Ing Indu tamung Amanu

Posted on January 15, 2024 by Eric Dizon

Saganan kong mitmung tapang ding alun a mangaragul,
king busal ning dayatmalat at king angin babalibul,
at king masikan a bagyu, mangildap man o manuldul,
malaus ku pang sumulung at e bitasang kumurul.

Nung kailangan dalakit ku kareng matas talimunduk,
o ing salunsunan ke pa ing pekasepu ning bunduk,
nung karin ke mu arasan ing tagumpe king pagsubuk,
kapilan man e ku murung king daklat ning pamipamuk.

Pablasa ing malilyari king salukuyan panaun,
ing Indu tamung amanu malalam ne pamagmalun,
king kayang kabilian ngeni, ditak ditak matatambun,
a mandulap pamanlingap bang king aun e mandatun.

Yaku, anting metung anak king Indu tamu lulugud,
nung metung ku kareng suli a mepili at mitubud,
isulung ke’t paglualu ing amanung makabukud,
bang king alun e mayanyud at e na akuang malumud.

Ika, nung Kapampangan ka, at tune mung pagmaragul,
ing Indu tamung amanu a keka mipaintungul,
kareng aliuang amanu e me bitasang paisaul,
at maging metung ka sana king Indu a makakaul.

Itamu ngan Kapampangan, a Kapampangan meyaus,
Ing Indu tamung amanu yang kekatamu mamaus,
king mangaina nang kabilian a uaring magmakalunus,
itamu ing magmasabal, at itamu ing mangabus.

E. P. D.
Nov. 22, 2023

Posted in Amanung Sisuan, PL Eric Dizon, Poesia | Leave a comment

KAPANWALANG ORTELANO

Posted on January 15, 2024 by Sergio Gramonte Calayag

nang: PL Sergio Gramonte Calayag

Sabi da rening makatua kening maluka ming baryo
Iya ini ing apakta ing uran na ning Enero
Inia iyang bibilangan, ketang mituldu nang aldo
Katulid ne nitang bulan, itang kaya nang numero

Kayabakan a maranun, iyang tutu ing mauran
Kalima ya ining aldo, Enero ya ining bulan
Ortelano kareng baryo iya ining kapanwalan
Ing bulan na nitang Mayo, tumulu na ining uran

Makanian la kapanwalan dening tau keting baryo
Itang uran a tinulu apakta na ning Enero
Karin bunduk ning Alaya ila reni deng babatyo
Metung ya mu ring lalawan anting metung barometro

Nung mamuntuk ya keng ulap, ing bunduk na ning Alaya
Iyang maurang panaun ini iyang pan’walan da
Deng taung mamilad pale, ilukut pa itang lona
Ilantang deng pasibayu, neng panaun malualas na

Ita namang dikut Balut, ing bulung na yang igutan
Asalat do retang buknul, nung pilan ya ing kauran
Itang albug a pagsadian, pilmi naman iyang datang
Inia iya ing pagsadian keng kauran a paratang

Deng makatua ‘niang minuna, paligid mu yang lalawan
Kareng ayup at animal, ating aral a kukuanan
Pablasang tau’ng natural, keng maluka nang kabilian
Ababasa at akakit, ing panaun a paratang.

Posted in PL Sergio Gramonte Calayag, Poesia, Poeta Laureado | Leave a comment

TATANG

Posted on January 12, 2024 by Jose Roman Reyes Laquian

nang Jose Roman Reyes Laquian
6:50 PM Domingo 21 Junio 2009

Quea ya ing dayang dalise cacawal ,
Lugud qng anac ya’ing babie nang pacamal ;
Matapat ya Lingap qng Cayapan Sacdal
Balang aldong babie ning DIOS Ibpang Banal ;

Tore ning Sicanan santungan ning anac
At Sibul ning Lugud qng masalang abac ;
Budning Tala-ingat ning suling misapuac
Nung nu ya’ing Lugud nang Dalise’t Mawalac ;

Caring baguiu’t ayun ning bie mangidalo
Qng queang pamilia , Cambilan yang lalto ;
Matibe bubungan qng mayuran aldo ,
Mapaling Lugud na Aslag yang Malino ;

Ninu ya qng Lugud . . . Pusu Madegulan ?
Ninu qng Pacamal . . . Binie ning Miglalang ?
Qng Lugud at Lingap , ya’ing Nuan a Catutuan
A pane cung ausan . . . Malugud cung TATANG !

