nang: Poeta Sergio Gramonte Calayag
Akayarap ku la ngeni, kening metung kapulungan
Education supervisor, king Concepcion tang balayan
Sasakupan niting Tarlac, ining labuad kapampangan
Iya ngening pisasabian ing kulturang Kapampangan
Kanita e malumpawi bagkus lalung pasulungan
Ing amanu tamung menan, tune iyang pakamalan
Ing amanung kapampangan, iyang kekaming salita
Sakup na ke ning Pampanga manibat pa iniang mula,
Ikami rening meyawus, asuan dang Alta Pampanga
Dapot ikami’ng mesakup, keting Tarlac tamung sinta (1873)
Inia iyang mikawani, pilatan ya’ng ilug Parua
Tune kaming kapampangan, king amanu at kultura
Keni nang kasalesayan iyang tutung makasulat
Mayayaus yang Macapsa iyang karin na menibat
Ing Balen San Bartolome, iya ini ing milipat
Pauli ning ilog Parua, kasiran na misnang lualas
Iya’ng Balen a Melakuan, iniang balen yang linipat
Ngeni ‘yang Balen Magalang, keang lagyu nang mapalad
Dakal la retang poeta keting lugal manuknangan
Talagambul, talasulat keng amanu tamung menan
Kanaku lang pagdulapan ban ila reng kayaduangan
Ing biayan yang pasibayu ing kulturang agisingan
Inia ngeni keti balen pasibayu tayang biayan
Gisingan la retang diwa, mengarimla panandaman
Keng daratang tamung fiesta, manakit tamung ligligan
King poesia at crissotan a maluat nang darandaman
Libutad na nitang plaza ing tiuntiunan karin gawan
Agkatan da kong manalbe alben yo reng kayanakan
Makananu lang gumale, akit mu lang mibadbaran
Keng crissotan la milaban, Gallardo la niting tibuan.
Ing malagu tang kultura pasibayung tayang biayan
Keti balen ning Concepcion iyang lugal ding matapang
Lugal de rin ding bayani, a malugud keting tibuan
Kapampangan lang meyawus, pagmadagul ning balayan
Meko keni, abe-abe, ing kultura iyang kaulan
E pabustan malumpawi at e mate king sikluban
