Kapampangan Library

INIANG KAYANAKAN

Posted on February 24, 2024 by Sergio Gramonte Calayag

nang: PL Sergio Gramonte Calayag

Kabang iyang alben, ining video-canta
Tinulu kaku’ng lua, e ku ayaguanta
Linub keng isipan, ing bie kung minuna
Kaklase’t kakialung aganaka ku la

Kakung kayanakan decada saisenta
Ikaming mamialung libutad sabana
Kakawe keng ilog, manasan king sapa
Magpastul damulag, Karin king taldawa

Ikeng mamialungan, mandilu keng uran
Manugak, manasan, mumukyat tanaman
Mamanyutung kami babo kabundukan
Saka magburarul, patio ning pisamban

Itang simpli mung bie, parating gagawan
Ing maglutu-lutuan, keng kurang-kurangan
Dening bulung dutung, magtinda-tindaan
Perang kalapanti, makadapuk bikan

Keng lalam tanaman, magbale-balayan
At mipag-istoria keting palpabewan
Ing ayalbeng sine, iyang pisasabian
Kabang makalupung, keng tukuran eran

Ila reng pialungan, ing laban babagua
Aro, salikutan, teksing, tabak taya
Deng Olen ampon teks, ayo, siotong, goma
Maki-albe tv, abe deng barkada

Liksi ning katawan, iniang kayanakan
Malawut keng sakit, tutu keng masikan
Parating kakanan bunga ring tanaman
Tinaklub at sagin, tutu lang maniaman

Potang magaral na karin king escuela
Singku ya ing bakal, tutung mayulaga
Kaku yang gagawan baldug keng alkansiya
Nung ating bayaran, keti gamitan ya

Malawut escuela iyang lalakaran
Agyang alang sapin, iya ing puntalan
Kabang atsu dalan, kuentung alang tuknang
Ikami ing miras e mi amalitan

Masaya ing napun, ing bie yang masimpli
Maligaya ing bie, keta nang miliari
E mu na abalik, panaun ta ngeni
Salamat king Guinu, delanan ku ini.

Posted in Bie, PL Sergio Gramonte Calayag, Poesia, Poeta Laureado | Leave a comment

E SISIRAN ING TIWALA

Posted on February 24, 2024 by Sergio Gramonte Calayag

nang: Poeta Sergio Gramonte Calayag

Ing luma kung kasulatan ketang baul makasinup
binie kaku nitang Madre, pamagaral yang sinaup
Kanaku yang pakamalan, ining sulat nang pigkalub
Anting metung kayamanan inia iyang pakasinup

Apat a pulu’t anam nang banua, panaun lebasan
Meyari keng secondaria, keng escuelang pakamalan
Sto. Niño Academy, keti balen tamung Bamban
Keti ku “working student” meyari keng pamagaral

Paninap ku kening bie ku, mayari keng pamagaral
Maging mayap a memalen keti balen tamung tibuan
E ku bisang magpabayat, keng pamilya at balayan
Kanita makasaup ku, kareni nang mangailangan

Kening Madre a sinaup, keting bie ku e kelinguan
Tiwala nang binie kaku, e sinira kapilan man
Pati pera ning escuela kanaku no papatalan
Pagmadagul keni nang bie, alang pesus a kukulang

Ining kayang kasulatan, iyang ining magpatune
Ala kaku ing kalokuan, tiwala na e inugse
Bagkus iyang pakamalan, keang lugud a dalise
Iya ini ing sinikap, sininup ke keni nang bie

Potang ika’ng pigtiwalan tiwala da e sisiran
Isinup ya keni nang bie anting tune kayamanan
Pakamalan anggang -angga, ining metung a dangalan
Pagmadagul dening suli, ban kanita pakiapusan

Posted in Bie, PL Sergio Gramonte Calayag, Poesia, Poeta Laureado | Leave a comment

“bista man ali ka”

Posted on February 24, 2024 by Tuazon Sabandal

ing komustan mu ku, bage a balu ku
a e mu bitasang ikutang kanaku,
dapot kakung taruk a ken king pusu mu,
panintunan mu ku’t pangulilan ustu.
pablasang ala kang akit a aliwa
a munie king keka kakung bine tula;
aggiang nanan mu mang magsakub-sakinda,
iyang kekang pusu e me apiraya.
aggiu mung maglingad kaku anggang angga,
at pakit king yatung tutung masaya ka,
dapot sumangid na, ing lub mu balu na
a akung lugud mu at tulang tagana.
— at kaniting bage bista man e mamin,
— malino ka matang king sinta, salamin.