TATANG * , Poema Para Queang Uwaran Larauan Ning Lugud , Ing Malugud cung TATANG , EXEQUIEL dela CRUZ LAQUIAN .

Bocabulario / Tala-amanu ( CAPAMPANGAN ) = Vocabulary ( ENGLISH ) = Bokabularyo / Talasalitaan ( TAGALOG )

Mawalac = 1) Malapad ; 2) Malualas ; 3) Maquecaba , Masaclaoan , Madegulan ; 4) Daraquila ; 5) Milalu degulan , Maleparan ; 6) Alang Casucaran , Alang Cayangganan ( CAPAMPANGAN )

Immense ( extremely large or great , especially in scale or degree ) = 1) Broad ; 2) Wide ; 3) Extensive ; 4) Great ; 5) Vast ; 6) Measureless ( ENGLISH )

Malawak = 1) Malapad , Maluwang ; 2) Malaki , Madilat ; 3) Masaklaw , May kalakihan ; 4) Napakalaki , Dakila , Labis-labis ; 5) Napakalawak ; 6) Hindi masukat , Walang hanggan ( TAGALOG )

Posted in Ibpa, PL Jose Roman Reyes Laquian, Poesia, Poeta Laureado | Leave a comment

“nung sabian mung kaluguran me pa”

Posted on January 12, 2024 by Tuazon Sabandal

pigmananuan na kung map abak ning aldo
kaibat neng penabi itang ganingaldo,
mu pin e no yata ayulinig sasio
ampong apansinan ding luang sasayoso.

e la pepatugut kilub ning kabukas
karing kakung mata, sulung mangalagas,
nanan ko man ‘yawat pilit lang tatakas
king pamanusig na ning pusu kung maplas.

nung mipakanian man ing miliari kaku,
king bage, sala ku, agad kung metuksu;
peiguna ku kasi iniang ing leguan mu
ingit ne ning kalma king panimanman ku.

at ing kakung pusu e sinubuk mu man
a magkunuari yang alang penamdaman,
o migkunuari man a e ya mituran
king uyung ning lugud a alang panginuan.

inia ing pusu ku sinungo yang sukat
karing amanu ku a keka migtapat,
e ke ayaguanta nanan ke man ‘yawat
pablasang nasa ne ing “wa” mung pakibat.

ing e ku mu balu, makasuerti ya’ta
uling ing tangu mu maranun neng ikua,
at migmasusi ya king milalung tula,
at anting ginato kalupa ring biga.

mu pin ing tula na nu anti ragul man,
mituldikan ini’t meging kalumbayan
pablasang litlut me tulang panamdaman
iniang ing lugud mu binawi mung misan.

nung sabiang mal mu pa’t mibalik ka mu sa’,
ring abak muklat la king lua na ning tula,
at pasalamat ya sumangid ning sabla,
uling angga ngeni ikang keyang mutia.

