milugmuk
Kareng gamat da reng Hapon, memie pasakit at lungkut
Keng parang ning lamutakan, ilang akit mung susugud
Inia pala yang ginamit Alipato’ng talipanpan
Malipato kayang lagyu, keti labuad kapampangan
Potang ila rening dasan maki-abe keng kimutan
Lumaban la kareng dayu, katimauan iyang kamtan
Angga ngeni maglipato, ing lagyu nang pakamalan
Mitatak ya keting amlat, at keting kasalesayan
Ining lagyu nang Luis Taruc, ing Supremong tatangalan
Tatalakad ketang mayap, katuliran pakilaban.