02/24/24 //11:11
kaibat mengan biruyang sagin

Posted in Amanung Sisuan, Mala-Sonetu, PL Tuazon Sabandal, Poesia, Poeta Laureado | Leave a comment

SESEN TAYA AT GAMBULAN ING AMANUNG KAPAMPANGAN

Posted on January 24, 2024 by Sergio Gramonte Calayag

nang: PL Sergio Gramonte Calayag

Ngening bulan ning amanu, amanu tang kapampangan
Paganaka kekatamu, iyang sesen at gambulan
Ini iyang pepamana, ding ninunu niting tibuan
A lipi ding mangarangal, keti babo ning sikluban

Ing taung e biasang lugud, keng sarili nang amanu
Daig ne’ng bilasang asan, mabuluk ya at mabawu
Sinabi nong Jose Rizal pangbangsang bayani tamu
Inia dapat yang luguran, pakamalan tayang ustu

Ing kayang buri nang sabian, keng amanung agisingan
Kekatamu yang luguran at saka ya pakamalan
Aliwa ya ing tagalug, ing amanu tamung menan
Nun’e ini nang salita, kekatamung amulatan

Nung sumuring masalese saka iyang pagaralan
Iya ini ing minuna ing amanung kapampangan
Ini iyang metung bangsa, keng panaung milabasan
Alayu pa’y Jose Rizal atsu ne ing kapampangan

Dakal kareng kayanakan iya ining pikarine
Ing amanu tamung sisuan deng ninunu yang dinake
Damdaman mong magsalita, kapampangan yang lilele
Ing tagalug ampon inglis, damdaman mo neng sasabe

Dening abe talagambul, deng sesese keng amanu
Ila sana ing talakad, saka iyang ipaglualu
E pabustan mipailalam, kareng salita ding dayu
Nun’e iyang palabungan, at gambulan tayang ustu

Posted in Amanung Sisuan, PL Sergio Gramonte Calayag, Poesia, Poeta Laureado | Leave a comment

“istung mibalik ka”

Posted on January 24, 2024 by Tuazon Sabandal

o’t likuan na naku ning ganaka yata
ibat ketang aldo likuan mung misapa
at e na mitkdo king milalung lugma,
at alang lunus mung seriang pemiga lua.

ining kakung pusu dinunut meng ustu
a pepasari na ning pamaglako mu,
sinuba ing kaplas karening mata ku,
at ini ing mismung milumud kanaku.

nanan ku man kawe e ke aggiung dasan
ing pangpang ning ilug nitang kapaldanan;
alus ala nakung mitagan a sikan
ban lagpas king kelan dit man kapanayan.

ika mu pablasa ing kabud nang nasa
nining kakung pusu a sinintang bina,
uling ika kabud ing atin upaya
a payalduk keya king guna ning tula.

dapot nung sakaling ing pamipalsinta
din mung pamitagun a ibalik ta pa,
ing pekamatulang kaladdua, aku na,
anti kung bangkalang sibli mu inawa.

uling nung mikit ta panibuk a pusu,
ing lasing pusu ku misan ya’ mabuu;
ampo ring salu ta nung miraup la mu,
misan ya’ mayulu ing gabak kung salu.

nung asuglungan to ring aldo ning napun,
misan mu mitapus ing kakung pagmalun;
mibalik kanaku ing ganakang mamun
a pepasari na ning kekang pamamun.

inia e kabud dit ing pasalamat ku
nung ibalik mu ku tulang pasibayu;
e ranaka bustan mayala pa kaku,
nun’e tali rakang tipan a amanu.

01/22/24 //22:14
kabang pabukal bulung guybana

Posted in Capampangan Shakespeare, PL Tuazon Sabandal, Poesia, Romansang Salamat | Leave a comment

Talapagligtas 2

Posted on January 24, 2024 by Apo Gonzales

(Savior)
Mala-sonetu

1.
Tau ya pin kaya’t / metung a personá
ing talapagligtas / a ipanaral dá?
O iti metung yàng / pikatsang istoryá,
a pepanuala da / ring tau kanitá?

2.
Nung tutu, nokarin / nakatà iligtas
niting ngara…sugung / inaus dang mesias?
nung Dios yang tinipa / ibat banuang matas
ot kailangan na pang / mate ban magligtas?

3.
Ing dramang iti king / bubut tamung yatú
e kaya linubid / da mu ding larinú?
E kaya paralan / da mung inimbentú
ban supilan da la / ding mangmang a taú?