01/11/24 //04:18
kabang magkape

Posted in Capampangan Shakespeare, Palsinta, PL Tuazon Sabandal, Poesia | Leave a comment

INING BIENG PEPARAM

Posted on January 12, 2024 by Sergio Gramonte Calayag

nang: PL Sergio Gramonte Calayag

Dakal lang sasabi, keng taung mabisyu, ing alang mibagua
Keng gawang e mayap, iya ing gagawan, inia mangasira
Ugaling matsura, tune mayayakit, maling alimbawa
Keni nang lipunan, keng keang pamilya at arap ding malda

Melulung keng droga, pati pamanyugal, matako pang alak
Pagasa ning bukas e na na lalawan, milako ing balak
Ala nang parasan, ala nang paninap, keng dusa misaldak
Magulu ya isip, ala yang direksyun kabuklat ning abak

Keng makaniang gawa, iyang mibababa, pamibiebieng moral
Akakit ding tau keang panugali, bababa ing dangal
Inia milalako, kening kaya nang bie, ing bie nang makamal
Tutung mayulaga iya nang babating anting perlas a mal

Tandanan ta sana, makamal tamung bie, iya ing peparam
Ning Mayupayang Dios, keka ta pigkalub inia sa ingatan
Datang itang aldo iya ing ibalik, ing bie tang dadalan
Potang iyang subli, ika ining kutnan, nanu kayang sabian?

Posted in PL Sergio Gramonte Calayag, Poesia, Poeta Laureado, Tau | Leave a comment

MIBAGUA

Posted on January 12, 2024 by Manigaral Kapampangan

Kapampangan Dictionary: to improve livelihood, to prosper

Kabaldugan: Minawa, sumulung kabyayan

Gamit:

Dakal lang sasabi, keng taung mabisyu, ing alang MIBAGUA
Keng gawang e mayap, iya ing gagawan, inia mangasira
Ugaling matsura, tune mayayakit, maling alimbawa
Keni nang lipunan, keng keang pamilya at arap ding malda

(“INING BIENG PEPARAM” – Sergio Gramonte Calayag)

Posted in Amanung Sisuan, Kataya, Manigaral Kapampangan, Talasulat Kapampangan | Leave a comment

Kalupa Nia Naman

Posted on January 12, 2024 by Apo Gonzales

07 Mayo 2017
12 silaba, 6-6 sesura, 4 a telatag, 8 estropa

1.
Ing ‘ipan king ipan’ / at ‘matá king matá’
ya ing tuntuna’na / ning tipan a matuá;
marajil uli ring / taú mangmang la pá
king bieng e rá tantû / ing kapakaya’ná.

2.
Mine la’t linabas / ding dakal a siglú,
e mú no abilang / ding mibual a taú;
dapot sumangid ning / mapamuksang gulú
ing pamakipamuk / e meko king yatú.

3.
Mengalto nala ring / miyaliwang messias,
a pilit babandí / king titulung gasgas;
nung nanu nala ring / penaral dáng landas,
ala, ing bigsikan / misubî mûng lakwas.

4.
Ing sangkan, ing muâ king / taú e mamako,
ing lugud pilit neng / king pusû lalako;
ipagka’imut ne’iti / king ban e ya siro
karing lelangang a / king dulum lilito.

5.
Kaibat dá ring dakal / a bieng mengalagas
itang matuang tipan / e murin migwakas;
sumangid ning usuk / king lugud a wagas
king taú e meko / ing pamipanablas.

6.
Kasi ing yaral dáng / mayap a balitâ
salungat ya karing / kimut dá at gawâ;
ing ipanaral dáng / ilà mûng mipalâ
yáng panibata’ning / pamipapagkamuâ.

7.
Nia ing pamalitâ / dáng mibayung tipan
kalupa nia naman / nitang milipasan;
mata’t mata yá rin / at ipan king ipan
ing ipagkabie rá / ding palsung tulisan.

8.
Makanya’nong tinggen / ning talapanaral
detang mapanakong / memaglub king kural,
a e dinalan king / pasbul a miyalal
at memanlabas mû / karing dalang siwal.

Yng Bantulut A Siualâ
San Simon
Pisanggunian: Juan 10:1

Posted in Biblia, PL Apo Gonzales, Poesia, Poeta Laureado | Leave a comment

“dinan Yu ku pung saktu”

Posted on January 3, 2024 by Tuazon Sabandal

“o bina upaya’t pekamasaplala’t king banua maratun,
kening kababan ku, at king karinan Yu nung nu Ko durungdung,
ining kakung pusu a king kasalanan atyu makakulung,
ibulus Ye sana at pakaluluan pu, o Guinung meniaklung,
ban ing Kekong lupa milako ya pampan, at ban ing talikbung
e na na sabatan karing balugbug Yu ing kanakung dalung.

“at kambe na niti, ing Kekong upaya kakung lalambisan,
adduan ku sana e Ye lulubasan ing babo kung dulang,
pota reng gamat ku ala lang aramput, sumala ku atian,
at kakung isubu a e mikakunu ing mar’nat ibatan,
at magkang maliari, mirame ku pusu, at dinat ya naman,
gulutan na Kayu uling isipan nang Keko yang peburian.

“kayantabe niti, adduan ku munamang ing dulang ku sana
e Ye tutulutan masiadung lalagu ampong maniampaga,
pota ing atian ku magiam ya keng kanan at mamutatang ya,
at ding kakung gamat, angga ing e mayap, isubu ra pota,
at lakuas masakit, pota uli niti ing pusu bala na
uling e sasala, ing isiklod ding tud e na kailangan pa.

“sung miliari ita, pekakalulu ku karing anggang tau,
ala kung keliwan keng tutubung dikut keni babo yatu,
anti naku’ng singo kabud linto’t alang ulaga Kekayu,
ing bie alang layun nung e patiun yamu ing ayan king sepu,
inia pin adduan ku, din’ Yu kung saktu mu ban ining pusu ku
e ya mangalinguan a atin yang dapat dalungan a Guinu.”

***sukad 18 silaba (6/6/6×6)
***misulat ya pu ini ketang manga banua 2011 o kaya 2012

Posted in Capampangan Shakespeare, Pangadi, PL Tuazon Sabandal, Poesia | Leave a comment

DINAN MENG LAYA

Posted on January 3, 2024 by Sergio Gramonte Calayag

nang: PL Sergio Gramonte Calayag

Bisa kung sulapo karing banuang matas
Dapot kakung pakpak ila reng makaptas
E ku man migalo, at bisa kung lundag
Ala kung panimbang kanakung amalas

Kasakit na pala ing alang panimbang
Kekeling king kaili, kekeling king wanan
Anti kang malilyu, ining panimanman
Dudurut akakit, ini nang kabilian

Nung ing kakung pakpak, ila reng lipakpak
Kanaku yang dasan itang banuang matas
Karin magpatilo, lugal a malualas
Atin kung kalayan, nukarin man miras

Dapot alang laya, aku ing ginapus
Keng matibe lubid, karin ku binalut
Ing kanakung bosis manyawad yang lunus
Kening pangatali aku sa’ng ibulus

Kalupa ning tau, ing batal sekalan
Kayang pangisnawa iyang panagalan
Papaten inawa, bangke yang tangalan
Lalako ing laya, mabie king sikluban

Melalang ing tau atin yang kalayan
Iya ing regalo ibat king Miglalang
Alang karapatan, ing bie yang sintangan
Tutung kasalanan nung ini’ng gagawan

Iniang kagalangan iyang pairalan
Kareng parang tau, nanu man kabilian
E me sasakalan, ing kayang panandam
Ing mayumung lugud ini yang ipabal

Pabustan ing tau kumabieng malaya
Keti babo yatu iyang misaplala
Ilako ing inggit, ilako ing dirya
Ing bie nang makamal menibat king lbpa

Posted in PL Sergio Gramonte Calayag, Poesia | Leave a comment

Bulanglang Bangus

Posted on January 3, 2024 by Patria Bondoc David


https://www.facebook.com/reel/1429259414666873

Posted in Pamangan, Poetisa Patria Bondoc David, Video | Leave a comment