4.
Uling nung ing taú / atamnan meng takut
apatuki mú ne’t / apidurut-durut.

Yng Bantulut A Siuala
San Simon
23 Enero 2024 -5:31 N.A

Posted in Mala-Sonetu, PL Apo Gonzales, Poesia, Poeta Laureado | Leave a comment

BIAYAN TAYANG PASIBAYU

Posted on January 24, 2024 by Sergio Gramonte Calayag

nang: PL Sergio Gramonte Calayag

Anam a pulung banua na ing panaun alabasan
Ing masaya tang kultura iyang mabie keti Bamban
Mibantug ya at tengalan, Atenas ning lalawigan
Kalupa na ning Baculud, Atenas ning kapampangan

Dakal la rening poeta, dakal la ring talasulat
Dramaturgong mekilala, keng zarzuela papamalas
Pamamutung kareng musa, pamanggaleng misnang sampat
Ining baleng pakamalan, king pedestal ya makatas

Makanian ya ining balen keng panaun a milabas
Kultura’t literatura, ing leguan na ababakas
Anting mabanglung sampaga, ketang jardin a malualas
Sasalingalngal king banglu, kabuklat na nitang abak

Meselan ya ing panaun, mitakup ya ing dalumdum
Alang sulung makasindi kakapkap ka ketang dulum
Misalikut la reng pluma, alang sulat a manayun
Melangi la retang tinta, linukub ne ning pagmalun

Mimina ya ing kultura, mebating ing keang leguan
Ditak-ditak melumpawi, panugali tamung menan
Keng makaba nang panaun iya ini nang melakuan
Dening dakal kayanakan ala nalang pakiapusan

Dapot ngeni mibabalik, ing kulturang pakamalan
Gisingan yang pasibayu keng metudtud nang kabilian
Tutung ini e pa tauli, pasibayu tayang biayan
Mitalanan tamung gamat gunyat tamung agnan-agnan

Posted in Amanung Sisuan, Crissotan, Ligligan, Poesia | Leave a comment

KAWATASAN KUNG ASULAT

Posted on January 24, 2024 by Sergio Gramonte Calayag

nang: PL Sergio Gramonte Calayag

Kawatasan kung sinulat, atin labing metung banua
Aldo-aldo kung susulat alang palya at sumala
Nung nanu’ng makapanaun, kalbitan ke’ng kakung lira
Itala ku ing miliari iyang gawan kung istoria

Kabuklat ning kayabakan, ing diwa ku yang maglakbe
Agyang bebe nitang dagat iya ining mamalebe
Karin babo nitang biga, eroplanu karing sake
lsulat ku’ng kakung ikit, ilarawan keni nang bie

At neng misan deng sinulat ilang kakung babalikan
Iniang aku’ng magumpisa, ila rening pagaralan
Deng belangkas kung minuna, alang bilang a dadalan
At neng misan alang rima, makatula lang babasan

Dening minunang sinulat anting metung talaturu
Manyaliksik at magaral balikan lang pasibayu
Detang mali kung asulat ila naman deng binayu
Susulat ko at gagale anti ku mong mag-ensayu

Ngeni kanakung lang dake, king aklatan munisipyu
Ban deng anak a magaral, ing kultura yang abalu
Ing metamle tang kultura, kumabie yang pasibayu
Potang atin lang abasa, patungkul keng balen tamu

Dening bungang kaisipan misulat king kapampangan
Ban deng anak a mamasa, ing amanu e kalinguan
Keng makanian a paralan, anting metung a tanaman
Ing kultura yang magambul mikabunga yang maniaman

Posted in PL Sergio Gramonte Calayag, Poesia, Poeta Laureado | Leave a comment

“pusu at takde”

Posted on January 24, 2024 by Tuazon Sabandal

atin pamitagun a daratang king bie
a ing bili tamu asna king kabule,
at kailangan ta la reng aliwang takde
ban king bili tamu munie panantabe.

atin pamitagun atin ta’ng abutan
o atin tang bage layun pakirasnan
dapot king kuyad na ning kabias katawan,
e makapanusig ing kalma munaman.

dapot atin pusu king palele-lele
a makasaddia lang iruang do ring takde
ban munie lang saup, ban munie antabe,
ban ing kakulangan apaniuglungan de.

mu pin king maralas a pamangailangan,
o kaya aggiang pang king pamisan misan,
ing dine king salu kekatang tatakman,
sangkan ban ing saup a bibie, misdingan.

aggiang makananu ukulan ta kasi
ing managan tamung dangal king sarili,
at e tana’ pane pasapu kareni
aggiang laus la lub manantabe reni.

dapot misding ta man karening maningit,
ding takde rang duruang pilit dong pamilit,
at ngarang sasabing kasangkapan la’ng dit,
at king lub ning banua, lub da mung pagamit.

nung tanggapan ta la ding duruang dang gamat,
e mu ikatamu retang pasalamat,
uling ila’ naman mapse lang salamat
king pangagamit da king mayap a dapat.

inia pin salamat uling e ta balu
reng aliwang angel kayabe ta la mu,
at magagamit la malinis a pusu
king mayap a dapat at lugud a tutu.

01/24/24 //06:52
kaibat meglimas metipun danum uran